មន្រ្តីសាលារាជធានីភ្នំពេញអះអាងថាការឡើងថ្លៃសេវាប្រមូលសំរាម គឺដើម្បីឲ្យក្រុមហ៊ុនមានការប្រកួតប្រជែងគ្នាខ្ពស់ក្នុងការបំពេញការងារប្រមូលសំរាមឲ្យមានប្រសិទ្ធភាព ខណៈរដ្ឋបាលក្រុងបានអនុញ្ញាតឲ្យក្រុមហ៊ុនប្រមូលសំរាមទៅតាមខណ្ឌមួយចំនួនដែលបានកំណត់។
ប៉ុន្តែប្រជាពលរដ្ឋមួយចំនួនលើកឡើងថាតម្លៃនេះហាក់ខ្ពស់បន្តិច បើធៀបនឹងតម្លៃកាលពីពេលមុន។
តម្លៃសេវាប្រមូលសំរាមនេះគឺខុសគ្នាៗទៅតាមប្រភេទទីតាំងប្រភេទផ្ទះនិងប្រភេទអាជីវកម្មនីមួយៗ។
តារាងថ្មីនៃតម្លៃសេវាគ្រប់គ្រងសំរាមនិងសំណល់រឹងក្នុងរាជធានីភ្នំពេញ ដែលនឹងត្រូវអនុវត្តចាប់ពីថ្ងៃទី១ខែវិច្ឆិកា ឆ្នាំ២០២១ឲ្យដឹងថាប្រភេទទីតាំងទី១រួមមានផ្ទះមួយល្វែងជាន់ផ្ទាល់ដីដែលជាទីតាំងមិនប្រកបអាជីវកម្មត្រូវបង់សេវា២.៥ដុល្លារអាមេរិក ឬប្រហែល១ម៉ឺនរៀលខណៈផ្ទះ១ល្វែងជាន់ផ្ទាល់ដីដូចគ្នាដែលប្រកបអាជីវកម្មសេវាកម្ម ហាងទំនិញ ត្រូវបង់១៥ដុល្លារអាមេរិកនិងផ្ទះប្រកបអាជីវកម្មភោជនីយដ្ឋានត្រូវបង់សេវា២៥ដុល្លារអាមេរិកក្នុងមួយខែ។ ចំណែកផ្ទះមួយល្វែងជាន់លើត្រូវបង់២ដុល្លារអាមេរិក។
សេចក្តីប្រកាសព័ត៌មានរបស់រដ្ឋបាលរាជធានីភ្នំពេញ ចុះថ្ងៃទី២២ ខែតុលា ឆ្នាំ២០២១ឲ្យដឹងថាការអនុវត្តការបង់ប្រាក់ថ្លៃសេវាប្រមូលនិងដឹកជញ្ជូនសំរាមនិងសំណល់រឹងតាមតារាងបង់ប្រាក់ឆ្នាំ២០០៣ គឺមិនទាន់ឆ្លើយតបទៅនឹងកំណើនសេដ្ឋកិច្ចរបស់ប្រទេសជាតិកំណើនសន្ទស្សន៍ថ្លៃទំនិញនិងជីវភាពរស់នៅនាពេលបច្ចុប្បន្នឡើយ។ ជាពិសេសមិនមានលទ្ធភាពទូទាត់ថ្លៃសេវាសម្អាត ប្រមូលនិងដឹកជញ្ជូនសំរាមទៅកាន់ទីលានជូនប្រតិបត្តិករទាំង៣ ដែលបានប្រើប្រាស់រថយន្តដឹកសំរាម រថយន្តបោសថ្នល់ រថយន្តបាញ់លាងសម្អាតថ្នល់ និងសម្ភារប្រមូលសំរាមផ្សេងៗព្រមទាំងប្រាក់ខែបុគ្គលិកកម្មករ ការចំណាយរដ្ឋបាលរបស់សហគ្រាស និងការចំណាយរៀបចំទីលានសុវត្ថិភាពនៅឡើយ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ ប្រាប់វីអូអេនៅថ្ងៃសុក្រនេះថាការប្រមូលសំរាមក្នុងរាជធានីភ្នំពេញគឺមានក្រុមហ៊ុនចំនួន៣ដោយបែងចែកតំបន់ផ្សេងៗគ្នាក្នុងការប្រមូលសំរាម។ លោកបន្តថាតម្លៃថ្មីនេះគឺដូចគ្នាសម្រាប់ក្រុមហ៊ុនទាំង៣ ដែលតម្លៃត្រូវបានកំណត់ទៅតាមប្រភេទអាជីវកម្ម និងប្រភេទទីតាំង និងប្រភេទផ្ទះ។ លោកបន្ថែមថាតម្លៃនេះ គឺដើម្បីឲ្យក្រុមហ៊ុនប្រកួតប្រជែងគ្នាខ្ពស់ក្នុងការបំពេញការងារនិងសំដៅធ្វើយ៉ាងណាឲ្យទីក្រុងស្អាតនិងមានភាពល្អប្រសើរ។
លោកថ្លែងថា៖ «យើងចង់បានប្រសិទ្ធភាពហ្នឹងខ្ពស់ជាងមុនល្អប្រសើរជាងមុនទើបយើងសម្រេចឲ្យមានក្រុមហ៊ុនរហូតទៅដល់៣ដែលចេញជាលទ្ធផល ហើយកំពុងធ្វើប្រតិបត្តិការសព្វថ្ងៃហ្នឹង»។ លោកបន្តថា៖ «ជាការរំពឹង យើងចង់ឲ្យក្រុមហ៊ុនដែលយើងធ្វើការកែសម្រួលថ្មីហ្នឹងធ្វើប្រតិបត្តិការឲ្យប្រមូលកើបដឹកជញ្ជូន សំរាមរបស់យើងហ្នឹងបានល្អប្រសើរ។ ហើយពាក្យថាល្អប្រសើរហ្នឹងគឺសំដៅថាធ្វើម៉េចទីក្រុងរបស់យើងស្អាតគ្មានសំរាមនៅរប៉េះរប៉ោះផ្តេសផ្តាសក្រៅធុងសំរាម ឬក៏នៅតាមដងផ្លូវដែលវាមិនមានអនាម័យ មិនមានសោភ័ណភាពនៅក្នុងទីក្រុង»។
ក្រុមហ៊ុនប្រមូលសំរាមក្នុងរាជធានីភ្នំពេញ រួមមានក្រុមហ៊ុន 800Super GAEA ក្រុមហ៊ុន Mizuda Sanitation និងក្រុមហ៊ុនCintri ដែលពីដើមឡើយធ្លាប់រងការរិះគន់ថាប្រមូលសំរាមមិនទាន់បានល្អនៅឡើយ។
ការឡើងថ្លៃសេវាប្រមូលសំរាមនេះ ប្រជាពលរដ្ឋមួយចំនួនប្រាប់វីអូអេថាពីមុនថ្លៃសេវាប្រមូលតែ៤ពាន់រៀលប៉ុណ្ណោះ ប៉ុន្តែពេលនេះឡើងដល់១ម៉ឺនរៀលសម្រាប់ផ្ទះល្វែងដែលរស់នៅ និងមិនមានប្រកបអាជីវកម្មអ្វី។ ពួកគេថាការបង់ប្រាក់ក៏មានភាពស្មុគស្មាញជាងមុនដោយលែងបង់ភ្ជាប់គ្នាជាមួយវិក្កយបត្រអគ្គិសនី ទោះបីជាតម្លៃសំរាមនៅតែដាក់ក្នុងវិក្កយបត្រអគ្គិសនីក៏ដោយ។
អ្នកស្រី ទឹម សុជាតិ អាយុ៤២ឆ្នាំរស់នៅក្នុងភូមិទួលរកា១ សង្កាត់ចាក់អង្រែក្រោមខណ្ឌមានជ័យ បានរៀបរាប់ពីការឡើងថ្លៃសំរាមនេះថា៖«ពី៤ពាន់[រៀល] ឡើងទៅ៥ឬ៦ពាន់[រៀល]ហ្នឹងជាល្មមសមរម្យហើយណាតិចៗអ៊ីចឹងទៅណា។ អានេះ លេងហក់ឡើងគុណហ្នឹង២លើសហើយនៀក គុណនឹង២ជាងហ្ហេ។ ធម្មតាតែ៤ពាន់ទេ បង់ជាមួយភ្លើង៤ពាន់តាស ៤ពាន់រហូតមកក្រោយមកនេះបង់ក្រៅដកចេញពីភ្លើងក៏នៅតែ៤ពាន់ ដែរ ប៉ុន្តែទើបតែ២ខែហ្នឹងទេបង់ហើយ ខែមុនហើយខែនេះហក់ឡើងដល់១ម៉ឺន[រៀល]»។
អ្នកស្រីបន្តថារថយន្តដឹកសំរាមបានមកប្រមូលសំរាមញឹកញាប់ជាងលើកមុន។ ប៉ុន្តែអ្នកស្រីថាតម្លៃនេះប៉ះពាល់អ្នកដែលមានជីវភាពខ្វះខាត។
អ្នកស្រីបញ្ជាក់ថា៖«ប្រជាពលរដ្ឋឥឡូវខ្វះខាតច្រើន។ វាទូទៅហើយអ្នកខ្វះខាតឥឡូវ[មួយរយៈពេល] កូវីដនេះ មកសំរាមទៀតសាំងទៀតឡើងថ្លៃ។ សាំងផងសំរាមផងឡើងៗ អីវ៉ាន់ក៏ឡើងថ្លៃ អីក៏ឡើងថ្លៃវាពិបាកដែរហ្នឹងណា»។
ចំណែកអ្នកស្រី រឿង ហឿន អាយុ៦០ឆ្នាំរស់នៅក្នុងសង្កាត់ចាក់អង្រែក្រោមខណ្ឌមានជ័យ ក៏យល់ឃើញស្រដៀងគ្នាដែរ ដោយបានលើកឡើងថាប្រសិនបើតម្លៃនេះឡើងម្តងបន្តិចៗ គឺល្អដែលវាមិនធ្វើឲ្យប៉ះពាល់សេដ្ឋកិច្ចរបស់ប្រជាពលរដ្ឋមួយចំនួនដែលខ្វះខាត។
អ្នកស្រីថ្លៃងថា៖ «បើត្រឹមថា៦ពាន់អីវាឡើងម្តងបន្តិចៗ អ៊ីចឹង ទៅណា ពី៤ពាន់ឡើងម្តង២ពាន់អ៊ីចឹងឡើងសន្សឹមៗអត់អីទេ។ អានេះឡើងគ្រាន់តែ៤ពាន់ឡើងដល់១ម៉ឺនហ្មង»។ អ្នកស្រីបន្តថា៖«បើជីវភាពអ្នកធូរធា គេអត់ប៉ះពាល់ទេណា។ បើជីវភាពអ្នកអត់ធូរធា គាត់ថាតម្លៃ១ម៉ឺនហ្នឹង ដូចថាគាត់អាចចែកចាយម្ហូបអីដោះស្រាយអីបានមួយចំណែកទៀតហ្ហា»។
លោកយង់ គិមអេង ប្រធានមជ្ឈមណ្ឌលដើម្បីអភិវឌ្ឍន៍និងសន្តិភាព ប្រាប់វីអូអេថាការឡើងថ្លៃនេះអាចប៉ះពាល់សេដ្ឋកិច្ចរបស់ប្រជាពលរដ្ឋមួយចំនួនដែលមានចំណូលទាប។ លោកក៏យល់ស្របចំពោះការលើកឡើងរបស់ប្រជាពលរដ្ឋថាគួរតែមានការឡើងម្តងបន្តិចៗទើបជាការល្អប្រសើរ។ លោកបន្ថែមថាការប្រមូលសំរាមត្រូវតែធ្វើឲ្យមានប្រសិទ្ធភាពជាងមុន។
លោកថ្លែងថា៖ «ខ្ញុំឯកភាពជាមួយប្រជាពលរដ្ឋដែលថាមិនគួរឡើងអីខ្លាំងពេកត្រឹម៦ពាន់ត្រឹមអីហ្នឹង វាជាការប្រសើរហើយ។ ហើយម្យ៉ាងវិញទៀតរដ្ឋក៏ប្រឹងប្រែងប្រមូលសំរាមឲ្យមានប្រសិទ្ធភាពជាងមុនអីអញ្ចឹងទៅទន្ទឹមនឹងការឡើងនេះ»។
ទាក់ទងការបង់ថ្លៃសេវាសំរាមនេះរដ្ឋបាលរាជធានីភ្នំពេញកាលពីថ្ងៃទី១ ខែវិច្ឆិកាក៏បានចេញសេចក្តីជូនដំណឹងទៅប្រជាពលរដ្ឋដែលខកខានមិនបានបង់ថ្លៃសេវាសំរាមនិងសំណង់រឹងនៅរាជធានីភ្នំពេញនេះឲ្យទូទាត់តាមលេខសម្គាល់អតិថិជនដែលមានក្នុងវិក្កយបត្រអគ្គិសនីកម្ពុជា តាមរយៈប្រព័ន្ធទូទាត់អេឡិចត្រូនិកលើទូរសព្ទដៃ ឬនៅតាមធនាគារជាច្រើនរួមមានអេស៊ីលីដា ហត្ថា កាណាឌីយ៉ា ស្ថាបនា ប្រាសាក់ អម្រឹត ប្រៃសណីយ៍កម្ពុជា វឌ្ឍនៈABA WING AMK និងធនាគារមួយចំនួនទៀតឬតាមភ្នាក់ងារវេលុយនានា។
ហើយរដ្ឋបាលរាជធានីភ្នំពេញ ក៏បានព្រមានចាត់វិធានទៅប្រជាពលរដ្ឋដែលមិនព្រមបង់ថ្លៃប្រមូលសំរាមនិងសំណល់រឹងក្នុងរាជធានីភ្នំពេញតាមកាលកំណត់ទេនោះ រដ្ឋបាលរាជធានីភ្នំពេញនឹងបញ្ចេញឈ្មោះជាសាធារណៈ តាមបណ្តាញសង្គម ឬប្រព័ន្ធផ្សព្វផ្សាយនានា កត់ត្រាជាបំណុលនិងអាចឈានទៅអនុវត្តវិធានការរដ្ឋបាលដោយបិទអាជីវកម្ម ឬសេវាកម្មជាបណ្តោះអាសន្ន៕
