ក្រោយពីបានដាក់លិខិតទៅសាលារាជធានីដើម្បីជូនដំណឹងអំពីការជួបប្រជុំទ្រង់ទ្រាយធំរបស់គណបក្សសង្គ្រោះជាតិនៅថ្ងៃដែលលោកកឹម សុខា ត្រូវចូលសវនាការនោះ នារសៀលថ្ងៃពុធម្សិលមិញនេះ សាលារាជធានីបានសម្រេចអនុញ្ញាតឲ្យគណបក្សនេះជួបជុំតាមការស្នើ ប៉ុន្តែការជួបជុំនេះត្រូវគោរពតាមលក្ខខណ្ឌ ទើបអាចធានាថា អាចនឹងប្រព្រឹត្តទៅដោយរលូន។
គណបក្សប្រឆាំងនឹងជួបប្រជុំសមាជិក និងអ្នកគាំទ្ររបស់ខ្លួនជាង១ពាន់នាក់នៅទីស្នាក់ការគណបក្សនៅថ្ងៃសុក្រខាងមុខនេះ គឺចំថ្ងៃដែលលោកកឹម សុខាត្រូវចូលសវនាការនៅតុលាការភ្នំពេញ។
នារសៀលថ្ងៃពុធ ទី៧ ខែកញ្ញានេះ តំណាងគណបក្សប្រឆាំង និងមន្រ្តីសាលារាជធានីភ្នំពេញបានជួបប្រជុំគ្នាដើម្បីពិភាក្សាលើការជូនដំណឹងអំពីការរៀបចំពិធីជួបសំណេះសំណាលរវាងថ្នាក់ដឹកនាំគណបក្សសង្គ្រោះជាតិ ជាមួយរចនាសម្ព័ន្ធ និងមហាជនរាប់រយនាក់ នៅទីស្នាក់ការកណ្តាលគណបក្សនៅសង្កាត់ចាក់អង្រែលើ។
លោកម៉ន ផល្លា ប្រធានគណៈកម្មាធិការប្រតិបត្តិគណបក្សសង្គ្រោះជាតិរាជធានីភ្នំពេញ ដែលបានចូលរួមប្រជុំ បានប្រាប់ VOA ថា សាលារាជធានីភ្នំពេញបានអនុញ្ញាតឲ្យគណបក្សសង្គ្រោះជាតិជួបជុំតាមការស្នើសុំ។ លោកថ្លែងថា សាលារាជធានីបានដាក់លក្ខខណ្ឌចំនួន២ មុននឹងអនុញ្ញាត។ ទី១គឺការជួបជុំមិនត្រូវធ្វើឲ្យមានការកកស្ទះ និងទី២ មិនត្រូវមានការជេរប្រមាថមន្រ្តីដែលនឹងចុះបំពេញការងារក្នុងការរៀបចំសណ្តាប់ធ្នាប់។
លោកបន្ថែមថា សមាជិក និងអ្នកគាំទ្រគណបក្សសង្គ្រោះជាតិជាង១ពាន់នាក់គ្រោងនឹងជួបជុំគ្នា នៅព្រឹកថ្ងៃទី៩ ខែកញ្ញានេះ ដើម្បីផ្តល់ព័ត៌មានអំពីការវិវត្តនៃស្ថានការណ៍នយោបាយ ផ្សព្វផ្សាយអំពីការចុះឈ្មោះបោះឆ្នោត ជាពិសេសដើម្បីឲ្យអ្នកចូលរួមអាចឃ្លាំមើលចំណាត់ការរបស់តុលាការលើការកាត់ក្តីលោកកឹម សុខា ដែលជាប្រធានស្តីទីគណបក្សសង្គ្រោះជាតិ។ លោកបញ្ជាក់ថា គណបក្សសង្គ្រោះជាតិនឹងធានាពីការសហការរបស់អ្នកចូលរួមដើម្បីការពារសន្តិសុខក្នុងការជួបជុំនោះ។
លោកបញ្ជាក់ថា៖
«យើងបានស្នើសុំឲ្យមានការជួយសហការផងដែរ អញ្ចឹងដោយសារផ្លូវវាតូចចង្អៀត ហើយអ្នកធ្វើដំណើរច្រើន ក៏ដូចជាអ្នកចូលរួមច្រើន ដូច្នោះវានឹងមានការកកស្ទះបន្តិចបន្តួច។ ក៏ប៉ុន្តែវាមិនបណ្តាលឲ្យជាប់គាំងជិតឈឹងតែម្តងទេ។ យើងនឹងព្យាយាមធ្វើយ៉ាងណាឲ្យការរៀបចំពិធីនេះមានដំណើរការល្អ បូករួមនឹងអាចឲ្យប្រជាពលរដ្ឋធ្វើដំណើរផងដែរ»។
លោកមាន ចាន់យ៉ាដា អ្នកនាំពាក្យសាលារាជធានីភ្នំពេញ មានប្រសាសន៍ថា គណបក្សសង្គ្រោះជាតិត្រូវជួបជុំត្រឹមបរិវេណស្នាក់ការគណបក្ស ដោយមិនត្រូវយកចិញ្ចើមផ្លូវ និងផ្លូវធ្វើជាកន្លែងឈរជួបជុំ និងមិនត្រូវប្រើសម្តីប្រមាថសន្តិសុខដែលនឹងចុះបំពេញការងារឃ្លាំមើលសន្តិសុខ។ លោកបន្ថែមថា ប្រសិនជាការជួបជុំនោះខុសពីការសន្យា អាជ្ញាធរនឹងចាត់វិធានការរដ្ឋបាល និងវិធានការច្បាប់។
លោកបញ្ជាក់ថា៖
«ចំនួនប៉ុន្មានចំនួនចុះ ក៏ប៉ុន្តែកុំឲ្យប៉ះពាល់ចិញ្ចើមផ្លូវ ហើយនិងផ្លូវជាសាធារណៈដែលរំខានប្រជាពលរដ្ឋដែលធ្វើដំណើរឆ្លងកាត់ផ្លូវហ្នឹង»។
លោកអំ សំអាត អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សអង្គការលីកាដូ ប្រាប់ថា ច្បាប់មិនបានកំណត់អំពីចំនួនមនុស្សក្នុងការជួបជុំរបស់គណបក្សណាមួយនៅទីស្នាក់ការឯកជននោះទេ ប៉ុន្តែលោកបន្តថា គណបក្សនយោបាយត្រូវចៀសវាងការជួបជុំដែលបណ្តាលឲ្យមានការកកស្ទះចរាចរណ៍ដល់អ្នកដទៃ។ លោកបន្ថែមថា អាជ្ញាធរមានសមត្ថកិច្ចត្រូវត្រៀមដើម្បីការពារការជួបជុំ និងសម្រួលចរាចរណ៍ នៅពេលដែលការជួបជុំនោះបានជូនដំណឹងត្រឹមត្រូវ។
លោកមានប្រសាសន៍ថា៖
«អ្វីដែលជាការកកស្ទះចរាចរណ៍ខ្លាំងមែនទែននោះ វាមិនមែនលើការជួបជុំហ្នឹងទេ។ កន្លងមកការកកស្ទះចរាចរណ៍គឺមកពីការបិទផ្លូវទាំងមូលតែម្តងរបស់អាជ្ញាធរ។ អាហ្នឹងដែលយើងឃើញថា ជាការកកស្ទះ ដូចជាថ្ងៃទី៥អីហ្នឹង»។
នៅថ្ងៃទី៩ ខែកញ្ញាខាងមុខនេះ សាលាដំបូងរាជធានីនឹងបើកសវនាការជំនុំជម្រះក្តីលើលោកកឹម សុខា ប្រធានស្តីទីគណបក្សសង្គ្រោះជាតិពីបទ«មិនព្រមចូលខ្លួនតាមដីកាកោះហៅរបស់តុលាការ» ដោយគ្មានមូលហេតុត្រឹមត្រូវ។ តុលាការបានកោះហៅលោកកឹម សុខាពាក់ព័ន្ធនឹងបណ្តឹងរបស់នាងខុម ចាន់តារ៉ាទី ហៅស្រីមុំពីបទសញ្ចារកម្ម។
កាលពីថ្ងៃទី៥ ខែកញ្ញា រដ្ឋាភិបាលបានដាក់ពង្រាយកម្លាំងសមត្ថកិច្ចរាប់រយនាក់ និងដាក់របាំងបិទផ្លូវការហែញត្តិរបស់គណបក្សជំទាស់ទៅកាន់ស្ថានទូតនៃប្រទេសហត្ថលេខីសន្ធិសញ្ញាទីក្រុងប៉ារីស សុំឲ្យជួយការពារសិទ្ធិមនុស្ស និងលទ្ធិប្រជាធិបតេយ្យនៅកម្ពុជា៕
