ក្រសួងមហាផ្ទៃនៅព្រឹកថ្ងៃព្រហស្បតិ៍នេះ បានបញ្ចេញរបាយការណ៍របស់ខ្លួនបង្ហាញពីការត្រៀមកម្លាំងចំនួនជាង៥ម៉ឺននាក់ ដើម្បីការពារការបោះឆ្នោតឃុំសង្កាត់នាពេលខាងមុខ។ ការត្រៀមកម្លាំងច្រើននេះត្រូវបានគណបក្សប្រឆាំងនិងអ្នកឃ្លាំមើលការបោះឆ្នោតយល់ថា អាចធ្វើឲ្យប្រជាពលរដ្ឋមានការភ័យខ្លាចនិងជាការខ្ជះខ្ជាយថវិកាជាតិ។
ក្រសួងមហាផ្ទៃប្រកាសត្រៀមកម្លាំងជាង៥ម៉ឺននាក់ដើម្បីការពារដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ខាងមុខ ស្របពេលគណបក្សប្រឆាំងនិងអ្នកឃ្លាំមើលការបោះឆ្នោតយល់ថា ជាការធ្វើឲ្យប៉ះពាល់ដល់ការសម្រេចចិត្តក្នុងការបោះឆ្នោតរបស់ប្រជាពលរដ្ឋ។
បើតាមរបាយការណ៍របស់អគ្គស្នងការនគរបាលជាតិ កងកម្លាំងជាង៥ម៉ឺននាក់ ដែលរួមមាន នគរបាល កងរាជអាវុធហត្ថនិងកងយោធពលខេមរភូមិន្ទនឹងត្រូវដាក់ពង្រាយសម្រាប់ការពារអំឡុងពេលបោះឆ្នោតនិងការរាប់សន្លឹកឆ្នោតនៅថ្ងៃទី៤ខែមិថុនា។ កងកម្លាំងទាំងនោះនឹងត្រូវពង្រាយដើម្បីការពារតាមការិយាល័យបោះឆ្នោត ការពារស្នាក់ការរបស់គណៈកម្មការឃុំសង្កាត់ ត្រៀមអន្តរាគមន៍ភូមិសាស្រ្តក្នុងនិងក្រៅក្រុងស្រុកខណ្ឌ ត្រៀមអន្តរាគមន៍ថ្នាក់កណ្តាលនិងកម្លាំងក្រុមវិទ្យុការីទាក់ទង។ ចំណែកកម្លាំងជិត២ម៉ឺននាក់នឹងត្រូវដាក់ពង្រាយសម្រាប់ការពារដំណើរការនៃការឃោសនាបោះឆ្នោតដែលនឹងប្រព្រឹត្តទៅចាប់ពីថ្ងៃទី២០ ខែឧសភា ដល់ថ្ងៃទី២ ខែមិថុនា។
ថ្លែងក្នុងពិធីប្រជុំការពារដំណើរការរៀបចំការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៤ លោក ស ខេង នាយករដ្ឋមន្រ្តីស្តីទីនិងជារដ្ឋមន្រ្តីក្រសួងមហាផ្ទៃ បានបញ្ជាឲ្យកងកម្លាំងពាក់ព័ន្ធគ្រប់ផ្នែកត្រូវចាត់ចែងតាមផែនការសកម្មភាពនិងភារកិច្ចរបស់ខ្លួនដើម្បីធានាឲ្យបាននូវការបោះឆ្នោតប្រកបដោយបរិយាកាសស្ងប់ស្ងាត់គ្មានការគំរាមកំហែងនិងគ្មានអំពើហិង្សា។ លោកបន្ថែមថា ក្នុងការបោះឆ្នោតខាងមុខ អាចនឹងលេចចេញនូវបាតុភាពផ្សេងៗ ដែលរារាំងដល់ដំណើរការបោះឆ្នោត ជាពិសេសក្នុងដំណាក់កាលនៃការឃោសនាបោះឆ្នោត។
ក្នុងពិធីប្រជុំ ដោយមិនអនុញ្ញាតឲ្យអ្នកសារព័ត៌មានចូលថតសំឡេងនោះ លោក ស ខេង បានបញ្ជាឲ្យអាជ្ញាធរដែនដីនិងកម្លាំងមានសមត្ថកិច្ចទាំងអស់ ចាត់វិធានការនៅនឹងកន្លែងឲ្យបានរហ័សបំផុតទៅលើហេតុការណ៍និងឧបទ្ទវហេតុផ្សេងៗដែលកើតឡើងក្នុងមូលដ្ឋាន ដើម្បីទប់ស្កាត់សកម្មភាពបំពុលបរិយាកាសឬកេងចំណេញខាងផ្នែកនយោបាយពីមជ្ឈដ្ឋានមួយចំនួន។
បើតាមលោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ លើកឡើងថា កងកម្លាំងត្រៀមសម្រាប់ការពារការបោះឆ្នោតក្រុមប្រឹក្សាឃុំសង្កាត់អាណត្តិនេះ មានចំនួនច្រើនជាងអាណត្តិមុន ដោយសារចំនួនការិយាល័យបោះឆ្នោតមានការកើនឡើង។ ទោះជាយ៉ាងណាលោកមិនបានបញ្ជាក់ ថា តើការកើនឡើងនេះមានចំនួនប៉ុន្មាននោះទេ។
ការប្រកាសត្រៀមកម្លាំងនេះ ត្រូវបានគណបក្សប្រឆាំងនិងអ្នកឃ្លាំមើលការបោះឆ្នោតលើកឡើងថា ជាចំនួនច្រើនហួសហេតុ ដែលអាចធ្វើឲ្យប៉ះពាល់ដល់ការសម្រេចចិត្តក្នុងការបោះឆ្នោតរបស់ប្រជាពលរដ្ឋ។
លោកស្រី មូរ សុខហួរ តំណាងរាស្រ្តគណបក្សសង្គ្រោះជាតិ ប្រាប់ VOA នារសៀលថ្ងៃព្រហស្បតិ៍នេះថា រដ្ឋាភិបាលមិនគួរដាក់កងកម្លាំងប្រដាប់អាវុធការពារការបោះឆ្នោតរហូតដល់ទៅជាង៥ម៉ឺននាក់នោះទេ។ លោកស្រីបន្ថែមថា ចំនួននេះគឺជាការខ្ជះខ្ជាយថវិការបស់ជាតិ និងធ្វើឲ្យប្រជាពលរដ្ឋមានការភ័យខ្លាច។
«វាអាចជាការបំភិតបំភ័យដល់ប្រជាពលរដ្ឋ ពិសេសនៅតំបន់ដាច់ស្រយាល។ សម្រាប់នៅទីក្រុង ខ្ញុំយល់ឃើញថា ជាការប្រើថវិការជាតិ ប្រើធនធាន ដោយខ្ញុំយល់ឃើញថា មិនចាំបាច់ មិនគួរដាក់ទេ»។
លោក យឿង សុធារ៉ា មន្រ្តីច្បាប់ និងអង្កេតនៃអង្គការឃ្លាំមើលការបោះឆ្នោតនៅកម្ពុជាហៅកាត់ថាខុមហ្វ្រែល ប្រាប់ VOA ថា បើតាមការបោះឆ្នោតក្នុងអាណត្តិមុនៗ កម្ពុជាមិនធ្លាប់មានបញ្ហាអសន្តិសុខណាមួយ រហូតដល់ត្រូវពង្រាយកម្លាំងការពារច្រើនបែបនេះនោះទេ។ លោកបន្ថែមថា ការប្រើចំនួនកងកម្លាំងសមត្ថកិច្ចច្រើននិងគ្រប់ការិយាល័យបោះឆ្នោតនឹងធ្វើឲ្យប៉ះពាល់ដល់សតិអារម្មណ៍របស់ប្រជាពលរដ្ឋ។
«ប្រជាពលរដ្ឋគាត់ឃើញចំនួនកងកម្លាំងសន្តិសុខច្រើនច្រងេងច្រងាង ដាក់ពង្រាយឯណេះមួយកញ្ចុប ឯណោះមួយកញ្ចុប ពេលខ្លះវាអាចប៉ះពាល់ដល់សតិអារម្មណ៍របស់គាត់ដែរ ប៉ះពាល់ដល់ឆន្ទៈ ការសម្រេចចិត្តរបស់គាត់ដែរ។ វាស្របគ្នាជាមួយនឹងការលើកឡើងរបស់ថ្នាក់ដឹកនាំយើង ថាបើគណបក្ស [គណបក្សប្រជាជនកម្ពុជា] ចាញ់ឆ្នោតអាចនឹងមានសង្គ្រាម ហើយគាត់គិតផ្សំចូលគ្នាអញ្ចឹងទៅ វាទៅជាប៉ះពាល់ដល់សតិអារម្មណ៍របស់គាត់ក្នុងការសម្រេចចិត្ត»។
លោក យឿង សុធារ៉ា បន្ថែមថា រដ្ឋាភិបាលគួរតែបង្កើនចំនួនអ្នកសង្កេតការណ៍បោះឆ្នោតឯករាជ្យឲ្យបានច្រើន ជាជាងការបង្កើនចំនួនកម្លាំងសន្តិសុខ។
បើតាមលោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ប្រាប់ VOA ថា រហូតមកដល់ពេលនេះ អ្នកដែលបានចុះឈ្មោះធ្វើជាអ្នកសង្កេតការណ៍ មានចំនួនជាង២ម៉ឺននាក់។ បើទោះជាចំនួនអ្នកសង្កេតការណ៍នេះតិចជាងការិយាល័យបោះឆ្នោត ប៉ុន្តែលោក ហង្ស ពុទ្ធា អះអាងថា ចំនួននេះមិនធ្វើឲ្យប៉ះពាល់ដល់ដំណើរការនៃការបោះឆ្នោតនោះទេ។
តួលេខប្រកាសជាផ្លូវការដោយគណៈកម្មាធិការជាតិរៀបចំការបោះឆ្នោត អ្នកចុះឈ្មោះបោះឆ្នោតមានចំនួនជិត៨លាននាក់ ស្មើនឹងជាង៨១ភាគរយនៃចំនួនអ្នកមានសិទ្ធិបោះឆ្នោតសរុប។ ការិយាល័យបោះឆ្នោតសរុប មានជាង២ម៉ឺនការិយាល័យទូទាំងប្រទេស និងមានគណបក្សនយោបាយចំនួន១២ បានចុះបញ្ជីបេក្ខជនឈរឈ្មោះបោះឆ្នោត៕
