អនុប្រធានាធិបតីសហរដ្ឋអាមេរិកលោក Mike Pence បាននិយាយនៅថ្ងៃសៅរ៍នេះថា រដ្ឋាភិបាលក្រុងវ៉ាស៊ីនតោន នឹងបន្តធ្វើទៅតាម «កិច្ចព្រមព្រៀងទំនាក់ទំនងកោះតៃវ៉ាន់» ហើយនឹង «គោលនយោបាយចិនមួយ» បន្ទាប់ពីជំនួបជាមួយលោក Morris Chang តំណាងរបស់កោះតៃវ៉ាន់ប្រចាំនៅវេទិការសេដ្ឋកិច្ចក្នុងតំបន់នៅប្រទេស ប៉ាពួញូហ្គីណេ។
លោកអនុប្រធានាធិបតី Pence បានជួបជាមួយលោក Chang នៅខាងក្រៅជំនួបកំពូលកិច្ចសហប្រតិបត្តិការសេដ្ឋកិច្ចតំបន់អាស៊ីនិងមហាសមុទ្រប៉ាស៊ីហ្វិក (APEC) នៅថ្ងៃសៅរ៍នេះនៅក្នុងទីក្រុង Port Moresbyដែលជាជំនួបទ្វេភាគីលើកទី១រវាងមេដឹកនាំកំពូលសហរដ្ឋអាមេរិកនិងបេសកជនរបស់កោះតៃវ៉ាន់ក្នុងអំឡុងពេលនៃជំនួបសេដ្ឋកិច្ចក្នុងកម្រិតខ្ពស់ក្នុងតំបន់ក្នុងរយៈពេលប៉ុន្មានឆ្នាំនេះ។
តាមពួកមន្រ្តីអាមេរិកាំងបានប្រាប់ឲ្យដឹងថា អនុប្រធានាធិបតីអាមេរិកលោក Pence មិនមានគម្រោងជួបទ្វេភាគីដាច់ដោយឡែកជាមួយប្រធានាធិបតីចិន លោកស៊ី ជីន ពីង ដែលកំពុងចូលរួមសន្និសីទកំពូលអង្គការ APECនោះដែរ។ ការណ៍នេះបានត្រូវ គេមើលឃើញថា ជាការឆ្លុះបញ្ចាំងនៃការប្រកាន់គោលនយោបាយរបស់សហរដ្ឋអា មេរិកចំពោះប្រទេសចិន។ ចិនចាត់ទុកកោះតៃវ៉ាន់ដែលគ្រប់គ្រងខ្លួនឯងតាមបែបប្រ ជាធិបតេយ្យជាផ្នែកមួយនៃទឹកដីរបស់ខ្លួន។
ពួកអ្នកវិភាគនិយាយថា ការពង្រឹងចំណងទាក់ទងរវាងសហរដ្ឋអាមេរិកនិងកោះតៃវ៉ាន់មិនប៉ះពាល់ដល់ទំនាក់ទំនងរវាងសហរដ្ឋអាមេរិកនិងចិនទេ។ លោកអនុប្រធានាធិបតី Pence បានប្រាប់អ្នកកាសែតដែលធ្វើដំណើរជាមួយលោកនៅថ្ងៃសៅរ៍នេះថា «សហរដ្ឋអាមេរិក នឹងបន្តធ្វើទៅតាមកិច្ចព្រមព្រៀងទំនាក់ទំនងកោះតៃវ៉ាន់។ កោះតៃវ៉ាន់ជាសមាជិករបស់អង្គការ APEC»៕
