សាលារាជធានីភ្នំពេញ បានផ្ញើលិខិតទៅគណៈកម្មការរៀបចំការបោះឆ្នោតរាជធានីភ្នំពេញ ឲ្យណែនាំគណបក្សនយោបាយទាំងអស់ បញ្ចៀសការប្រមូលផ្តុំដង្ហែក្បួនឃោសនាតាមផ្លូវនិងទីតាំងសំខាន់ៗមួយចំនួនក្នុងរាជធានីភ្នំពេញ អំឡុងពេលធ្វើយុទ្ធនាការឃោសនាបោះឆ្នោតខាងមុខ។ គណបក្សប្រឆាំង និងអ្នកឃ្លាំមើលការបោះឆ្នោត បានរិះគន់លើការហាមប្រាមនេះ ថាជាការប្រើប្រាស់សិទ្ធិអំណាចរំលោភលើច្បាប់។
គណបក្សប្រឆាំងដ៏ធំនៅកម្ពុជាលើកឡើងថា ការហាមគណបក្សនយោបាយមិនឲ្យឃោសនា ហែក្បួននៅតាមបណ្តាផ្លូវ និងទីប្រជុំជន ដែលមមាញឹក គឺជាការរំលោភច្បាប់ និងធ្វើឲ្យប៉ះពាល់ដល់ការទទួលបានព័ត៌មានរបស់ប្រជាពលរដ្ឋ។
កាលពីថ្ងៃទី២៨ ខែមេសានេះ សាលារាជធានីភ្នំពេញ បានចេញលិខិតមួយច្បាប់ជូនទៅលោក មាស ឆពណ្ណ ប្រធានគណៈកម្មការរៀបចំការបោះឆ្នោតរាជធានីភ្នំពេញ ឲ្យណែនាំដល់គណបក្សនយោបាយទាំងអស់ បញ្ចៀសការប្រមូលផ្តុំដង្ហែក្បួនឃោសនាតាមផ្លូវ និងទីតាំងសាធារណៈធំៗមួយចំនួនក្នុងរាជធានីភ្នំពេញ អំឡុងពេលធ្វើយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ សង្កាត់ អាណត្តិទី៤ ចាប់ពីថ្ងៃទី២០ ខែឧសភា ដល់ថ្ងៃទី២ ខែមិថុនា ឆ្នាំ២០១៧ខាងមុខ។
ក្នុងលិខិតនោះបញ្ជាក់ថា ការហាមឃាត់មិនឲ្យប្រមូលផ្តុំដង្ហែក្បួនតាមទីតាំងទាំងនោះ គឺដើម្បីធានាបានសន្តិសុខ សុវត្ថិភាពនិងសណ្តាប់ធ្នាប់សាធារណៈ និងបញ្ចៀសការកកស្ទះចរាចរណ៍ ដែលរំខានដល់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវជាតិ និងអន្តរជាតិ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ ប្រាប់ VOA នារសៀលថ្ងៃសុក្រនេះថា ក្នុងលិខិតដែលសាលារាជធានីដាក់ជូនទៅគណៈកម្មការរៀបចំការបោះឆ្នោតរាជធានីភ្នំពេញ នឹងហាមរាល់ការជួបជុំដើម្បីហែក្បួននៅទីតាំងដែលបានបញ្ជាក់ដោយមិនកំណត់ពីពេលវេលា ឬថ្ងៃចុងសប្តាហ៍នោះទេ។
«អត្ថន័យដែលយើងធ្វើលិខិតហ្នឹង គឺដើម្បីបញ្ចៀសការកកស្ទះចរាចរណ៍ អញ្ចឹងសូម្បីតែថ្ងៃសៅរ៍អាទិត្យហ្នឹង ក៏រឹតតែមានការកកស្ទះចរាចរណ៍ជាងថ្ងៃធម្មតាទៅទៀត។ អញ្ចឹងលិខិតរបស់យើង គឺគ្របដណ្តប់ពេញមួយក្នុងយុទ្ធនាការនៃការឃោសនាបោះឆ្នោតតែម្តង»។
លោក មាស ឆពណ្ណ ប្រធានគណៈកម្មការរៀបចំការបោះឆ្នោតរាជធានីភ្នំពេញ ប្រាប់ VOA ថា ក្រុមការងាររបស់លោក នឹងជួបប្រជុំគ្នានៅសប្តាហ៍ក្រោយ ដើម្បីពិចារណា និងសម្រេចក្នុងការឆ្លើយតបទៅនឹងលិខិតរបស់សាលារាជធានីភ្នំពេញវិញ។
លិខិតរបស់រដ្ឋបាលរាជធានីភ្នំពេញកំណត់ថា ផ្លូវដែលត្រូវជៀសវាងក្នុងការហែក្បួនរួមមាន កំណាត់មហាវិថីព្រះនរោត្តម កំណាត់មហាវិធីសហព័ន្ធរុស្ស៊ី កំណាត់មហាវិថីព្រះមុនីវង្ស កំណាត់មហាវិថីម៉ៅសេទុង កំណាត់ផ្លូវទេពផន កំណាត់វិថីសុធារស មហាវិថីព្រះសុរាម្រិត និងផ្លូវជុំវិញព្រះបរមរាជវាំង។
ចំណែកទីប្រជុំជនដែលត្រូវជៀសវាងការប្រមូលផ្តុំហែក្បួនមាន ផ្លូវជុំវិញផ្សារធំថ្មី ផ្លូវជុំវិញផ្សារអូរឫស្សី ផ្សារអូឡាំពិក ផ្សារទួលទំពូង ផ្សារដេប៉ូ និងផ្លូវជុំវិញផ្សារដើមគរ។
នៅតាមទីសាធារណៈ គណបក្សនយោបាយត្រូវចៀសវាងការប្រមូលផ្តុំនៅតាមសួនព្រះបរមរាជវាំង ទីធ្លាព្រះមេរុ សួនមុខវត្តបទុមវត្តី ទីតាំងវិមានឯករាជ្យនិងសួនច្បារវិមានឯករាជ្យទាំងមូល ទីធ្លារូបសំណាកលោកយាយពេញ សួនច្បារអ្នកភិរម្យអ៊ូ ហៅង៉ុយ និងសួនច្បារសម្តេច ហ៊ុន សែន។
លោកស្រី មូរ សុខហួរ តំណាងរាស្រ្តគណបក្សសង្គ្រោះជាតិប្រាប់ VOA ថា ទីតាំងដែលសាលារាជធានីហាមឃាត់ គឺជាទីតាំងសំខាន់សម្រាប់ការហែក្បួន និងឃោសនា របស់គណបក្សនយោបាយនីមួយៗ ផ្សព្វផ្សាយឲ្យម្ចាស់ឆ្នោតបានដឹង និងស្គាល់ ដើម្បីរួមចំណែកក្នុងការសម្រេចចិត្តទៅបោះឆ្នោត។ លោកស្រីបន្ថែមថា ការហាមមិនឲ្យហែក្បួនឃោសនាតាមផ្លូវ និងទីប្រជុំជនទាំងនោះ គឺជាការហាមឃាត់ដែលធ្វើឲ្យប៉ះពាល់យ៉ាងធ្ងន់ធ្ងរដល់គោលការណ៍នៃការឃោសនាដោយសេរី និងយុត្តិធម៌។
«ការហាមចេញពីសាលារាជធានីភ្នំពេញ គឺជាការហាមប្រាមមួយដែលផ្ទុយនឹងច្បាប់ដែលមានជាធរមានទៅហើយ។ ដូច្នេះខ្ញុំសង្ឃឹមថា លោកអភិបាលក្រុង នឹងពិចារណាវិញ ហើយខ្ញុំសង្ឃឹមថា គ.ជ.ប នឹងធ្វើការជជែកជាមួយនឹងលោកអភិបាលរាជធានីភ្នំពេញ ដើម្បីអ្នកម្ចាស់ឆ្នោតលោកទទួលបាននូវព័ត៌មាន ដើម្បីសេចក្តីសម្រេចរបស់ម្ចាស់ឆ្នោតនៅថ្ងៃបោះឆ្នោត»។
ការបោះឆ្នោតជាច្រើនអាណត្តិកន្លងមក គេឃើញថា រាជធានីភ្នំពេញ ជាមណ្ឌលដែលមានការប្រទាញប្រទង់គ្នាខ្លាំងរវាងគណបក្សកាន់អំណាច និងគណបក្សប្រឆាំង។ គណបក្សប្រជាជនកម្ពុជាធ្លាប់ឈ្នះក្នុងមណ្ឌល ដែលជាបេះដូងនៃកម្ពុជានេះតែម្តងគត់ គឺកាលពីការបោះឆ្នោតថ្នាក់ជាតិអាណត្តិទី៤។
លោក យឿង សុធារ៉ា មន្រ្តីច្បាប់និងអង្កេតនៃអង្គការឃ្លាំមើលការបោះឆ្នោតនៅកម្ពុជា លើកឡើងថា ផ្លូវនិងទីតាំងដែលសាលារាជធានីបានហាមប្រាម គឺសុទ្ធសឹងជាទីប្រជុំជនសំខាន់សម្រាប់ការឃោសនារបស់គណបក្សនីមួយៗ។ លោកបន្ថែមថា អាជ្ញាធរគួរតែថ្លឹងថ្លែងរវាងផលប្រយោជន៍សង្គមប្រជាធិបតេយ្យ និងសណ្តាប់ធ្នាប់សាធារណៈ ជាជាងហាមមិនឲ្យឃោសនាពេញមួយរដូវកាលនៃការឃោសនាបែបនេះ។
«ថ្ងៃសៅរ៍អាទិត្យ បើតាមស្ថានភាពចរាចរណ៍ជាក់ស្តែងវាមិនជាស្ទះធ្ងន់ធ្ងរប៉ុន្មានទេ។ ដូច្នេះសៅរ៍អាទិត្យនេះ គួរតែបែងចែកឲ្យគណបក្សនីមួយៗដែលនៅក្នុងសង្កាត់ ឬក៏ឃុំហ្នឹង គាត់អាចមានលទ្ធភាពចែកពេលវេលាគ្នា អាចហែនៅក្នុងឃុំសង្កាត់ហ្នឹងបាន។ ចុះបើយើងបិទទាំងអស់មិនលើកលែងសៅរ៍អាទិត្យ វាជាការប្រើប្រាស់អំណាចនិងសមត្ថកិច្ចហួសហេតុហើយ វាហួសពីបទបញ្ជា និងនីតិវិធីរបស់គ.ជ.ប»។
ការបោះឆ្នោតឃុំសង្កាត់អាណត្តិទី៤ នឹងធ្វើឡើង នាថ្ងៃទី៤ ខែមិថុនា ឆ្នាំ២០១៧ ដោយមានគណបក្សនយោបាយចំនួន១២ បានឈរឈ្មោះ។ ច្បាប់បោះឆ្នោតឃុំសង្កាត់ និងច្បាប់បោះឆ្នោតជ្រើសរើសតំណាងរាស្ត្រ បានកំណត់ឲ្យគណបក្សនយោបាយមួយ ហែក្បួនឃោសនាតែពីរដងប៉ុណ្ណោះ ក្នុងយុទ្ធនាការឃោសនាបោះឆ្នោតរយៈពេល១៤ថ្ងៃ គឺនៅថ្ងៃបើកយុទ្ធនាការឃោសនា និងនៅថ្ងៃបិទយុទ្ធនាការឃោសនាបោះឆ្នោត៕
