ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​ហ្វីលីពីនលោក​ ​Duterte នឹង​ឈរឈ្មោះ​ជា​បេក្ខជន​ព្រឹទ្ធសភា​ក្នុង​​ការ​បោះ​ឆ្នោត​​ឆ្នាំ​ក្រោយ


រូបឯកសារ៖ លោក Rodrigo Duterte ប្រធានាធិបតីហ្វីលីពីន ថ្លែងសុន្ទរកថាតាមអ៊ីនធឺណិត ក្នុងសារដែលបានថតទុកមុន ក្នុងសម័យប្រជុំលើកទី 76 នៃមហាសន្និបាតអង្គការសហប្រជាជាតិ នៅថ្ងៃទី 21 ខែកញ្ញា ឆ្នាំ 2021។ (AP)
រូបឯកសារ៖ លោក Rodrigo Duterte ប្រធានាធិបតីហ្វីលីពីន ថ្លែងសុន្ទរកថាតាមអ៊ីនធឺណិត ក្នុងសារដែលបានថតទុកមុន ក្នុងសម័យប្រជុំលើកទី 76 នៃមហាសន្និបាតអង្គការសហប្រជាជាតិ នៅថ្ងៃទី 21 ខែកញ្ញា ឆ្នាំ 2021។ (AP)

ប្រធានាធិបតី​ហ្វីលីពីន​លោក​ Rodrigo Duterte នឹង​ប្រកួតប្រជែង​ធ្វើ​ជាសមាជិក​ព្រឹទ្ធសភា​ហ្វីលីពីន​នៅ​ក្នុង​ការ​បោះ​ឆ្នោត​នៅ​ឆ្នាំ​ក្រោយ​ដោយ​លោក​ជៀស​វាងការ​ឈរ​ឈ្មោះ​ធ្វើ​ជាអនុប្រធានាធិបតី​ហ្វីលីពីន​ដែល​អាច​ជា​ការ​ប្រកួត​ប្រជែង​ជា​មួយ​កូន​ស្រី​របស់​លោក។

លោក​ Bong Go ដែល​ជា​សមាជិក​ព្រឹទ្ធសភា​ហ្វីលីពីន​និង​ជា​មនុស្ស​ជំនិតរបស់​លោក Duterte បាន​ប្រាប់​ក្រុម​អ្នក​សារព័ត៌មាន​ថា​លោក Duterte បាន​ដាក់​ឯកសារសម្រាប់​យុទ្ធនាការឃោសនា​រក សំឡេង​ឆ្នោត​ជា​ផ្លូវ​ការ​របស់​លោក​រួច​ហើយ ជាមួយគណៈកម្មការ​រៀប​ចំ​ការ​បោះ​ឆ្នោត​នៅ​ថ្ងៃ​ចន្ទ​នេះ។

ការ​សម្រេច​ចិត្ត​របស់​លោក ​Duterte កើត​មាន​ឡើងជា​ច្រើន​ថ្ងៃ​បន្ទាប់​ពី​កូន​ស្រី​របស់​លោក​គឹលោក​ស្រី Sara Duterte-Carpio​ ​ដែល​ជា​អភិបាលទី​ក្រុង Davao បាន​ប្រកាសថា​លោក​ស្រីនឹង​ស្វះស្វែង​ឈរឈ្មោះ​ជា​អនុប្រធានាធិបតីរបស់​ប្រទេស​ហ្វីលីពីន។ កាលពីមុន​ លោកស្រី ​Duterte-Carpio ត្រូវគេ​រំពឹងថា​នឹង​ឈរឈ្មោះ​ធ្វើ​ប្រធានាធិបតី​ជំនួស​ឪពុក​របស់​លោក​ស្រី​និងមាន​សំឡេង​នាំមុខ​នៅ​ក្នុង​ការ​ស្ទង់​មតិជា​ច្រើន។​

លោក Duterte មិន​អាច​ឈរ​ឈ្មោះ​ជាប្រធានាធិបតី​ក្នុង​អណត្តិ​ទី​២​បាន​ឡើយ​ដែល​ត្រូវ​បាន​កំណត់​ដោយ​រដ្ឋធម្មនុញ្ញ​របស់​ប្រទេស​ហ្វីលីពីន។

តុលាការ​ព្រហ្មទណ្ឌអន្តរជាតិ​បាន​បើក​ការ​ស៊ើប​អង្គេតមួយទៅ​លើ​ការ​យុទ្ធនាការ​នៃ​ការ​បង្ក្រាបដ៏​ឃោរ​ឃៅ​របស់​លោក Duterte ​ជុំវិញ​បញ្ហា​គ្រឿង​ញឿន​នៅ​ក្នុង​ប្រទេស​ហ្វីលីពីនបន្ទាប់ពី​លោក​បានឡើង​កាន់​តំណែង​ជា​ប្រធានាធិបតី​ហ្វីលីពីន​កាល​ពី​ឆ្នាំ​២០១៦។​ ការ​បង្ក្រាប​នោះបាន​សម្លាប់​មនុស្ស​អស់​ជាង​៨.៦០០​នាក់នៅក្នុង​ប្រទេស​ហ្វីលីពីន។នេះ​បើ​យោង​ទៅ​លើ​របាយការណ៍​មួយ​ដែល​ត្រូវ​បាន​ចេញ​ផ្សាយ​កាល​ពីដើម​ឆ្នាំ​នេះ​ដោយការិយាល័យ​សិទ្ធិមនុស្ស​របស់​អង្គការ​សហប្រជាជាតិ។​

នៅក្នុង​ប្រទេស​ហ្វីលីពីន ការ​បោះ​ឆ្នោត​ជ្រើស​រើស​ប្រធានាធិបតី​និង​អនុ​ប្រធានាធិបតី​ធ្វើឡើង​ដាច់​ដោយ​ឡែក​ពី​គ្នា។ បេក្ខជន​ប្រធានាធិបតីសម្រាប់​ការ​បោះ​ឆ្នោតនៅ​ក្នុង​ប្រទេស​ហ្វីលីពីន​នៅ​ឆ្នាំ​ក្រោយ​គឹ​មាន​សមាជិក​ព្រឹទ្ធសភាលោក ​Bong Go ដែល​គាំទ្រ​ដោយ​លោក Duterte និងលោក​Ferdinand Marcos, Junior ​ដែល​ជា​កូន​ប្រុស​របស់អតីត​មេដឹកនាំ​ផ្តាច់ការ​លោក​ Ferdinand Marcos ៕

ព័ត៌មានមួយចំនួននៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន The Associated Press និង Reuters។

XS
SM
MD
LG