ស.រ.អា.និយាយថា ខ្លួននឹងបិទមូលដ្ឋានជាងដប់នៅអឺរ៉ុប ក្នុងវិធានការដែលក្រសួងការពារជាតិរំពឹងថា នឹងសន្សំលុយបាន៥០០លានដុល្លារក្នុងមួយឆ្នាំ នៅពេលផែនការនោះត្រូវបានអនុវត្តទាំងស្រុង ដោយមិនមានការប៉ះពាល់ដល់សមត្ថភាពខាងយោធារបស់ស.រ.អា.ក្នុងប្រតិបត្តិការឆ្លើយតបនៅអឺរ៉ុបទេ។
មូលដ្ឋាននៅអឺរ៉ុបដែលត្រូវប្រកាសកាលពីថ្ងៃព្រហស្បតិ៍ថា នឹងបិទនោះរួមមានមូលដ្ឋានអាកាស Royal Air Force នៅ Mildenhall ភាគឦសានក្រុងឡុងដ៍។ ការបិទមូលដ្ឋាននេះគឺជាផ្នែកមួយនៃការបិទមូលដ្ឋានធំៗចាប់តាំងពីការបញ្ចប់សង្គ្រាមត្រជាក់មក។ មូលដ្ឋានអាកាសនេះមានប្រតិបត្តិការស៊ើបការណ៍សម្ងាត់ ប្រតិបត្តិការយន្តហោះចម្បាំងពិសេស និងមានបុគ្គលិកយោធា ជាមួយនឹងគ្រួសារទាំងអស់ចំនួន៣២០០នាក់។ ស.រ.អា.ក៏នឹងបិទមូលដ្ឋាន១៤ទៀតនៅអាល្លឺម៉ង់ ប៊ែលហ្សិកនិងហូឡង់ផងដែរ៕
