ក្នុងរយៈពេល ៣ ថ្ងៃនៃពិធីបុណ្យចូលឆ្នាំប្រពៃណីខ្មែរ កម្ពុជានឹងទទួលបានភ្ញៀវទេសចរណ៍ជាតិ និងអន្តរជាតិច្រើនជាង ៥ លាននាក់ ក្នុងឆ្នាំ ២០២៣ បើធៀបនឹងឆ្នាំ ២០២២ ដោយសារតែស្ថានភាពកាន់តែធូរស្រាលពីជំងឺឆ្លងកូវីដ១៩ និងហេដ្ឋារចនាសម្ព័ន្ធ ផ្លូវថ្នល់ខ្វាត់ខ្វែងដែលសម្រួលដល់ការធ្វើដំណើររបស់ទេសចរមកពីគ្រប់មជ្ឈដ្ឋាន។ នេះបើតាមអ្នកនាំពាក្យក្រសួងទេសចរណ៍។
ពិធីបុណ្យចូលឆ្នាំខ្មែរបានចាប់ផ្តើមនៅថ្ងៃសុក្រនេះ ហើយនឹងបិទបញ្ចប់ទៅនៅថ្ងៃអាទិត្យក្នុងសប្តាហ៍នេះ។
អ្នកនាំពាក្យក្រសួងទេសចរណ៍លោក តុប សុភ័ក រំពឹងថា ភ្ញៀវជាតិនិងអន្តរជាតិដែលដើរកម្សាន្តក្នុងប្រទេសកម្ពុជានឹងកើនឡើងលើសឆ្នាំ ២០២២ ប៉ុន្តែលោកមិនទាន់អាចប៉ាន់ស្មានថា បានប៉ុន្មាននោះទេ ដោយត្រឹមតែបញ្ជាក់ថា កាលអំឡុងពិធីបុណ្យចូលឆ្នាំខ្មែរឆ្នាំ ២០២២ កម្ពុជាទទួលភ្ញៀវទេសចរណ៍ផ្ទៃក្នុងបានចំនួនជាង ៥ លាននាក់។
លោកប្រាប់វីអូអេថា៖ «យើងមានការរំពឹងទុកថា នឹងមានទេសចរកើនច្រើនជាងឆ្នាំមុន ដោយសារតែឆ្នាំនេះ យើងមើលស្ថានភាពកូវីដ១៩ របស់យើងក៏កាន់តែល្អប្រសើរ ប្រជាជនមានភាពស៊ាំនៅក្នុងសហគមន៍រឹងមាំ ដោយសារតែការចាក់វ៉ាក់សាំងកូវីដ១៩ បានគ្របដណ្តប់ទូទាំងប្រទេស។ ហើយមួយវិញទៀត ហេដ្ឋារចនាសម្ព័ន្ធទ្រទ្រង់ទេសចរយើងក៏មានភាពងាយស្រួលច្រើនជាងមុនដែរ ថ្វីដ្បិតតែមូលដ្ឋានអាជីវកម្មខ្លះនៅបិទដំណើរការប្រហែលតិចតួចទេ។ ប្រហែល ១៥ ភាគរយ អ្នកដែលបានបិទលើកមុន គាត់មិនទាន់បានបើកឡើងវិញ»។
លោកបន្ថែមថា៖ «យើងមិនអាចប៉ាន់ស្មានបានច្បាស់លាស់នៅឡើយទេ។ ប៉ុន្តែកាលពីចុងឆ្នាំចាស់ ២០២២ កន្លងទៅ បុណ្យចូលឆ្នាំថ្មី គឺជាង ៥ លាននាក់។ អ៊ីចឹងសម្រាប់ឆ្នាំ ២០២៣ នេះ ខ្ញុំគិតថា ក៏មិនក្រោមហ្នឹងដែរ»។
លោកបន្តថា ចំពោះតែខេត្តសៀមរាបមួយ គឺក្រសួងទេសចរណ៍ប៉ាន់ប្រមាណថា ក្នុងពិធីបុណ្យចូលឆ្នាំខ្មែរនឹងទទួលបានភ្ញៀវទេសចរណ៍ផ្ទៃក្នុង មិនតិចជាង ២ លាននាក់នោះទេ ដោយសារចំខួប ១០ ឆ្នាំនៃការប្រារព្ធអង្គរសង្ក្រាន្តផងដែរ។
ប្រធានសមាគមទីភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីន ក៏មើលឃើញថា ក្នុងពិធីបុណ្យចូលឆ្នាំខ្មែរនាឆ្នាំនេះ កំណើនទេសចរផ្ទៃក្នុងនឹងកើនឡើង។ អ្នកស្រីថា ដំណើរកម្សាន្តនៅពេលបុណ្យចូលឆ្នាំប្រពៃណីជាតិខ្មែរនេះ ក៏ជួយធ្វើឱ្យសេដ្ឋកិច្ចមូលដ្ឋាន និងសេដ្ឋកិច្ចជាតិរស់ឡើងវិញផងដែរ ព្រោះនៅពេលណាភ្ញៀវទេសចរណ៍ចេញដើរ គឺត្រូវការសេវាកម្មនានា ដូចជាសេវាកម្មដឹកជញ្ជូនទាំងផ្លូវអាកាស ផ្លូវគោក ផ្លូវទឹក សេវាកម្មស្នាក់នៅ សេវាកម្មម្ហូបអាហារ និងសេវាកម្មផ្សេងៗទៀតជាច្រើន។
អ្នកស្រីប្រាប់វីអូអេថា៖ «ការចេញដើរទេសចរ ឆ្លងកាត់ពីតំបន់មួយទៅតំបន់មួយរបស់អ្នកធ្វើដំណើររបស់អ្នកទេសចរហ្នឹង គឺបានជួយយ៉ាងច្រើនដល់អាជីវកម្មទេសចរ អាជីវកម្មទាំងអស់ រួមទាំងការផ្គត់ផ្គង់វិស័យផ្សេងៗ ព្រោះទេសចរណ៍នឹងមានការចូលរួមផ្គត់ផ្គង់ពីគ្រប់អន្តរវិស័យផងដែរ។ អ៊ីចឹងធ្វើឱ្យសេដ្ឋកិច្ចមូលដ្ឋាន និងសេដ្ឋកិច្ចជាតិរស់ឡើងវិញ»។
អ្នកស្រីបន្ថែមថា អាជីវកម្មដែលធ្លាប់បិទទ្វារ និងផ្អាកកាលពីអំឡុងពេលមានការរីករាលដាលនៃជំងឺកូវីដ១៩ ជិត ៤ ពាន់ទីតាំងនោះមកដល់ពេលនេះ អាជីវកម្មទាំងនោះ ភាគច្រើនបានបើកដំណើរការឡើងវិញ។ អ្នកស្រីបន្តថា តាមការសង្កេតនៅឆ្នាំនេះ ពិធីបុណ្យចូលឆ្នាំខ្មែរមានការរៀបចំធំនិងគ្រប់ទីកន្លែង ជាពិសេសនៅខេត្តសៀមរាប។
ទោះជាយ៉ាងណាក៏ដោយ អ្នកជំនាញទេសចរណ៍រូបនេះថា ដើម្បីអាចឱ្យអាជីវកម្មទាំងអស់ក្នុងវិស័យទេសចរណ៍អាចដំណើរការដោយរលូន ដូចមុនពេលមិនទាន់មានការឆ្លងរាតត្បាតនៃជំងឺកូវីដ១៩នោះ ប្រទេសកម្ពុជាអាចត្រូវការពេលជាង ១ ឆ្នាំទៀត ក្រោមហេតុផលថា ធនធានមនុស្សដែលបានចាកចេញពីវិស័យទេសចរណ៍មិនទាន់វិលមកវិញ ហើយអាជីវកម្មខ្លះទៀតក៏មិនទាន់អាចដំណើរការឡើងវិញបាន។
នៅក្នុងវិស័យទេសចរណ៍នេះ សារព័ត៌មានអនឡាញថ្មីៗបានរាយការណ៍កាលពីថ្ងៃទី ១២ ខែមេសាថា កាលពីឆ្នាំ ២០២២ កម្ពុជារកចំណូលបានប្រមាណ ១,៤១៥ លានដុល្លារពីទេសចរអន្តរជាតិប្រមាណ ២,២៨ លាននាក់ ខណៈទេសចរជាតិប្រមាណ ១៤ លាននាក់ដែលដើរកម្សាន្តទូទាំងប្រទេស បានផ្តល់ចំណូលប្រមាណ ៦៥០ លានដុល្លារអាមេរិកផងដែរ៕
