នៅថ្ងៃពុធនេះ លោកនាយករដ្ឋមន្រ្តី ហ៊ុន សែន បានជំរុញឲ្យតុលាការកម្ពុជាបិទបញ្ចប់រឿងក្តីប្រឆាំងនឹងតំណាងសហជីពនានានៅត្រឹមចុងឆ្នាំ២០១៨ ដើម្បីឲ្យលំហសេរីភាពនៃការបំពេញការងារសម្រាប់សហជីពបានពេញលេញ។
ថ្លែងក្នុងពិធីសំណេះសំណាលជាមួយកម្មករកម្មការិនីនៅស្រុកកណ្តាលស្ទឹង ខេត្តកណ្តាល នាថ្ងៃទី២៨ខែវិច្ឆិកាឆ្នាំ២០១៨ លោកនាយករដ្ឋមន្រ្តី ហ៊ុន សែន បានជំរុញឲ្យសហជីពទាំងអស់ដែលកំពុងមានវិវាទនៅតុលាការ ត្រូវបញ្ជូនសំណើទៅកាន់រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈដើម្បីឲ្យមានការដោះស្រាយបញ្ចប់នាចុងឆ្នាំ២០១៨នេះ។ លោកក៏បានបញ្ជាឲ្យក្រសួងការងារធ្វើការជាមួយក្រសួងយុត្តិធម៌ដើម្បីក្រសួងយុត្តិធម៌ធ្វើការបន្តជាមួយតុលាការ ក្នុងការបញ្ចប់សំណុំរឿងទាំងនោះ កុំឲ្យឈានចូលដល់ឆ្នាំ២០១៩។
លោកបញ្ជាក់ថា៖
«បន្ទាប់ពីរដ្ឋមន្រ្តីយុត្តិធម៌បានធ្វើការទៅ តុលាការកំពុងពន្លឿនការស៊ើបអង្កេតដើម្បីបិទបញ្ចប់ការស៊ើបអង្កេត។ នៅពេលដែលគេបិទបញ្ចប់ការស៊ើបអង្កេត តុលាការគេនឹងធ្វើការសន្និដ្ឋានឬមួយគេចាត់ការយកទៅជម្រះ។ បើយកទៅជម្រះក៏ជម្រះឲ្យរហ័ស ឬមួយគេទម្លាក់ចោល គេមិនចាត់ការតែម្តង តម្កល់ទុកមិនចាត់ការ។ ដូច្នេះបើតម្កល់ទុកមិនចាត់ការ វាចប់ហើយ»។
លោកនាយករដ្ឋមន្រ្តីដែលកាន់អំណាចជាង៣០ឆ្នាំមកហើយនោះបន្ថែមដោយទទួលស្គាល់ថា ការបន្តសំណុំរឿងរបស់សហជីពនៅតុលាការនឹងធ្វើឲ្យប៉ះពាល់ដល់លំហសេរីភាពនៃការអនុវត្តការងាររបស់ពួកគេ។
លោកបញ្ជាក់ថា៖
«មេសហជីព ពេលខ្លះកំពុងតែធ្វើការទៅនៅក្រោមឥទ្ធិពលនៃពាក្យបណ្តឹង។ នេះវាជារឿងមិនល្អទេ។ លំហសេរីភាពនៃការធ្វើការរបស់សហជីពគឺមិនទាន់ទទួលបានពេញលេញទេ។ អ៊ីចឹងសូមឲ្យក្រសួងការងារ និងបណ្តុះបណ្តាលវិជ្ជាជីវៈសហការជាមួយនឹងក្រសួងយុត្តិធម៌ ហើយតាមរយៈក្រសួងយុត្តិធម៌ ធ្វើការជាមួយនឹងតុលាការដើម្បីបិទបញ្ចប់សំណុំរឿងទាំងឡាយដែលពាក់ព័ន្ធជាមួយនឹងសកម្មភាពសហជីពដែលតំណាងឲ្យកម្មករ ទោះតិច ទោះច្រើន»។
នេះជាលើកទី២ហើយដែលលោកនាយករដ្ឋមន្រ្តី ហ៊ុន សែន បញ្ជាឲ្យបញ្ចប់សំណុំរឿងពាក់ព័ន្ធនឹងសហជីពនៅកម្ពុជា បន្ទាប់ពីក្រុមសហជីពសកម្មៗមួយចំនួន ដែលតែងទាមទារសិទ្ធិសម្រាប់កម្មករ កំពុងរងបណ្ដឹងម្នាក់ៗជាច្រើនករណី ពាក់ព័ន្ធនឹងការដឹកនាំកម្មករឲ្យចេញធ្វើការតវ៉ាទាមទារសិទ្ធិផ្សេងៗ។ ការរងបណ្តឹងរបស់ពួកគេភាគច្រើនកើតឡើងនៅមុនការបោះឆ្នោតថ្នាក់ជាតិឆ្នាំ២០១៨ ដែលត្រូវបានគេដឹងថា ជាពេលវេលាដែលរដ្ឋាភិបាលរឹតបន្តឹងសេរីភាពនៃការជួបជុំផ្សេងៗ។
ក្រុមសហជីពមួយចំនួនដែលកំពុងរងបណ្តឹងនៅតុលាការលើកឡើងថា ការបញ្ជាឲ្យបញ្ចប់សំណុំរឿងក្តីរបស់ពួកគេគឺអាចបណ្តាលមកពីរដ្ឋាភិបាលរងសម្ពាធពីអន្តរជាតិ និងខ្លះបានបារម្ភថា ពួកគេអាចនឹងរងការចោទប្រកាន់ឡើងវិញទៀត នៅពេលដែលស្ថានការណ៍នយោបាយផ្លាស់ប្តូរ។
លោក អាត់ ធន់ ប្រធានសហភាពការងារកម្ពុជា ដែលជាប់បណ្ដឹងនៅតុលាការប្រមាណជា៧ករណី ប្រាប់ VOA ថា ការបញ្ចប់សំណុំរឿងរបស់សហជីពនៅតុលាការនឹងធ្វើឲ្យសហជីពកាន់តែអាចបំពេញការងារក្នុងការទាមទារសិទ្ធិ និងផលប្រយោជន៍បន្ថែមទៀតសម្រាប់កម្មករ។
លោកបន្ថែមដោយរំពឹងថា ការចោទប្រកាន់សហជីពតាមផ្លូវតុលាការដោយសារតែការបំពេញការងាររបស់ពួកគេនឹងលែងមានតទៅទៀត។
លោកបញ្ជាក់ថា៖
«យើងអត់ចង់ឃើញមានការចោទប្រកាន់ដោះលែងៗអ៊ីចឹងទេ។ យើងចង់បានប្រព័ន្ធច្បាប់មួយដែលមានការអនុវត្តស្មើភាពគ្នាក្នុងចំណោមនិយោជក ក្នុងចំណោមរដ្ឋាភិបាល ក្នុងចំណោមអ្នកមានអំណាច និងកម្មករហ្នឹង ធ្វើម៉េចឲ្យយើងមានសេរីភាពពេញលេញ កុំឲ្យរងឥទ្ធិពលតុលាការ ឬក៏រឿងអយុត្តិធម៌អីផ្សេង»។
ការបញ្ជាឲ្យទម្លាក់ចោល និងលើកលែងការចោទប្រកាន់លើបណ្ដឹងរបស់ក្រុមមេដឹកនាំសហជីពនេះ ធ្វើឡើងមិនយូរប៉ុន្មានក្រោយពីលោកនាយករដ្ឋមន្ត្រី ហ៊ុន សែន បានសម្រេចបង្កើតក្រុមការងារដោះស្រាយសំណើ និងសំណូមពររបស់អង្គការសង្គមស៊ីវិល។ ចំណែកក្រសួងមហាផ្ទៃក៏បានជូនដំណឹងឲ្យអង្គការមិនមែនរដ្ឋាភិបាលដែលស្របច្បាប់ទាំងអស់ រាយការណ៍ទៅខ្លួន ប្រសិនបើមានការរឹតត្បិតការធ្វើសកម្មភាពជួបជុំណាមួយនៅតាមមូលដ្ឋាន ជាបន្តបន្ទាប់។
ការណ៍ទាំងនេះត្រូវបានគេមើលឃើញថា រដ្ឋាភិបាលដែលដឹកនាំដោយលោកនាយករដ្ឋមន្ត្រី ហ៊ុន សែន អស់រយៈពេលជាង៣ទសវត្សរ៍មកហើយនោះ កំពុងព្យាយាមបន្ធូរបន្ថយកម្ដៅនយោបាយ ខណៈកម្ពុជាកំពុងរងការរិះគន់យ៉ាងខ្លាំងពីស្ថាប័ន និងប្រទេសលទ្ធិប្រជាធិបតេយ្យធំៗមួយចំនួន ក្រោយការបោះឆ្នោតថ្នាក់ជាតិមួយដែលមិនមានការចូលរួមពីគណបក្សប្រឆាំង និងការដែលកម្ពុជាកំពុងត្រូវបានដឹកនាំដោយរដ្ឋាភិបាលឯកបក្ស។
សហភាពអឺរ៉ុប នៅដើមខែតុលានេះ បានជូនដំណឹងទៅរដ្ឋាភិបាលកម្ពុជាថា ប្រទេសកម្ពុជានឹងបាត់បង់ឋានៈអនុគ្រោះពន្ធសម្រាប់ការនាំទំនិញចូលទីផ្សាររបស់សហគមន៍អឺរ៉ុប ដោយសារតែការរំលោភសិទ្ធិមនុស្ស។ សហភាពអឺរ៉ុបក៏បានទុកពេល១២ខែឲ្យកម្ពុជាស្តារស្ថានភាពប្រជាធិបតេយ្យឡើងវិញ មុននឹងសម្រេចដកពន្ធអនុគ្រោះ ដែលផ្ដល់ផលចំណេញឲ្យកម្ពុជាប្រមាណជា៧០០លានដុល្លារក្នុងមួយឆ្នាំៗ៕
