ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​នាយក​រដ្ឋមន្ត្រី​​ ហ៊ុន សែន នឹង​ចូល​រួម​មហា​សន្និបាត​អង្គ​ការ​សហ​ប្រជាជាតិ​នៅ​បុរីញូវយ៉ក


រូបឯកសារ៖ លោកនាយករដ្ឋមន្ត្រី ហ៊ុន សែន ចូលរួមកិច្ចប្រជុំកំពូលពិសេសអាមេរិក-អាស៊ាន ដើម្បីរំលឹកខួប ៤៥ ឆ្នាំនៃទំនាក់ទំនងរវាងសហរដ្ឋអាមេរិកនិងអាស៊ាន នៅក្រសួងការបរទេសអាមេរិក ក្នុងរដ្ឋធានីវ៉ាស៊ីនតោន ថ្ងៃទី ១៣ ខែឧសភា ឆ្នាំ ២០២២។
រូបឯកសារ៖ លោកនាយករដ្ឋមន្ត្រី ហ៊ុន សែន ចូលរួមកិច្ចប្រជុំកំពូលពិសេសអាមេរិក-អាស៊ាន ដើម្បីរំលឹកខួប ៤៥ ឆ្នាំនៃទំនាក់ទំនងរវាងសហរដ្ឋអាមេរិកនិងអាស៊ាន នៅក្រសួងការបរទេសអាមេរិក ក្នុងរដ្ឋធានីវ៉ាស៊ីនតោន ថ្ងៃទី ១៣ ខែឧសភា ឆ្នាំ ២០២២។

នាយក​រដ្ឋមន្ត្រី​ខ្មែរ​ លោក​ហ៊ុន សែន​ នឹង​ចូល​រួម​មហា​សន្និបាត​អង្គការ​សហ​ប្រជាជាតិ​ នៅ​ទីក្រុង​ញូវយ៉ក​សហ​រដ្ឋអាមេរិក​ និង​គ្រោងទៅ​បំពេញ​ទស្សន​កិច្ច​ការ​ទូត​ផ្សេង​ទៀត​នៅ​ប្រទេស​គុយបា​ និង​ជប៉ុន។ ​នេះ​បើ​តាម​សេចក្តី​ប្រកាស​ព័ត៌មាន​របស់​ក្រសួង​ការ​បរទេស​ និង​សហ​ប្រតិបត្តិការ​អន្តរជាតិ​ចេញ​ផ្សាយ​កាល​ពីថ្ងៃ​ចន្ទ​ម្សិលមិញ។ ​

សេចក្តី​ប្រកាស​ចុះ​ថ្ងៃ ទី​១៩​ ខែ​កញ្ញា​របស់​ក្រសួង​ការ​បរទេស​កម្ពុជា​បាន​ឱ្យ​ដឹង​ថា​ ទស្សន​កិច្ច​របស់​លោក​ហ៊ុន សែន​ នៅ​ក្រៅ​ប្រទេស​នឹង​មាន​រយៈ​ពេល១​សប្តាហ៍​ គឺ​គិត​ចាប់​ពី​ថ្ងៃ​ទី​២១ ​ដល់​ថ្ងៃ​ទី​២៨ ​ខែ​កញ្ញា​ ឆ្នាំ​២០២២​នេះ។ ​

បើតាម​សេចក្តី​ប្រកាស​ដដែល​ លោក​នាយក​រដ្ឋមន្ត្ រី​ហ៊ុន សែន ​នឹង​ចូលរួម​សម័យ​ប្រជុំ​លើក​ទី​៧៧​របស់​មហា​សន្និបាត​អង្គការ​សហ​ប្រជាជាតិ​ក្រោម​ប្រធាន​បទ​ «ចំណុច​របត់​សំខាន់​នៃ​ការ​ផ្លាស់​ប្តូរ​មិន​អាច​ត្រឡប់​ក្រោយ​បាន៖ ​ដំណោះស្រាយ​បរិវត្ត​កម្ម​ចំពោះ​បញ្ហា​ប្រឈម​ប្រទាក់​ក្រឡា»​ ចាប់ពី​ថ្ងៃទី​២១​ដល់​ថ្ងៃ​ទី​២៣​ខែ​កញ្ញា​ ឆ្នាំ​២០២២​នៅ​បុរី​ញូវយ៉ក។​

អំឡុង​ពេល​ស្នាក់​នៅ​ទីក្រុង​ញូវយ៉ក​ លោក​ ហ៊ុន សែន ​នឹង​មាន​ជំនួប​មួយ​ចំនួន​ រួម​មាន​ជំនួប​ជាមួយ​នឹង​អគ្គ​លេខាធិការ​អង្គការ​សហ​ប្រជាជាតិ​លោក​ António Guterres​ និង​ប្រធាន​ក្រុម​ប្រឹក្សា​អឺរ៉ុប​លោកCharles Michel។ ​

នៅ​ប្រទេស​គុយបា ​លោក ​ហ៊ុន សែន ​នឹង​មាន​ជំនួប​ជាមួយ​លោក​ប្រធានាធិបតី​នៃ​រដ្ឋ​កុម្មុយនិស្ត​មួយ​នេះគឺ​លោក​ Miguel Diaz-Canel Bermudez ​ដើម្បី​ពិភាក្សា​អំពី​ការ​ពង្រីក​កិច្ច​សហ​ប្រតិបត្តិការ​ក្នុង​វិស័យ​ផ្សេងៗ។​ ចំណែក​នៅប្រទេស​ជប៉ុន​ លោក​នាយក​រដ្ឋមន្ត្រី​ហ៊ុន សែន​ នឹង​ចូល​រួម​ពិធី​បុណ្យ​សព​ថ្នាក់​ជាតិ​របស់​លោក​Shinzo Abe អតីត​នាយក​រដ្ឋមន្ត្រី​ជប៉ុន​ ដែល​នឹង​ប្រព្រឹត្ត​ទៅ​នៅ​ថ្ងៃទី​២៧​ ខែ​កញ្ញា​ឆ្នាំ​២០២២។ ​នេះ​បើតាម​សេចក្តី​ប្រកាស​ព័ត៌មាន​របស់​ក្រសួង​ការ​បរទេស​កម្ពុជា៕

XS
SM
MD
LG