ភ្ជាប់​ទៅ​គេហទំព័រ​ទាក់ទង

ហ្វីលីពីន​ថា យុទ្ធជន​បរទេស​ជា​អ្នក​វាយប្រហារ​លើ​ក្រុង​ Marawi


ចំណាប់ខ្មាំង​ម៉ាឡេស៊ី​ពីរ​នាក់​ត្រូវ​បាន​គេ​ជួយ​សង្គ្រោះ​នៅ​ក្នុង​ខេត្ត Sulu ភាគ​ខាង​ត្បូង​នៃ​ប្រទេស​ហ្វីលីពីន កាលពី​ថ្ងៃទី២៣ ខែមីនា ឆ្នាំ២០១៧។

អាជ្ញាធរ​ហ្វីលីពីន​និយាយ​ថា​ ពួក​បរទេស​ស្ថិត​នៅ​ក្នុង​ចំណោម​ពួក​ជន​សកម្មប្រយុទ្ធ​ឥស្លាម​និយម​ដែល​បាន​ត្រួតត្រា​កោះ​ Mindanao នា​ប៉ែក​ខាង​ត្បូង​ប្រទេស​កាលពី​ពេល​មុន​នេះក្នុង​សប្តាហ៍​នេះ។​

លោក Jose Calida បាន​និយាយ​នៅ​ថ្ងៃ​សុក្រនេះ​ថា «អ្វី​ដែល​កើត​មាន​នៅ​ Mindanao មិន​មែន​ជា​ការ​បះបោរ​របស់​ក្រុម​ពលរដ្ឋ​ហ្វីលីពីន​ទៀត​ហើយ។​ វា​ក្លាយ​ទៅ​ជា​ការ​លុកលុយ​មួយ​ដោយ​ពួក​យុទ្ធជន​បរទេស»។

លោក​បានថ្លែង​ថា​ពួក​ជន​ជាតិ​ម៉ាឡេស៊ី ឥណ្ឌូនេស៊ី និង​សិង្ហបុរី​បាន​ឆ្លើយតប​នឹង «ការ​អំពាវ​នាវ» មួយ​ឱ្យ​បង្កើត​ខេត្ត​ ISIS មួយ​នៅ​ក្នុង​កោះ​ Mindanao។​

ពួក​ទាហាន​រដ្ឋាភិបាល​ហ្វីលីពីន​បាន​ចូល​ទៅ​ក្នុង​កោះ​ Mindanao កាល​ពី​ថ្ងៃ​ព្រហស្បតិ៍​ដើម្បី​ចាប់ផ្តើម​បណ្តេញ​ពួក​ជន​សកម្ម​ប្រយុទ្ធ​ឥស្លាម​និយម​ឱ្យ​ចេញ​ពី​ទី​នោះ។

កង​ឧទ្ធម្ភាគ​ចក្រ​យោធា​បាន​ហោះ​ពី​លើ​ដំបូល​អាគារ​ក្នុង​ក្រុង​ Marawi នៅ​ពេល​ដែល​កង​រថក្រោះ​បាន​បើក​កាត់​សង្កាត់​នៃ​ក្រុង​នេះ​នៅ​ពេល​មាន​ការ​បាញ់​កាំភ្លើង​និង​ការ​ផ្ទុះ​យូរៗ​ម្តង។​ មនុស្ស​ច្រើន​នាក់​ក្នុង​បណ្តា​ពលរដ្ឋ​២សែន​នាក់​នៃ​ក្រុង​នេះ​បាន​រត់គេច​ខ្លួន​ទៅ​កាន់​កន្លែង​មាន​សុវត្ថិភាព​ហើយ។​

វិបត្តិ​នេះ​បាន​កើត​មាន​ឡើង​កាលពី​យប់​ថ្ងៃ​អង្គារ​នៅ​ពេល​ដែល​កងកម្លាំង​សន្តិសុខ​របស់​រដ្ឋាភិបាល​ហ្វីលីពីន​បាន​បើក​ធ្វើ​បេសកកម្ម​មួយ​ដើម្បី​ចាប់ខ្លួន​មេដឹកនាំ​ពួក​ជន​សកម្ម​ប្រយុទ្ធ​ឈ្មោះ Isnilon Hapilon ដែល​គេ​ជឿ​ថា​គាត់​ស្ថិត​នៅ​ក្នុង​ក្រុង Marawi ដោយ​រើប​ពី​របួស​ដែល​គាត់​មាន​នៅ​ក្នុង​ការ​ប៉ះទង្គិច​គ្នា​មួយ​ពី​ពេល​មុន ។ការ​ឆ្មក់​វាយ​ប្រហារ​នោះ​បាន​បញ្ចប់​នៅ​ក្រោយ​ក្រុមជន​សកម្មប្រយុទ្ធ​បាន​ចូល​លុក​ក្នុង​ក្រុង​នេះ ហើយ​បាន​ប្រព្រឹត្ត​ដូច​កម្រោល​ចូល​ដោយ​បាន​ដុត​ផ្ទះ​អ្នក​ស្រុក សាកលវិទ្យាល័យ​មួយ និង​ព្រះវិហារ​គ្រិស្ត​សាសនា​និកាយ​កាតូលិក និង​បាន​ចាប់​ពួក​ចំណាប់ខ្មាំង​ផង​ដែរ ដោយ​មាន​រួម​បញ្ចូល​ទាំង​បព្វជិត​គ្រិស្តសាសនា​ម្នាក់ និង​មនុស្ស​ជាង​១២នាក់​ទៀត​នៅ​ក្នុង​ព្រះវិហារ​មួយ​កន្លែង។

ពួក​យោធា​និយាយ​ថា​មាន​ទាហាន​រដ្ឋាភិបាល​យ៉ាង​តិច​ណាស់​១១នាក់​ និង​ពួក​ជន​សកម្ម​ប្រយុទ្ធ​៣១​នាក់​បាន​ស្លាប់​នៅ​ក្នុង​ការ​ប្រយុទ្ធ​គ្នា​នោះ៕

XS
SM
MD
LG