នៅមិនទាន់មានការបញ្ជាក់ពីបេក្ខភាពនៃសមាសភាពបេក្ខជនសមាជិកគណៈកម្មាធិការជាតិរៀបចំការបោះឆ្នោត(គ.ជ.ប.)នៅឡើយទេ ក្រោយពីកិច្ចប្រជុំនៃមេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិនៅល្ងាចថ្ងៃច័ន្ទនេះ ស្របពេលដែលគណៈកម្មាធិការអចិន្ត្រៃយ៍រដ្ឋសភាបិទបញ្ចប់ការទទួលពាក្យបេក្ខជនគ.ជ.ប.ថ្មីនៅថ្ងៃដដែលនេះដែរ។
ក្រោយពីកិច្ចប្រជុំអស់រយៈពេលមួយម៉ោងនៅមន្ទីររដ្ឋសភាជាតិ លោកសម រង្ស៊ី ប្រធានគណបក្សសង្គ្រោះជាតិ បានថ្លែងនៅក្នុងសន្និសីទសារព័ត៌មានថា ជំនួបនៅថ្ងៃនេះគ្រាន់តែដើម្បីជជែកពីរបៀបធ្វើការ។ ហើយលោកក៏បានបញ្ជាក់ឡើងវិញថា បេក្ខជនទី៩គឺលោកហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោតមួយហៅថានិកហ្វិក ទទួលបានការឯកភាពពីគណបក្សទាំងពីររួចហើយ។ ប៉ុន្តែគណបក្សទាំងពីរនឹងសម្រេចលើបេក្ខជនមកពីគណបក្សនិមួយៗនៅពេលក្រោយ។
«បេក្ខជនបួនរូបទៀតមកពីគណបក្សសង្គ្រោះជាតិ និងគណបក្សប្រជាជនកម្ពុជានឹងជម្រាបតាមក្រោយ ពីព្រោះថ្នាក់ដឹកនាំក្រុមតំណាងរាស្ដ្រគណបក្សទាំងពីរនឹងជួបជុំគ្នាថ្ងៃខានស្អែក ម៉ោង៥នៅមន្ទីររដ្ឋសភានេះដើម្បីពិនិត្យបេក្ខភាពយកមកថ្លឹងថ្លែង ហើយផ្តល់ព័ត៌មានឲ្យគ្នាទៅវិញទៅមក។ ពេលនោះអាចជម្រាបបានខ្លះថា រូបភាពសមាសភាពគ.ជ.ប.ថ្មីយ៉ាងម៉េច»។
លោកស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃតំណាងឲ្យគណបក្សប្រជាជនកម្ពុជា បានប្រកាសឯកភាពលើការលើកឡើងរបស់លោកសម រង្ស៊ី។
«យើងនៅតែឯកភាពគ្នាខ្ពស់ថា នឹងបន្តសន្ទនា ហើយនិងធ្វើការជាមួយគ្នាតទៅទៀត»។
រហូតមកទល់នឹងម៉ោង៥ល្ងាចថ្ងៃច័ន្ទនេះដែលជាថ្ងៃបិទឈប់ទទួលពាក្យសុំជាបេក្ខជនសមាជិកគ.ជ.ប.ថ្មី គណៈកម្មាធិការអចិន្ត្រៃយ៍រដ្ឋសភាបានទទួលពាក្យពីបេក្ខជននានាចំនួន៣១រូប ក្នុងនោះមានមន្ត្រីមកពីគណបក្សទាំងពីរ និងមន្ត្រីអង្គការសង្គមស៊ីវិលផងដែរ។
ក្រុមមេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិគ្រោងនឹងជួបប្រជុំពិភាក្សាគ្នាបន្តទៀតលើបញ្ហាបេក្ខជនគ.ជ.ប.នេះនៅថ្ងៃពុធទី៨ខែមេសា គឺមួយថ្ងៃមុននឹងគណៈកម្មាធិការអចិន្ត្រៃយ៍រដ្ឋសភាប្រជុំលើបញ្ហានេះដែរ។
ដោយឡែក សភាពេញអង្គនឹងប្រជុំបោះឆ្នោតជ្រើសតាំងសមាសភាពសមាជិកគណៈកម្មាធិការជាតិរៀបចំការបោះឆ្នោតថ្មីនៅថ្ងៃទី១៣ខែមេសា។
តាមគោលការណ៍ សមាជិកមួយរូបមកពីគណបក្សប្រជាជនកម្ពុជានឹងអាចឡើងកាន់តំណែងជាប្រធានគ.ជ.ប.ថ្មី រីឯតំណែងអនុប្រធាននឹងត្រូវបានទៅសមាជិកមកពីគណបក្សសង្គ្រោះជាតិ៕
