ភ្ជាប់​ទៅ​គេហទំព័រ​ទាក់ទង

តុលាការ​ភ្នំពេញ​កាត់​ទោស​សកម្មជន​ដីធ្លី​បី​នាក់​ទៀត​ឲ្យ​ជាប់​ពន្ធនាគារ​ម្នាក់ៗ​មួយ​ឆ្នាំ

  • គង់ សុឋានរិទ្ធ

ជនរងគ្រោះ​ទំនាស់​​ដីធ្លី​ក្រុង​​ភ្នំពេញ​​បាតុកម្ម​​នៅ​​តុលាការ​​សាលាក្រុង​​ភ្នំពេញ​​​ ទាមទារ​យុត្តិធម៌​

ស្ត្រី​សកម្មជន​ដី​ធ្លី​និង​ជា​អ្នក​រង​គ្រោះ​ដោយ​សារ​ជម្លោះ​ដី​ធ្លីក្នុ​ងទី​ក្រុង​ភ្នំពេញ​ពីរ​នាក់​មក​ពី​សហគមន៍​បឹងកក់​ និង​ម្នាក់​ទៀត​មក​ពី​សហគមន៍​ថ្មគោល​ក្បែរ​ព្រលាន​យន្តហោះ​អន្តរជាតិ​ក្រុង​ភ្នំពេញ​ រួម​ទាំង​អតីត​ព្រះ​សង្ឃ​មួយ​អង្គ​ផង​ ត្រូវ​សាលា​ដំបូង​រាជធានី​ភ្នំពេញ​ផ្តន្ទា​ទោស​ឲ្យ​ជាប់​ពន្ធនាគារ​ក្នុង​ម្នាក់ៗ​ចំនួន​មួយ​ឆ្នាំ​និង​ពិន័យ​ជាប្រាក់​ចំនួន​ពីរ​លានរៀល។​

ស្ត្រី​ទាំង​បី​នាក់ ​រួម​មាន​អ្នកស្រី​ភួង សុភាព​ មក​ពី​សហគមន៍​ថ្មគោល​នៅ​ក្បែរ​ព្រលាន​យន្តហោះ​អន្តរ​ជាតិ​ក្រុង​ភ្នំពេញ​ និង​អ្នក​ស្រី​អ៊ឹម សុភាព ​និង​យេង ពេជ្រ​ មក​ពី​សហគមន៍​បឹងកក់។​ រីឯ​អតីត​ព្រះសង្ឃមាន​ឈ្មោះ​សឺន ហៃ​បាន​ស្ថិត​ក្នុង​សវនាការ​ដោយ​គ្មាន​ស្បែកជើង​ពាក់។​

ស្ត្រី​ទាំង​បី​នាក់​ត្រូវ​បញ្ជូន​ទៅ​ដាក់​ពន្ធនាគារ​ព្រៃ​ស។​ រីឯ​អតីត​ព្រះសង្ឃ​ត្រូវ​ឃុំ​ខ្លួន​នៅ​ក្រសួង​មហា​ផ្ទៃ។​

តុលាការ​បាន​ចោទ​ប្រកាន់​ពួក​គេពី​បទបង្ក​ការ​រំខាន​កិច្ច​ការ​មន្ត្រី​សាធារណៈ​តាម​មាត្រា​ទី​៥០៤​នៃ​ក្រម​ព្រហ្មទណ្ឌ។​

នៅ​ក្នុង​បន្ទប់​សវនាការ ​លោក​ចៅ​ក្រម​យី ឆៃ​បាន​សន្និដ្ឋាន​ថា៖​ «មាន​ធាតុផ្សំ​និង​ភស្តុតាង​គ្រប់​គ្រាន់​ដែល​បញ្ជាក់​ថា ​ជន​ជាប់​ចោទ​ទាំង​បួន​បាន​បង្ក​ការ​ប្រឆាំង​នឹង​រាជការ​សាធារណៈ» ​ដែល​ប្រព្រឹត្តនៅ​មុខ​សាលា​ដំបូង​រាជ​ធានី​ភ្នំពេញ​កាល​ពី​ថ្ងៃ​អង្គារ​ម្សិល​មិញ​នេះ។​

កាល​ពី​ថ្ងៃ​អង្គារ​ម្សិល​មិញ​ដែរ​ ក្រុម​ប្រជាពល​រដ្ឋ​រង​គ្រោះ​ដោយ​សារ​ជម្លោះ​ដី​ធ្លី​នៅ​សហគមន៍​បឹងកក់​ និង​សហគមន៍​ថ្មគោល​រួម​ទាំង​សហគមន៍ផ្សេង​ទៀត​ បាន​ប្រមូល​ផ្តុំ​គ្នា​តវ៉ា​នៅ​ពីមុខតុលាការ​ក្រុង​ភ្នំពេញ​ដើម្បី​ទាមទារ​ឲ្យ​ដោះ​លែងជន​រង​គ្រោះ​ចំនួន​ប្រាំ​ពីរ​នាក់​ផ្សេង​ទៀត​ដែល​តុលាការ​ធ្វើ​ការចោទ​ប្រកាន់​ និង​កាត់​ទោស។​ អ្នក​ទាំង​ប្រាំពីរ​នាក់​នោះ​មាន​អ្នក​ស្រី​ទេព វន្នី​ ម្ចាស់​ពាន​រង្វាន់​ Vital Voices​ Global Partnership ​នៅ​សហ​រដ្ឋ​អាមេរិក​ផង​ដែរ។​

ស្ត្រី​ទាំង​បី​នាក់ក្រោយ​ពី​ប្រកាស​សាល​ក្រម​នៅវេលា​ម៉ោង​៧​យប់​នេះ​ បាន​ស្រែក​ភ្លាមៗ​ថា ​ការ​ដាក់​ទោស​មក​លើ​ខ្លួន​មិន​មាន​យុត្តិធម៌​ទេ។​

ក្រុម​មេធាវី​ ដែល​មាន​គ្នា​សរុប​ចំនួន​ប្រាំ​នាក់​ បាន​សន្និដ្ឋាន​ថា ​តុលាការ​មិន​មាន​ភស្តុតាង​ពិត​ប្រាកដ​ក្នុ​ងការ​ដាក់​ទោស​លើ​កូន​ក្តី​របស់​ខ្លួន​ទេ។​

មាន​សាក្សី​ដែល​ជា​ភ្នាក់​ងារ​ចារកម្ម​របស់​រដ្ឋា​ភិបាល​ និង​ជា​នគរបាល​ចរាចរ​បានដាក់​បន្ទុក​ថា​ ជនជាប់​ចោទ​ទាំង​បួន​បាន​បង្ក​ការរាំង​ស្ទះ​ដល់​កិច្ច​ការ​របស់​ពួក​ខ្លួន ​និង​ជន​ទាំង​បួន​នាក់​មាន​ភាព​ចចេស​រឹង​រូស​មិន​ស្តាប់​បង្គាប់​ការ​រៀប​ចំ​សណ្តាប់​ធ្នាប់ ​មិន​តែ​ប៉ុណ្ណោះ​ពួក​គេ​បាន​ជេរ​ប្រមាថ​លើ​ក្រុម​សមត្ថ​កិច្ច។​

ផ្ទុយ​ទៅវិញ​ ជនជាប់​ចោទ​បានឆ្លើយបក​ស្រាយ​ថា ​ពួក​ខ្លួន​មិន​បាន​ប្រព្រឹត្ត​ដូច​ការ​ចោទ​ប្រកាន់​នោះ​ឡើយ។​ ហើយ​ការ​តវ៉ា​របស់​ពួក​គេ​មិន​បាន​រំខាន​ដល់​ប្រតិបត្តិ​ការ​របស់​ក្រុម​សមត្ថ​កិច្ច​នោះ​ទេ។​

មាន​ការ​បង្ហាញ​ឈុត​វីដេអូខ្លី​មួយ​ដែល​ជា​ភស្តុតាង​ផ្តល់​ដោយ​កង​សមត្ថ​កិច្ច។ ​នៅ​ក្នុ​ងឈុត​វីដេ​អូ​នេះ​បង្ហាញ​ពី​ក្រុម​សមត្ថកិច្ច ​និង​កង​សន្តិសុខ​ខណ្ឌ​៧​មករា​ដើរ​ស្វែង​រក និង​តាម​ចាប់​ក្រុម​ប្រជា​ពលរដ្ឋ​ចាប់​ញាត់​បញ្ចូល​រថយន្ត​របស់​ប៉ូលិស។​

​លោក​កុល​ វិបុល​ ជា​ព្រះ​រាជ​អាជ្ញា ចាត់​ទុក​ថា ​វីដេ​អូ​នេះ​ជា​ឈុត​សំខាន់​ដែល​បញ្ជាក់​ពី​ភស្តុតាង​ដែល​ថា​ ក្រុម​ប្រជា​ពលរដ្ឋ​ដែល​ត្រូវ​ចាប់​ខ្លួន​បាន​ប្រព្រឹត្ត​ល្មើស​ប្រឆាំង​រាជការ​សាធារណៈ។​ ប៉ុន្តែ​ក្រុម​មេធាវី​បាន​ជំទាស់។​

លោក​អំ សំអាត​អ្នក​គ្រប់​គ្រង​បច្ចេក​ទេស​ស៊ើប​អង្កេត​របស់​អង្គការ​ការពារ​សិទ្ធិ​មនុស្ស​លីកាដូ​អធិប្បាយ​ថា​ នេះ​ជា​ការ​សម្រេច​ចិត្ត​ដែល​មិន​មាន​យុត្តិធម៌។​

«ជា​រឿង​អយុត្តិ​ធម៌​ ពី​ព្រោះ​គ្មាន​ភស្តុតាង​ណាមួយ​ដែល​បញ្ជាក់​ថា ​អ្នក​ទាំង​បួន​នាក់​ប្រព្រឹត្ត​ដូច​ការ​ចោទ​ប្រកាន់​នោះ​ទេ។​ ផ្ទុយ​ទៅវិញ​នៅ​ក្នុង​រូបភាព​(វីដេអូ)​ យើង​ឃើញ​ថា​ ក្រុម​សមត្ថកិច្ច​ទៅ​វិញ​ទេ​ដែល​ប្រើ​ប្រាស់​អំពើ​ហិង្សា ​និង​រុញច្រាន​និង​ចាប់​ប្រជា​ពលរដ្ឋ។ ​ដូច្នេះ​ការ​ចាប់​ខ្លួន​នេះ​ជា​ចេតនា​មួយ​ក្នុង​ការ​បំបាក់​ស្មារតី​អ្នក​តវ៉ា​តែ​ប៉ុណ្ណោះ​ទេ»។​

ក្រុម​សកម្ម​ជន​ដី​ធ្លី​ និង​ជា​អ្នក​រង​គ្រោះ​ដោយ​សារ​ជម្លោះ​ដី​ធ្លី​ដទៃ​ទៀត​បាន​រង់​ចាំ​នៅ​តុលាការ​ក្រុង​ភ្នំ​ពេញរហូត​ដល់​ពេល​យប់។​

អ្នក​ខ្លះ​បាន​ស្រែកអំពី​អំពើ​អយុត្តិធម៌។​ រីឯ​អ្នក​ស្រី​យ៉ោម បុប្ផា ​សកម្ម​ជន​ដី​ធ្លី​ដ៏ល្បី​ល្បាញ​ម្នាក់​ទៀត ​បាន​ស្រែក​លើក​ទឹក​ចិត្ត​ដល់​ស្ត្រី​ដែល​ត្រូវ​ឃុំ​ខ្លួន​នៅ​ថ្ងៃ​នេះ៕

XS
SM
MD
LG