លោកនាយករដ្ឋមន្រ្តី ហ៊ុន ម៉ាណែត ត្រូវបានជ្រើសតាំងជាអនុប្រធានគណបក្សប្រជាជនកម្ពុជា ខណៈមន្រ្តីជាន់ខ្ពស់ចំនួន ៤៩៦ រូបទៀត ត្រូវបានបញ្ចូលជាសមាជិកគណៈកម្មាធិការកណ្តាលនៃគណបក្សកាន់អំណាច។
ការជ្រើសតាំងនេះធ្វើឡើងនៅក្នុងមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា កាលពីថ្ងៃទី៩ និងថ្ងៃទី១០ ខែធ្នូ ឆ្នាំ២០២៣ នៅវិមាន៧មករា ស្នាក់ការកណ្តាលរបស់គណបក្សប្រជាជនកម្ពុជា។
ការបញ្ចូលសមាជិកគណៈកម្មាធិការកណ្តាលបន្ថែមជិត ៥០០រូបនេះ ធ្វើឱ្យបរិមាណសមាជិកគណៈកម្មាធិការកណ្តាលសរុបមានចំនួន ១.៣១២រូប។
ក្នុងបទសម្ភាសន៍ជាមួយវីអូអេនៅថ្ងៃចន្ទ លោក សុខ ឥសាន អ្នកនាំពាក្យគណបក្សប្រជាជនកម្ពុជា លើកឡើងថា ការជ្រើសតាំងបន្ថែមសមាជិកគណៈកម្មាធិការកណ្តាលនេះ មានភាពចាំបាច់ ដើម្បីពង្រឹងក្បាលម៉ាស៊ីនដឹកនាំរបស់គណបក្ស ខណៈសមាជិកសរុបរបស់គណបក្សមានប្រមាណ៧លាន១សែននាក់នៅទូទាំងប្រទេស។
លោកបញ្ជាក់ថា៖ «អ៊ីចឹងទេគឺត្រូវតែរៀបរចនាសម្ពន្ធឱ្យស្របទៅតាមទំហំនៃការរីកចម្រើនរបស់គណបក្សប្រជាជនកម្ពុជា។ មិនជារឿងចម្លែកអីទេ អានេះវាជាសំណូមពរត្រូវការចាំបាច់នៃការអនុវត្តភារកិច្ចនយោបាយរបស់គណបក្ស ដើម្បីដណ្តើមជ័យជម្នះនាពេលខាងមុខឱ្យកាន់តែខ្លាំងក្លាបន្ថែមទៀត»។
បើតាមអ្នកនាំពាក្យរូបនេះ តួនាទីរបស់សមាជិកគណៈកម្មាធិការកណ្តាលគឺដើម្បីដឹកនាំនិងបញ្ជ្រាបគោលនយោបាយរបស់គណបក្សនៅតាមមូលដ្ឋាន។
លោក សុខ ឥសាន បន្ថែមថា រាល់ការសម្រេចចិត្តជ្រើសតាំងលោក ហ៊ុន ម៉ាណែត ដែលទើបកាន់អំណាចជានាយករដ្ឋមន្រ្តីបានជាង៣ខែ ជាអនុប្រធានគណបក្ស គឺជាការសម្រេចរបស់គណបក្សប្រជាជនកម្ពុជា។
លោកថ្លែងថា៖ «អាបញ្ហាផ្ទៃក្នុងហ្នឹង ពួកអ្នកវិភាគក៏ដោយ ពួកអ្នកប្រព័ន្ធផ្សព្វផ្សាយអគតិមួយចំនួនក៏ចេះតែប៉ាន់ស្មាន មានយល់ដឹងពីផ្ទៃក្នុងរបស់គណបក្សប្រជាជនកម្ពុជាឯណា? រឿងផ្ទៃក្នុងរបស់គណបក្សប្រជាជនជាការសម្រេចរបស់គណបក្សប្រជាជន មិនអាស្រ័យទៅលើអ្នកថាពីខាងក្រៅទេ»។
គណបក្សប្រជាជនកម្ពុជាមានអនុប្រធានសរុបចំនួន ៥រូប រួមមានលោក ស ខេង លោក សាយ ឈុំ លោក ទៀ បាញ់ អ្នកស្រី ម៉ែន សំអន និងលោក ហ៊ុន ម៉ាណែត។
អ្នកនយោបាយ អតីតអ្នកកាសែតមួយចំនួនដែលបានចូលរួមជីវភាពនយោបាយជាមួយគណបក្សកាន់អំណាច ក៏ត្រូវបានជ្រើសតាំងជាសមាជិកគណៈកម្មាធិការកណ្តាលផងដែរ មានដូចជាលោក យ៉ង សាំងកុមារ លោក សាម អ៊ីន អតីតអ្នកនយោបាយជំទាស់មកពីគណបក្សប្រជាធិបតេយ្យមូលដ្ឋាន លោក តាន់ ហ្សង់ហ្រ្វង់ស័រ និងលោក ប៉ែន បូណា អតីតអ្នកកាសែតជាដើម។
អ្នកវិភាគនយោបាយ លោក សេង សារី ប្រាប់វីអូអេថា អតីតនាយករដ្ឋមន្ត្រីលោក ហ៊ុន សែន ដែលជាប្រធានគណបក្សប្រជាជនកម្ពុជាប្រញាប់ប្រញាល់នៅក្នុងការជ្រើសតាំងលោក ហ៊ុន ម៉ាណែត ដែលជាកូនប្រុសច្បងរបស់លោកឱ្យមានតួនាទីខ្ពស់នៅក្នុងជួរគណបក្ស។
លោកបញ្ជាក់ថា៖ «ដូច្នេះហើយខ្ញុំមើលទៅទាំងនៅក្នុងបក្សទាំងនៅក្នុងរដ្ឋាភិបាល គ្រួសារត្រកូលហ៊ុននេះ អាចក្តោបក្តាប់ទាំងស្រុង ជាពិសេសការក្តោបក្តាប់អំណាចទាំងនៅក្នុងបក្សនិងការក្តោបក្តាប់អំណាចនៅក្នុងរដ្ឋាភិបាល»។
នៅក្នុងសន្និបាតវិសាមញ្ញកាលពីចុងសប្តាហ៍ មន្រ្តីជាន់ខ្ពស់នៃគណបក្សចំនួន ២៣រូបទៀតក៏ត្រូវបានជ្រើសតាំងជាសមាជិកអចិន្រ្តៃយ៍នៃគណៈកម្មាធិការកណ្តាលផងដែរ ដែលនាំឱ្យចំនួនសមាជិកអចិន្រ្តៃយ៍មានទៅដល់ប្រមាណ ៦០រូប។ មន្រ្តីទាំងនោះមានដូចជាលោក ស៊ុន ចាន់ថុល អតីតរដ្ឋមន្រ្តីក្រសួងសាធារណការ និងដឹកជញ្ជូន លោក សាយ សំអាល់ រដ្ឋមន្រ្តីក្រសួងដែនដី លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ លោក ទៀ សីហា រដ្ឋមន្រ្តីក្រសួងការពារជាតិ និងលោក ស សុខា រដ្ឋមន្រ្តីក្រសួងមហាផ្ទៃជាដើម។
បើតាមសេចក្តីសម្រេចនៃមហាសន្និបាតវិសាមញ្ញ គណបក្សប្រជាជនកម្ពុជាក៏បានប្តេជ្ញាការពាររបបរាជានិយមអាស្រ័យរដ្ឋធម្មនុញ្ញ បន្តពង្រឹងលទ្ធិប្រជាធិបតេយ្យសេរី ពហុបក្ស និងលើកកម្ពស់ការរគោពសិទ្ធិមនុស្សតាមគន្លងនីតិរដ្ឋ៕
