ភ្ជាប់​ទៅ​គេហទំព័រ​ទាក់ទង

តុលាការ​​មិន​ប្រកាស​សាលក្រម​​ករណី​ឃាតកម្ម​ពាក់​ព័ន្ធ​នឹង​លុយ​ជាច្រើន​ ដើម្បី​បន្ត​ការ​ស៊ើប​អង្កេត


រូបឯកសារ៖ សៀង វាសនា (កណ្តាល) ដែល​គេ​សង្ស័យ​ថា ជា​ជន​ដៃ​ដល់​នៅ​ក្នុង​អំពើ​ឃាតកម្ម​ទៅ​លើ​លោក​ឧកញ៉ា​អ៊ឹង ម៉េងជឺ។ (ផ្តល់​ឲ្យ​ដោយ​គ្រួសារ​ជន​រង​គ្រោះ)

សាលា​ដំបូង​រាជធានី​ភ្នំពេញ​ ​នៅ​ថ្ងៃ​ចន្ទ​នេះ​ ​បាន​សម្រេចមិន​ប្រកាស​សាលក្រម​ដើម្បី​បន្ត​ការ​ស៊ើប​អង្កេតក្នុង​សំណុំរឿងបាញ់​សម្លាប់​លោក​ឧកញ៉ា​ ​អ៊ឹង ម៉េងជឺ​ ​អតីត​ថៅកែ​ស៊ីម៉ងត៍​សញ្ញា​ត្បូង​ពេជ្រ។​

កាល​ពី​ខែ​វិច្ឆិកា ​ឆ្នាំ​២០១៤ ​លោក​ឧកញ៉ា​ ​អ៊ឹង ម៉េងជឺ​ ​ត្រូវ​បាន​ខ្មាន់​កាំភ្លើង​បាញ់​សម្លាប់​នៅ​នឹង​កន្លែង​ ​មុខ​ហាងលក់​ផ្លែឈើ​មួយ​ក្នុង​រាជធានីភ្នំពេញ។​ ​នៅ​ខែ​មករា​ ​ឆ្នាំ​២០១៧​ ​តុលាការបាន​បើក​សវនាការ​ជំនុំ​ជម្រះ​សំណុំ​រឿង​នេះ​ ​ដោយ​ចោទថា លោក​ ​ថោង សារ៉ាត់​ ​អតីត​ម្ចាស់​សំណង់​ ៩៩៩​ ជា​អ្នក​ផ្តើម​គំនិតនៃ​ការ​បាញ់​សម្លាប់នោះ។​ ​អង្គរក្ស​របស់​លោក​ ​ថោង សារ៉ាត់​ ​ចំនួន​បួន​នាក់ក៏​ត្រូវ​បាន​ចោទ​ប្រកាន់​ពី​បទ​សមគំនិត​ ​និង​បទ​ឃាតកម្ម​គិតទុក​ជាមុន​ ​ដែល​បទល្មើស​ទាំង​នេះ​កំណត់​ការ​ផ្តន្ទាទោស​ដាក់​ពន្ធនាគារ​អស់​មួយ​ជីវិត។​

រយៈពេល​ជាង​៦ខែ​ ​ក្រោយ​ការ​កំណត់​ប្រកាស​សាលក្រមកាល​ពី​ថ្ងៃ​ទី​៥​ ខែ​ឧសភា​ ​ឆ្នាំ​២០១៧​ តុលាការ​បានពន្យារ​ពេល​ប្រកាស​សាលក្រម​ជា​ច្រើន​លើក និង​បាន​សម្រេចកំណត់​ថ្ងៃ​ប្រកាស​សា​ជា​ថ្មី​ ​នៅ​ថ្ងៃ​ទី​១៣​ ខែ​វិច្ឆិកា​នេះ។​

ទោះ​ជា​យ៉ាង​ណា​ ​លោក​ តុប ឈុនហេង​ ​ប្រធាន​ក្រុម​ប្រឹក្សា​អង្គជំនុំ​ជម្រះ​សាលា​ដំបូង​រាជធានី​ភ្នំពេញ​ នា​រសៀល​ថ្ងៃ​ចន្ទ​នេះ​បាន​សម្រេច​មិន​ប្រកាស​សាលក្រម​ ​ដោយ​លើក​មូលហេតុ​ថា​ សំណុំ​រឿង​បាញ់​សម្លាប់​លោក​ឧកញ៉ា​ ​អ៊ឹង ម៉េងជឺ​ ​នៅ​ខ្វះ​សាក្សី​ ​និង​ភស្តុតាង​បន្ថែម​ ​ដូច្នេះ​ត្រូវ​បន្ត​នីតិវិធី​ស៊ើប​អង្កេត​ ​ឬ​ហៅ​ថា​ «សាលក្រម​ចាត់​របៀប»។​

លោក​ ​លី សុផាណា​ ​អ្នក​នាំពាក្យ​សាលា​ដំបូង​រាជធានី​ភ្នំពេញ​ ពន្យល់​អ្នក​សារ​ព័ត៌មាន​តាម​រយៈ​សារ​អេឡិច​ត្រូនិច ​តេលេក្រាម (Telegram) ​តាម​សម្រង់​ន័យ​ដើម​ថា៖​

«សាលក្រម​ចាត់​របៀប​ជា​សេចក្តី​សម្រេច​របស់​ចៅក្រម​ជំនុំ​ជម្រះ​ក្រោយ​ពី​បញ្ចប់​ការ​ពិភាក្សា​ដេញ​ដោល​ ​ការពិនិត្យ​ភស្តុតាង​នានា​ ​ក្នុង​អង្គ​សវនាការ។​ ​ក្រម​នីតិវិធី​ព្រហ្មទណ្ឌ​មិន​បាន​កំណត់​អំពី​រយៈ​ពេល​នៃ​ការប្រកាស​សាលក្រម​នោះ​ឡើយ ​ដោយ​អាស្រ័យ​ទៅ​តាម​សំណុំ​រឿង​នីមួយៗ​ដែល​ត្រូវ​ការ​ពេល​វេលា​សម្រាប់​ការ​ពិចារណា​ ​និង​សម្រេច​សេចក្តី​ឲ្យ​បាន​ត្រឹមត្រូវ​ ​ហើយ​ចៅក្រម​ជំនុំ​ជម្រះ​មាន​សិទ្ធិ​ក្នុង​ការ​សម្រេច​ចាត់​របៀប​ ​បើ​យល់​ឃើញ​ថា​ រឿង​ក្តី​នេះ​មិន​ទាន់​អាច​សម្រេច​សេចក្តី​បាន​នៅ​ឡើយ»។​

ក្រៅ​ពី​បទ​ល្មើស​ពាក់ព័ន្ធ​នឹង​ឃាតកម្ម​គិត​ទុកជាមុន​ ​ដែល​តុលាការ​ប្រកាស​បន្ត​ការ​ស៊ើបអង្កេត​នេះ​ តុលា​ការ​កាល​ពី​ខែ​មិថុនា​ ​ឆ្នាំ​២០១៦ ​បាន​សម្រេច​កាត់​ទោស​ឲ្យ​លោក​ថោង សារ៉ាត់ឲ្យ​ជាប់​ពន្ធនាគារ​ចំនួន​២ឆ្នាំ​ ​៦ខែ​ ​ពីបទ «លាក់ទុក​អាវុធ​ខុសច្បាប់»។ តុ​លាការ​ក៏​បាន​ផ្តន្ទាទោសឪពុក​ម្តាយ​ ​និង​អង្គរក្ស​ផ្ទាល់​របស់​លោក​ ​ថោង សារ៉ាត់ ​ម្នាក់ៗ​ឲ្យ​ជាប់​ពន្ធនាគារ​២​ឆ្នាំ​ ​ហើយ​ពិន័យ​ជា​ប្រាក់ម្នាក់​ ៦​លាន​រៀល​ពី​បទ​ល្មើស​ដូច​គ្នា៕

XS
SM
MD
LG