នាយករដ្ឋមន្ត្រីកម្ពុជាលោកហ៊ុន សែន នៅថ្ងៃព្រហស្បតិ៍នេះ បានស្នើឲ្យមន្ត្រីការទូតកម្ពុជា និងនិស្សិតខ្មែរដែលកំពុងបន្តសិក្សា និងបំពេញការងារនៅប្រទេសចិន កុំចាកចេញពីប្រទេសដែលមេរោគកូរ៉ូណាថ្មីបានឆក់យកជីវិតមនុស្សជាង១៧០នាក់ ហើយមនុស្សរាប់ពាន់នាក់ទៀតបានឆ្លងមេរោគនេះ។ មេរោគនេះកំពុងរាតត្បាតទៅបណ្តាប្រទេសផ្សេងទៀតនៅជុំវិញពិភពលោក។
ថ្លែងនៅក្នុងសន្និសីទសារព័ត៌មានមួយនៅវិមានសន្តិភាព នាទីក្រុងភ្នំពេញ លោកហ៊ុន សែន បានមានប្រសាសន៍ប្រាប់ក្រុមអ្នកយកព័ត៌មានថា ពលរដ្ឋកម្ពុជាមិនអាចរត់ចោលប្រជាជនចិនក្នុងគ្រាលំបាកបែបនេះទេ។
«អ្នកការទូត កុងស៊ុល និងនិស្សិតកម្ពុជា ដែលកំពុងធ្វើការ និងរៀនសូត្រ រាប់ទាំងនៅទីក្រុងវូហាន ត្រូវបន្តស្ថិតនៅទីនោះ និងចូលរួមជាមួយប្រជាជនចិន ដើម្បីប្រយុទ្ធជាមួយជំងឺនេះ កុំរត់ចោលប្រជាជនចិន ក្នុងគ្រាដ៏លំបាកនេះ។ «ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក»។ នេះជាពាក្យស្លោករបស់កម្ពុជាយើង តាំងពីដូនតាយើងមក»។
នៅក្នុងសន្និសីទសារព័ត៌មានដដែល លោកហ៊ុន សែន ដែលដឹកនាំប្រទេសកម្ពុជាជាង៣០ឆ្នាំមកហើយនោះ បានព្រមានដេញអ្នកកាសែតរូបណាដែលពាក់ម៉ាស់ចូលយកព័ត៌មាន ដោយលោកអះអាងថា កម្ពុជាមិនទាន់មានអ្នកស្លាប់ដោយវីរុសនេះទេ។
អ្នកកាសែតមួយរូបបានលើកជាសំណួរទាក់ទិនការចូលរួមរបស់កម្ពុជាដើម្បីជួយប្រទេសចិន នៅក្នុងការទប់ទល់នឹងការឆ្លងមេរោគកូរ៉ូណា ដែលទើបត្រូវបានរកឃើញមួយករណីនៅប្រទេសកម្ពុជា។
លោកនាយករដ្ឋមន្ត្រីហ៊ុន សែន បានឆ្លើយតបថា កម្ពុជាកំពុងពិនិត្យលទ្ធភាពរបស់ខ្លួនក្នុងការជួយប្រទេសចិន។ តែលោកថា អ្វីដែលកម្ពុជាអាចធ្វើបាននៅពេលនេះគឺមិនឲ្យមានការជម្លៀសមន្ត្រីការទូត និងនិស្សិតខ្មែរចេញពីប្រទេសចិន ដែលអាចបង្កការភ័យខ្លាចបន្ថែមដល់ប្រជាជនចិន ហើយកម្ពុជាមិនត្រូវបិទជើងយន្តហោះរបស់ចិន និងការដឹកជញ្ជូនរបស់ចិនតាមផ្លូវទឹកចូលក្នុងប្រទេសកម្ពុជា ហើយក៏គ្មានការរារាំងមិនឲ្យទេសចរចិនចូលប្រទេសកម្ពុជាផងដែរ។
«ខ្ញុំគិតថា ចិនមិនត្រូវការលុយយើងទេ ដើម្បីទៅជួយដល់ស្រុកចិនទេ។ យើងគ្រាន់តែធ្វើម៉េច សហការជាមួយស្ថានទូតចិននៅកម្ពុជា ធ្វើឲ្យបានល្អនូវអ្នកវិនិយោគចិន តំបន់សេដ្ឋកិច្ចពិសេសរបស់ចិន និងពលរដ្ឋចិន ទេសចរចិន ដែលកំពុងធ្វើការ ដែលមកលេងនៅស្រុកខ្មែរឲ្យបានល្អទៅខ្ញុំគិតថា វាជាការរួមចំណែក ហើយកុំរើសអើងប្រជាជនចិន កុំរើសអើងប្រជាជនចិន»។
រដ្ឋាភិបាលកម្ពុជាបានបញ្ជាក់ថា មានករណីដំបូងនៃការឆ្លងវីរុសកូរ៉ូណាថ្មី នៅក្នុងក្រុងព្រះសីហនុនៅថ្ងៃទី២៧ ខែមករានេះ។ អ្នកដំណើរជនជាតិចិន ដែលធ្វើដំណើរដោយត្រង់ពីទីក្រុងវូហាន (Wuhan) នៃប្រទេសចិនមកកម្ពុជាតាមជើងហោះហើរផ្ទាល់ពីទីក្រុងវូហានមកអាកាសយានដ្ឋានអន្តរជាតិខេត្តព្រះសីហនុ មានជំងឺរលាកសួត បង្កឡើងដោយវីរុសកូរ៉ូណាថ្មី។
នៅពេលមានការឆ្លងរីករាលដាលវីរុសកូរ៉ូណាដ៏ប្រល័យនេះមានមតិរិះគន់ជាច្រើនបានលើកឡើងថា កម្ពុជាគួរបិទជើងយន្តហោះចិនចូលទឹកដីកម្ពុជា។
ក៏ប៉ុន្តែលោកនាយករដ្ឋមន្ត្រីហ៊ុន សែន បានប្រតិកម្មតបថា កម្ពុជានឹងក្លាយជារដ្ឋឯកោ ប្រសិនបើមានការបិទជើងយន្តហោះយ៉ាងដូច្នេះ។ ប្រធានគណបក្សកាន់អំណាចរូបនេះក៏បានរិះគន់ខ្លាំងៗទៅលើការអធិប្បាយរបស់មន្ត្រីសិទ្ធិមនុស្សជាន់ខ្ពស់មួយរូបរបស់អង្គការឃ្លាំមើលសិទ្ធិមនុស្ស Human Rights Watch ដែលបានផ្តល់ការអធិប្បាយដល់វិទ្យុបរទេសមួយដែលផ្សាយជាភាសាខ្មែរថា កម្ពុជាគួរត្រូវបានស្តីបន្ទោសចំពោះការអនុញ្ញាតឲ្យមានជើងយន្តហោះពីប្រទេសចិនចូលក្នុងទឹកដីកម្ពុជា។
«ផ្តាំទៅ Phil Robertson នែ៎ បើលោកឯងជ្រុលជាមកប្រដៅឲ្យទទួលថា រដ្ឋាភិបាលខ្មែរត្រូវទទួលខុសត្រូវ គួរស្តីបន្ទោស ទៅស្តីបន្ទោសឲ្យរដ្ឋាភិបាលគ្រប់ប្រទេសទៅ រាប់ទាំងប្រទេសអ្នកឯង ស្ថិតនៅផងដែរ ព្រោះជំងឺកើតនៅប្រទេសអ្នកឯង ម៉េចក៏អ្នកឯងមិនឲ្យស្តីបន្ទោសរដ្ឋាភិបាលអ្នកឯង? ហើយឲ្យមកស្តីបន្ទោសតែខ្ញុំ។ អយុត្តិធម៌រឿងហ្នឹង»។
លោក Phil Robertson នាយករងអង្គការឃ្លាំមើលសិទ្ធិមនុស្សប្រចាំតំបន់អាស៊ី បានប្រាប់ VOA តាមសារអេឡិចត្រូនិកអ៊ីម៉េលយ៉ាងខ្លីថា ប្រទេសផ្សេងទៀតជុំវិញពិភពលោកកំពុងចាត់វិធានការទប់មិនឲ្យមានការឆ្លងរាលដាលបន្ថែមនៃវីរុសកូរ៉ូណានេះ។
លោកបានសរសេរក្នុងន័យដើមថា៖ «ប្រទេសដទៃទៀតនៅជុំវិញពិភពលោកកំពុងចាត់វិធានការរាំងខ្ទប់មិនឲ្យមានការចម្លងវីរុសកូរ៉ូណានេះ ហើយនៅដំណាលពេលគ្នានោះ គេបានតម្កល់ទុកសិទ្ធិមនុស្សជាមូលដ្ឋានផងដែរ ដូច្នេះកម្ពុជាគួរតែធ្វើដូចគ្នាយ៉ាងដូច្នោះដែរ»។
ប្រធានាធិបតីចិនលោកស៊ី ជីងពីង បានកោះហៅឲ្យមានការប្រជុំសមាជិកការិយាល័យរបស់បក្សកុម្មុយនីស្តចិនកាលពីថ្ងៃសៅរ៍កន្លងទៅនេះ ដើម្បីពិភាក្សារកមធ្យោបាយនានារាំងខ្ទប់មេរោគកូរ៉ូណា ដោយបានប្រកាសថា ប្រទេសចិន កំពុងប្រឈម«ស្ថានភាពដ៏ធ្ងន់ធ្ងរ»។
ក្រោយការប្រកាសរបស់លោកប្រធានាធិបតីស៊ី ជីងពីង នោះមក ការជម្លៀសជនជាតិបរទេសជាលើកដំបូងចេញពីប្រទេសចិនក៏បានចាប់ផ្តើមកាលពីថ្ងៃពុធក្នុងសប្តាហ៍នេះ ខណៈចំនួនអ្នកស្លាប់ដោយសារមេរោគកូរ៉ូណាបានកើនឡើងដល់មនុស្សចំនួន១៣២នាក់ ហើយប្រទេសជាច្រើនកំពុងដាក់ការរឹតបន្តឹងលើការធ្វើដំណើរទៅកាន់ប្រទេសចិន។
ជនជាតិជប៉ុនចំនួន២០៦នាក់ត្រូវគេរាយការណ៍ថា ត្រូវបានដឹកជញ្ជូនចេញពីទីក្រុងវូហាន ដែលជាប្រភពកំណើតមេរោគកូរ៉ូណាថ្មី ឆ្ពោះទៅកាន់អាកាសយានដ្ឋាន Haneda នៅទីក្រុងតូក្យូ។ ចំណែកសហរដ្ឋអាមេរិកក៏ត្រូវបានគេរាយការណ៍ថា បានជម្លៀសពលរដ្ឋខ្លួនចំនួនជិត២០០នាក់តាមជើងយន្តហោះចេញពីទីក្រុងវូហានទៅកាន់មូលដ្ឋានទ័ពមួយនៅរដ្ឋកាលីហ្វ័រយ៉ា។ សហភាពអឺរ៉ុបក៏បានប្រកាសផែនការដឹកជញ្ជូនពលរដ្ឋខ្លួនប្រមាណជាង២០០នាក់ចេញពីទីក្រុងវូហាននេះដែរ។
លោកអំ សំអាត នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (Licadho) យល់ថា សហរដ្ឋអាមេរិក និងជប៉ុន ទំនងជាមានការបារម្ភចំពោះស្ថានភាពសុខភាពពលរដ្ឋរបស់ខ្លួន ទើបសម្រេចចាត់វិធានការជម្លៀសពលរដ្ឋខ្លួនចេញពីតំបន់ដែលមានការឆ្លងនៃវីរុសកូរ៉ូណា។ លោកថា ប្រទេសទាំងពីរកំពុងបង្ហាញចេតនាចែករំលែកបន្ទុករបស់រដ្ឋាភិបាលចិនក្នុងការចំណាយលើសេវាសុខាភិបាល។
ប្រទេសអូស្ត្រាលី ណូវែលហ្សេឡង់ បារាំង រុស្ស៊ី ប្រទេសឥណ្ឌា និងប្រទេសផ្សេងទៀតក៏បានប្រកាសផែនការជម្លៀសពលរដ្ឋរបស់ពួកគេចេញពីទីក្រុងវូហាននៅសប្តាហ៍នេះដែរ។
រហូតមកដល់ពេលនេះមានពលរដ្ឋចិនប្រមាណជិត៧៧០០នាក់បានឆ្លងមេរោគកូរ៉ូណា ដែលបានផ្ទុះឡើងជាលើកដំបូងនៅខេត្តហ៊ូបេប្រទេសចិន។ នៅក្រៅប្រទេសចិនមានសេចក្តីរាយការណ៍បញ្ជាក់ថា ការឆ្លងមេរោគនេះបានកើនឡើងចំនួនជាង៧០ករណី។
ប្រជាជនច្រើនជាង៥៦លាននាក់ នៅក្នុងក្រុងជិត២០នៅប្រទេសចិនដែលរួមទាំងទីក្រុងវូហាន ខេត្តហ៊ូបេ ក៏ត្រូវបានគេរាយការណ៍ថា ត្រូវបានគេរារាំងមិនឲ្យធ្វើដំណើរដើម្បីទប់ស្កាត់មិនឲ្យមានការរីករាលដាលវីរុសកូរ៉ូណានេះបន្ថែមទៀត៕
