ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

យន្តហោះ​យោធា​ហ្វីលីពីន​ធ្លាក់ ​ស្លាប់​៥០​នាក់​របួស​៤៩​នាក់


ក្រុមអ្នកជួយសង្គ្រោះ អង្គុយ​ក្បែរ​សាកសព​ជនស៊ីវិល​ដែល​ត្រូវបាន​រុំជិត​ដែល​បាន​ស្លាប់​ដោយសារ​ការធ្លាក់​យន្តហោះ​របស់​យោធា​ហ្វីលីពីន​ប្រភេទ Lockheed C-130 Hercules នៅ​ខេត្ត Sulu ភាគខាងត្បូង​ប្រទេស​ហ្វីលីពីន នៅ​ថ្ងៃទី៤ ខែកក្កដា ឆ្នាំ២០២១។

ក្រុម​មន្ត្រី​បាន​និយាយកាល​ពី​ថ្ងៃចន្ទ​ថា កងទ័ព​ហ្វីលីពីន​បាន​រកឃើញ​អ្នក​ស្លាប់​៥ នាក់​ចុង​ក្រោយ​ បន្ទាប់​ពី​ការ​ធ្លាក់​យន្តហោះ​នៅភាគ​ខាង​ត្បូង​ប្រទេស​ ដោយ​ធ្វើ​ឲ្យ​ចំនួន​មនុស្ស​ស្លាប់​ឡើង​ដល់​៥០​ នាក់​នៅ​ក្នុង​គ្រោះ​មហន្តរាយ​អាក្រក់​បំផុត​របស់​យោធា​ហ្វីលីពីន។​ នេះ ​បើ​តាម​ទីភ្នាក់ងារ​សារ​ព័ត៌មាន​ AP។​

មន្រ្តី​យោធា​និយាយ​ថា យន្តហោះ​ Lockheed C-130 Hercules ​បាន​ដឹក​កងទ័ព​៩៦​នាក់​ នៅ​ពេល​ដែល​វា​ចុះ​ហោះហួស​ផ្លូវ​នៅ​អាកាស​យានដ្ឋាន​ Jolo ​ក្នុង​ខេត្ត ​Sulu។ ​វា​បាន​បុកចម្ការ​ដូង​នៅ​ក្រៅ​អាកាស​យានដ្ឋាន​ និង​បាន​ឆេះ​នៅពេល​ថ្ងៃត្រង់។​ ទាហាន​ និង​អ្នក​ភូមិ​ឃើញ​គ្រោះ​មហន្តរាយ​ដ៏​រន្ធត់​នេះ។​

ទាហាន ​ប៉ូលិស ​និង​អ្នក​ពន្លត់​អគ្គីភ័យ​ បាន​សង្គ្រោះ​បុគ្គលិក​យោធា​ចំនួន​៤៩​ នាក់​ ក្នុង​នោះ​មាន​មួយ​ចំនួន​បាន​លោត​ចុះ​ពី​លើ​យន្តហោះ​មុន​ពេល​វា​ផ្ទុះ​ឆេះ។ មនុស្ស​៧​ នាក់​នៅ​លើដី ​បាន​រងគ្រោះ​ដោយ​បំណែក​យន្តហោះ​ និង​កម្ទេច​កម្ទី ​ហើយ​ពួក​គេ​៣​នាក់​បាន​ស្លាប់។​

វា​គឺ​ជា​យន្តហោះ​មួយ​នៃ​យន្តហោះ​ Lockheed C-130 Hercules ​ចម្បាំង​ពីរ​គ្រឿង​ដែល​សហ​រដ្ឋ​អាមេរិក​ប្រគល់​ឱ្យ​ប្រទេស​ហ្វីលីពីន​ដែល​ជាផ្នែក​មួយ​នៃ​ជំនួយ​យោធា​នៅ​ឆ្នាំ​នេះ។​ ប្រទេស​ហ្វីលីពីន​ជា​សម្ព័ន្ធ​មិត្ត​ចំណាស់​ជាង​គេ​បំផុត​របស់​រដ្ឋាភិបាល​ក្រុង​វ៉ាស៊ីនតោន​ នៅ​អាស៊ី។​

មុន​គ្រោះថ្នាក់​នេះ​ យន្តហោះ​នេះ ​ដឹក​លោក​ឧត្តមសេនីយ៍ទោ​ Romeo Brawner Jr ​ភរិយា ​និង​កូន​៣​ នាក់​ពី​ទីក្រុង​ម៉ានីល​ទៅ​ទីក្រុង ​Cagayan de Oro ​ភាគ​ខាងត្បូង​ជា​កន្លែង​ដែល​លោក​ចូល​រួម​ពិធីក្លាយ​ជា​មេបញ្ជាការ​ថ្មី​ប្រចាំ​តំបន់​នេះ​នៅ​ថ្ងៃ​ចន្ទ។​

អ្នក​ជិះ​យន្តហោះ ​C-130 ​នេះ​ដែល​ធ្វើ​ដំណើរ​ចេញ​ពី​ទីក្រុង​ Cagayan de Oro​ ទៅ​កាន់​ខេត្ត​ Sulu​ គឺ​ជា​កងទ័ព​ដែល​ភាគ​ច្រើន​ជា​ទាហាន​ដែល​ទើបនឹង​ទទួល​ការ​បណ្តុះ​បណ្តាល​ថ្មីៗ​ហើយ​ដែល​ត្រូវ​ទៅ​ប្រយុទ្ធ​ជាមួយ​ពួក​សកម្ម​ប្រយុទ្ធ ​Abu Sayyaf ​នៅ​ភាគខាង​ត្បូង៕

XS
SM
MD
LG