ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​នាយក​រដ្ឋមន្ត្រី ​ហ៊ុន សែន ​ស្នើ​កងទ័ព​ចិន​ឲ្យ​ជួយ​បំផ្លាញ​មីន​នៅ​កម្ពុជា​ឲ្យ​អស់​ត្រឹម​ឆ្នាំ​២០២៥


រូបឯកសារ៖ អ្នករំដោះមីនមួយរូបកំពុងប្រតិបត្តិការដោះមីននៅក្បែរព្រំដែនកម្ពុជានិងថៃ ក្នុងខេត្តប៉ៃលីន កាលពីថ្ងៃទី ២៧ ខែវិច្ឆិកា ឆ្នាំ ២០១១។

លោក​នាយក​រដ្ឋមន្ត្រី ​ហ៊ុន សែន​ កាល​ពី​ថ្ងៃ​ចន្ទ ​បាន​ថ្លែង​ថា​ ប្រទេស​កម្ពុជា​នឹង​លែង​មាន​គ្រាប់​មីន​ទៀត ​នៅ​ត្រឹម​ឆ្នាំ​ ២០២៥​ ស្រប​តាម​យុទ្ធ​សាស្ត្រ​ដឹកនាំ​ប្រទេស​របស់​គណបក្ស​ប្រជាជន​កម្ពុជា ​ឆ្នាំ​ ២០២៣ ​ដល់​ ២០២៨ ខណៈ​លោក​បាន​ស្នើ​ឲ្យ​កងទ័ព​ចិន​ជួយ​ដោះ​មីន។​

ក្នុង​ពិធី​បើក​ការដ្ឋាន​សាងសង់​ផ្លូវ​មួយ​ លោក ​ហ៊ុន សែន​ បាន​ជំរុញ​ឲ្យ​កង​ទ័ព​ប្រទេស​ចិន​ដោះ​គ្រាប់​មីន​ដែល​លោក​ថា​ នៅ​សល់​ប្រមាណ​ ៥%​ លើ​ផ្ទៃ​ដី​ប្រទេស។​

នៅ​ចំពោះ​មុខ​ឯកអគ្គ​រដ្ឋ​ទូត​នៃ​សាធារណ​រដ្ឋ​ប្រជា​មានិត​ចិន​ លោក ​វ៉ាង វិនធៀន ​នៅ​ក្នុង​ពិធី​សម្ពោធ​ផ្លូវ​លេខ​ ៤១ លោក​ ហ៊ុន សែន​ បាន​ថ្លែង​ថា​ ពលរដ្ឋ​នឹង​ទទួល​បាន​ដី​ប្រកប​ដោយ​សុវត្ថិភាព​ នៅ​ក្រោយ​ការ​បោស​សម្អាត​មីន​ក្នុង​ប្រទេស​កម្ពុជា។​

លោក​លើក​ឡើង​ថា៖​ «ឥឡូវ​កន្លែង​ដែល​ធ្លាប់​ច្បាំង​រាំង​ជល់​ទាំង​ប៉ុន្មាន​គឺ​ថា​ ក្លាយ​ទៅ​ជា​តំបន់​ទេសចរណ៍។ ហើយ​ខ្ញុំ​កំពុង​តែ​ពន្លឿន​នៃ​ការ​រុញ​ដោះ​មីន​ដែល​នៅ​សេស​សល់​ ដែល​នៅ​សេស​សល់ សូម្បី​តែ​ជួប​ជាមួយ​រដ្ឋ​មន្ត្រី​ការពារ​ជាតិ​របស់​ចិន​ ក្រៅ​ពី​ជំនួយ​រដ្ឋាភិបាល​ចិន​ដែល​បាន​ដោះ​មីន​ ខ្ញុំ​សុំ​ស្នើ​ឲ្យ​កងទ័ព​ចិន​ ជួយ​មក​ដល់​កងទ័ព​កម្ពុជា​ដើម្បី​បំផ្លាញ​ចោល​គ្រាប់​មីន​ ធ្វើ​ម៉េច​ឲ្យ​អស់​មីន​នៅ​ក្នុង​ឆ្នាំ​ ២០២៥ ​ខាង​មុខ​នេះ​ ដើម្បី​បញ្ចៀស​គ្រោះ​ថ្នាក់​សម្រាប់​ប្រជាជន​យើង​ផង​ និង​ដើម្បី​ផ្តល់​ដី​ដោយ​សុវត្ថិភាព​សម្រាប់​ប្រជាជន​របស់​យើង​បង្ក​បង្កើន​ផល»។

លោក​បន្ថែម​ថា៖ «ថ្ងៃ​មុន​គណបក្ស​ប្រជាជន​ … អចិន្ត្រៃយ៍​គណបក្ស​ប្រជាជន​រៀបចំ​យុទ្ធសាស្ត្រ​ក្នុង​ហ្នឹង​យើង​ដាក់​ចេញ​នូវ​យុទ្ធសាស្ត្រ​មួយ​ គឺ​បំផ្លាញ​ចោល​គ្រាប់​មីន​ឲ្យ​បាន​នៅ​ក្នុង​ឆ្នាំ​ ២០២៥​ ដែល​ជា​យុទ្ធសាស្ត្រ​សម្រាប់​ការ​ដឹកនាំ​ប្រទេស​ សម្រាប់​ឆ្នាំ​ ២០២៣-២០២៨​ ដែល​នៅ​ក្នុង​ខែ​មករា​នេះ​ គណបក្ស​ប្រជាជន​នឹង​បើក​មហា​សន្និបាត​ដើម្បី​អនុម័ត​លើ​គោល​នយោ​បាយ​ មាគ៌ា​គោល​នយោបាយ​របស់​ខ្លួន​សម្រាប់​អាណត្តិ បន្ត»។

វីអូអេ​ព្យាយាម​សុំ​ការ​អត្ថាធិប្បាយ​ពី​ស្ថានទូត​ប្រទេស​ចិន​ប្រចាំ​នៅ​រាជធានី​ភ្នំពេញ តែ​គ្មាន​ការ​ឆ្លើយ​តប​សំណួរ​ដែល​ផ្ញើ​តាម​សារអេឡិច​ត្រូនិក​អ៊ីមែល​ទេ ​គិត​ត្រឹម​រសៀល​ថ្ងៃ​អង្គារ​នេះ។​

រូបឯកសារ៖ លោក​នាយករដ្ឋមន្ត្រី​ ហ៊ុន សែន ថ្លែង​សុន្ទរកថាក្នុង​សន្និសីទ​សារព័ត៌មាន​មួយ​នៅ​ក្នុង​ពិធី​បិទ​កិច្ចប្រជុំ​កំពូល​អាស៊ាន​លើក​ទី ៤០ និង​ទី៤១ នៅ​រាជធានី​ភ្នំពេញ ថ្ងៃទី ១៣ ខែវិច្ឆិកា ឆ្នាំ២០២២។
រូបឯកសារ៖ លោក​នាយករដ្ឋមន្ត្រី​ ហ៊ុន សែន ថ្លែង​សុន្ទរកថាក្នុង​សន្និសីទ​សារព័ត៌មាន​មួយ​នៅ​ក្នុង​ពិធី​បិទ​កិច្ចប្រជុំ​កំពូល​អាស៊ាន​លើក​ទី ៤០ និង​ទី៤១ នៅ​រាជធានី​ភ្នំពេញ ថ្ងៃទី ១៣ ខែវិច្ឆិកា ឆ្នាំ២០២២។

អ្នក​នាំពាក្យ​គណបក្ស​ប្រជាជន​កម្ពុជា​ លោក ​សុខ ឥសាន​ ថ្លែង​ថា​ ការ​ប្រកាស​ដោះ​មីន​ឲ្យ​អស់​ពី​ផ្ទៃ​ប្រទេស​ដោយ​លោក​នាយក​រដ្ឋមន្ត្រី​ ហ៊ុន សែន​ គឺ​ជា​គោល​នយោបាយ​ដែល​គណបក្ស​កាន់​អំណាច​ចង់​សម្រេច​ឲ្យ​បាន​ នៅ​ពេល​គណបក្ស​ឈ្នះ​ឆោ្នត​ទៀត។​

លោក​ប្រាប់​វីអូអេ​នៅ​ថ្ងៃ​អង្គារ​នេះ​ថា៖​ «អា​នេះ​ជា​គោល​នយោបាយ​របស់​គណបក្ស​ប្រជាជន​កម្ពុជា។ បើ​ថ្ងៃ​ក្រោយ​ទៅ​ គណបក្ស​មិន​ឈ្នះ​ឆ្នោត អាហ្នឹង​គណបក្ស​គេ​ចង់​ផ្តាច់​គោល​ការណ៍​ហ្នឹង​ អាហ្នឹង​ស្រេច​លើ​គេ​ទៅ!​ ក៏​ប៉ុន្តែ​ក្នុង​នាម​គណបក្ស​ប្រជាជន​កម្ពុជា​ គឺ​នៅ​ពេល​ណា​ ដែល​គណបក្ស​ប្រជាជន​ជាប់​ឆ្នោត​ត​ទៅ​អាហ្នឹង​គណបក្ស​ប្រជាជន​សម្រេច​ផែនការ​ដើម្បី​ជម្រះ​មីន​ហ្នឹង​ឲ្យ​អស់​ឆ្នាំ​ ២០២៥ ​ហ្នឹង។ ​អាហ្នឹង​ជា​គោលការណ៍​របស់​យើង​ទេ។​ យើង​មិន​ចាប់​បង្ខំ​គណបក្ស​ណា​ឲ្យ​ធ្វើ​តាម​យើង​ទេ»។​

កាល​ពី​កន្លង​ទៅ​ លោក​នាយក​រដ្ឋ​មន្ត្រី ​ហ៊ុន សែន​ បាន​ប្រកាស​កៀរ​គរ​ជំនួយ​ថវិកា​ពី​សប្បុរស​ជន​ដើម្បី​សម្រេច​គោល​ដៅ​នៃ​ការ​សម្អាត​មីន​ឲ្យ​អស់​ត្រឹម​ឆ្នាំ​ ២០២៥​ នៅ​លើ​ផ្ទៃ​ដី​នៅ​សេស​សល់​មីន​ប្រមាណ​ជាង​ ៧០០​ គីឡូ​ម៉ែត្រ​ក្រឡា​ទៀត។​

ការ​ចំណាយ​ថវិកា​មាន​ប្រមាណ​ជាង​ ១០០​ លាន​ដុល្លារ​អាមេរិក​ទៀត​សម្រាប់​រយៈ​ពេល​បី​ឆ្នាំ​ខាង​មុខ។ ​ នេះ​បើ​តាម​លោក ​លី ធុជ ​អនុ​ប្រធាន​ទី​ ១ ​របស់​អាជ្ញាធរ​មីន ​ដែល​បាន​ថ្លែង​កាល​ពី​ខែ​កក្កដា​ ឆ្នាំ​ ២០២២។​

ប្រទេស​មួយ​ចំនួន​បាន​ផ្តល់​ថវិកា​ដល់​រដ្ឋាភិបាល​កម្ពុជា​ក្នុង​កិច្ចការ​ដោះ​មីន​នេះ។​ សហ​រដ្ឋ​អាមេរិក​បាន​ចំណាយ​ថវិកា​ចំនួន​ជាង​ ១៣០​ លាន​ដុល្លារ​មក​ហើយ ​នៅ​ក្នុង​រយៈ​ពេល​២​ទសវត្សរ៍​កន្លង​ទៅ​នេះ​ ដើម្បី​រក​មើល​ និង​ដោះ​ចេញ​ ​ មីន​ យុទ្ធភណ្ឌ​មិន​ទាន់​ផ្ទុះ​នៅ​ក្នុង​ប្រទេស​កម្ពុជា។ ប៉ុន្តែ​កាល​ពី​ឆ្នាំ​ ២០១៧​ សហ​រដ្ឋ​អាមេរិក​បាន​បញ្ចប់​ជំនួយ​សម្រាប់​ប្រតិបត្តិ​ការ​ដោះ​មីន​នៅ​កម្ពុជា​ទៅ​ឱ្យ​មជ្ឈ​មណ្ឌល​សកម្ម​ភាព​កម្ចាត់​មីន​កម្ពុជា ​(CMAC) ​ដែល​ជា​ស្ថាប័ន​របស់​រដ្ឋាភិបាល​កម្ពុជា។​

ការ​ប្រកាស​កាត់​ផ្តាច់​ជំនួយ​នេះ​ ធ្វើ​ឡើង​នៅ​ចំ​ពេល​មាន​ការ​ប្រើ​ប្រាស់​វោហារ​សាស្ត្រ​នយោបាយ​ ប្រឆាំង​នឹង​សហ​រដ្ឋ​អាមេរិក​ថា​អាមេរិក​នៅ​ពី​ក្រោយ​គណបក្ស​សង្គ្រោះ​ជាតិ ​ក្នុង​ការ​រៀប​គម្រោង​ផ្តួល​រំលំ​រដ្ឋាភិបាល​របស់​លោក ហ៊ុន សែន។​

នាយក​ទទួល​បន្ទុក​កិច្ច​ការ​ទូទៅ​នៃ​អង្គការ​សិទ្ធិ​មនុស្ស​លីកាដូ ​លោក​ អំ សំអាត​ សាទរ​នឹង​ការ​ប្តេជ្ញា​របស់​គណ​បក្ស​កាន់​អំណាច​ និង​រដ្ឋាភិបាល​ក្នុង​ការ​បោស​សម្អាត​មីន​ឲ្យ​អស់​នៅ​កម្ពុជា តែ​លោក​ថា​ រដ្ឋាភិបាល​គួរ​មាន​គោល​ដៅ​ជាក់លាក់​មួយ​ផ្សេង​ទៀត​ក្នុង​ការ​ដោះ​ស្រាយ​ជម្លោះ​ដីធ្លី​ដែល​នៅ​បន្ត​កើត​មាន​ផង​ដែរ។​

លោក​ថ្លែង​ថា៖​ «ទន្ទឹម​ហ្នឹង​សាទរ​ជាមួយ​នឹង​អា​ការ​បញ្ចប់​ដី​សុវត្ថិភាព​ដោយ​គ្មាន​មីន​ គួរ​តែ​មាន​ការ​ពន្លឿន​ក្នុង​ការ​ដោះស្រាយ​បញ្ហា​ដីធ្លី​ដែល​បន្ត​មាន​ចំពោះ​ប្រជា​ពលរដ្ឋ​ ឬ​ក៏​ដោះស្រាយ​មិន​ទាន់​ចប់​ហ្នឹង​ ដើម្បី​ឲ្យ​ប្រជា​ពលរដ្ឋ​ទទួល​បាន​ដីធ្លី​ទាំង​អស់​ហ្នឹង​បង្ក​បង្កើន​ផល​ ដើម្បី​ជីវភាព​គ្រួសារ​ ហើយ​ក៏​ជា​ការ​ទទួល​បាន​តាម​គោលនយោបាយ​របស់​រាជ​រដ្ឋាភិបាល​ គឺ​ការ​កាត់​បន្ថយ​ភាព​ក្រីក្រ​សម្រាប់​ប្រជា​ពលរដ្ឋ។ បើ​សិន​ពលរដ្ឋ​ទទួល​បាន​ដី​ បាន​ធ្លី​ ហើយ​មិន​មាន​បញ្ហា​ដីធ្លី​ទេ វា​ជា​រឿង​សុវត្ថិភាព​មួយ​សម្រាប់​បង្ក​បង្កើន​ផល​ក្នុង​ការ​លើក​កម្ពស់​ជីវភាព​រស់​នៅ​របស់​ប្រជា​ពលដ្ឋ​ផង​ដែរ»។​

ក្នុង​ពិធី​បើក​ការដ្ឋាន​សាង​សង់​លើ​កម្រិត​គុណ​ភាព​ផ្លូវ​ជាតិ​លេខ​ ៤១​ ដែល​ធ្វើ​ឡើង​ក្នុង​ខេត្ត​កំពង់ស្ពឺ​ កាលពី​ថ្ងៃ​ចន្ទ​នោះ លោក​នាយក​រដ្ឋ​មន្ត្រី​ ហ៊ុន សែន​ លើក​ឡើង​ទៀត​ថា​បើ​គណបក្ស​ប្រជាជន​កម្ពុជា​នៅ​កាន់​អំណាច​ សន្តិភាព​នៅ​តែ​មាន​ និង​ថា ប្រជា​ពលរដ្ឋ​ខ្មែរ​បច្ចុប្បន្ន​ កំពុង​មាន​សិទ្ធិ​សេរីភាព​ហៀរ​ហូរ​ មិន​ដូច​ការ​រិះគន់​ពី​អ្នក​នយោបាយ​ជំទាស់​មួយ​ចំនួន​នោះ​ឡើយ៕​

XS
SM
MD
LG