ប្រទេសហ្វីលីពីនកំពុងបង្កើនវត្តមានរបស់ខ្លួននៅសមុទ្រចិនខាងត្បូងនិងពង្រាយនាវានិងយន្ដហោះជាច្រើនថែមទៀតដើម្បីការពារទឹកដីនិងធនធានសមុទ្ររបស់ខ្លួន។ នេះបើតាម ក្រុមការងាររដ្ឋាភិបាលដែលបាននិយាយកាលពីថ្ងៃពុធ។ នេះតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ប្រទេសហ្វីលីពីនបានបង្កើនវោហារសាស្ត្ររបស់ខ្លួននៅក្នុងសប្តាហ៍ថ្មីៗនេះ នៅក្នុងការប្រ ឆាំងនឹងអ្វីដែលប្រទេសនេះនិយាយថា ជាអាកប្បកិរិយាគំរាមកំហែងរបស់កងនាវាចិននៅ ក្នុងតំបន់សេដ្ឋកិច្ចផ្តាច់មុខដែលមានទំហំ២០០ ម៉ាយល៍ របស់ហ្វីលីពីន ក្រោយពីប្រទេសហ្វីលីពីនរក្សាទំនាក់ទំនងរយៈពេល៤ឆ្នាំជាមួយចិនដែលជាគូប្រជែងជាប្រវត្តិសាស្ត្រ។
សេចក្តីថ្លែងការណ៍របស់ក្រុមការងារហ្វីលីពីនអំពីសមុទ្រចិនខាងត្បូងនិយាយថា៖ «យើងកំពុងប្រើគ្រប់មធ្យោបាយដែលអាចមានដើម្បីការពារទឹកដីនិងតំបន់សេដ្ឋកិច្ចផ្តាច់មុខរបស់យើង»។
ការដាក់ពង្រាយនាវានិងយន្តហោះនេះគឺជាចំណាត់ការចុងក្រោយបង្អស់នៅក្នុងជម្លោះដែលកំពុងកើតមានជាមួយប្រទេសចិនលើអ្វីដែលរដ្ឋាភិបាលក្រុងម៉ានីលនិយាយថា «ហ្វូងកប៉ាល់នេសាទ» ចិនរាប់រយគ្រប់គ្រងដោយកងជីវពលដែលគាំទ្រដោយរដ្ឋចិន។ ប្រទេសចិនបានបដិសេធថា មិនមានក្រុមជីវពលនៅលើកប៉ាល់ទាំងនោះទេ។
ក្រុមការងារនេះនិយាយថា លោកប្រធានាធិបតី Rodrigo Duterte បានបញ្ជាឱ្យអាជ្ញាធរបន្ត«ល្បាតដែនអធិបតេយ្យរបស់ខ្លួន» និងបង្កើនប្រតិបត្តិការប្រឆាំងការនេសាទខុសច្បាប់ដែលមានបានជូនដំណឹងនិងគ្មានច្បាប់នៅក្នុងដែនទឹករបស់ខ្លួន។
នាវាចំនួន៩គ្រឿងរបស់កងឆ្មាំសមុទ្រនិងការិយាល័យជលផលនិងយន្ដហោះឆ្មាំសមុទ្រមួយគ្រឿងនិងទូកល្បឿនលឿនត្រូវបានដាក់ពង្រាយនៅសមុទ្រចិនខាងត្បូង រួមទាំងកោះនៅដែនទឹកគ្រប់ គ្រងដោយហ្វីលីពីននៅប្រជុំកោះ Spratly។ ប្រទេសហ្វីលីពីនបានដាក់ពាក្យតវ៉ាតាមផ្លូវទូតជាច្រើន អំពីសកម្មភាពរបស់ចិននៅសមុទ្រចិនខាងត្បូង៕
