ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​បិទ​រដ្ឋាភិបាល​អាមេរិក​មួយ​ផ្នែក​ឈាន​ចូល​ដល់​ថ្ងៃ​ទី ១០ ហើយ


អ្នក​ទេសចរណ៍​មក​ធ្វើ​ទស្សនកិច្ច​នៅ​វិមានសភា Capitol នៅ​ពេល​មាន​ភ្លៀង​ ក្នុង​រដ្ឋធានី​វ៉ាស៊ីនតោន កាលពី​ថ្ងៃទី២៨ ខែធ្នូ ឆ្នាំ២០១៨។

ការ​បិទ​រដ្ឋាភិបាល​អាមេរិក​មួយ​ផ្នែក​បាន​ឈាន​ចូល​ដល់​ថ្ងៃ​ទី ១០ ហើយ នៅ​ថ្ងៃ​ចន្ទ​នេះ ដោយសារតែ​ការ​ចរចា​រឿង​ចំណាយ​របស់​រដ្ឋាភិបាល​សហព័ន្ធ​នៅតែ​ជាប់​គាំង​រវាង​លោក​ប្រធានាធិបតី Donald Trump និង​គណបក្ស​ប្រជាធិបតេយ្យ ឆ្លង​ចូល​ឆ្នាំ​ថ្មី​ឆ្នាំ ២០១៩។

ការ​បិទ​រដ្ឋាភិបាល​អាមេរិក​មួយ​ផ្នែក​បាន​ឈាន​ចូល​ដល់​ថ្ងៃ​ទី ១០ ហើយ នៅ​ថ្ងៃ​ចន្ទ​នេះ ដោយសារតែ​ការ​ចរចា​រឿង​ចំណាយ​របស់​រដ្ឋាភិបាល​សហព័ន្ធ​នៅតែ​ជាប់​គាំង​រវាង​លោក​ប្រធានាធិបតី Donald Trump និង​គណបក្ស​ប្រជាធិបតេយ្យ ឆ្លង​ចូល​ឆ្នាំ​ថ្មី​ឆ្នាំ ២០១៩។

លោក Trump បន្ត​ទាមទារ​ថវិកា​រាប់​ពាន់​លាន​ដុល្លារ​សម្រាប់​ការ​សាងសង់​ជញ្ជាំង​ព្រំដែន​ជាប់​ប្រទេស​ម៉ិកស៊ិក។ រី​ឯ​សមាជិក​សភា​ខាង​គណបក្ស​ប្រជាធិបតេយ្យ​វិញ​គាំទ្រ​ការ​បង្កើន​ថវិកា​មួយ​ចំនួន​សម្រាប់​ពង្រឹង​សន្តិសុខ​ព្រំដែន​ជា​ទូទៅ ប៉ុន្តែ​បាន​បដិសេធ​យ៉ាង​ដាច់​អហង្ការ​ប្រឆាំង​នឹង​ការ​សាងសង់​ជញ្ជាំង។

កាល​ពី​ថ្ងៃ​អាទិត្យ​ម្សិលមិញ លោក Trump បាន​សរសេរ​នៅ​លើ Twitter ថា គណបក្ស​ប្រជាធិបតេយ្យ «បាន​ចាកចេញ​ពី​រដ្ឋធានី​វ៉ាស៊ីនតោន ហើយ​មិន​ខ្វល់​ពី​សុវត្ថិភាព និង​សន្តិសុខ​របស់​ប្រជាពលរដ្ឋ​អាមេរិកាំង​នោះ​ទេ‍»។

ចំណែក​ឯ​សមាជិក​សភា​ខាង​គណបក្ស​ប្រជាធិបតេយ្យ​វិញ បាន​ឌឺដង​ដាក់​ការ​ចោទ​ប្រកាន់​របស់​លោក Trump។

លោក Hakeem Jeffries សមាជិក​រដ្ឋសភា​ប្រចាំ​រដ្ឋ New York ខាង​គណបក្ស​ប្រជាធិបតេយ្យ បាន​បញ្ជាក់​នៅ​ក្នុង​កម្មវិធី ‍«សប្ដាហ៍​នេះ‍» របស់​ទូរទស្សន៍ ABC ថា៖ «នេះ​គឺ​ជា​ប្រធានាធិបតី​ដែល​ធ្លាប់​សន្យា​ម្ដង​ហើយ​ម្ដង​ទៀត​ជាមួយ​នឹង​ប្រជាពលរដ្ឋ​អាមេរិកាំង​ថា ប្រទេស​ម៉ិកស៊ិក​ជា​អ្នក​ចំណាយ​ថវិកា​សម្រាប់​ជញ្ជាំង​ព្រំដែន ដែល​លោក​គ្រោង​នឹង​សាងសង់​នោះ។ ប៉ុន្តែ ឥឡូវ​នេះ លោក​កំពុង​ព្យាយាម​ទាមទារ​ថវិកា​ចំនួន ៥ ពាន់​លាន​ដុល្លារ​ពី​ពលរដ្ឋ​អាមេរិកាំង​ដែល​ជា​អ្នក​បង់​ពន្ធ​ជូន​រដ្ឋ​ឲ្យ​ចំណាយ​ទៅ​លើ​អ្វី​ដែល​បង្ហាញ​យ៉ាង​ច្បាស់​ថា​នឹង​គ្មាន​ប្រសិទ្ធភាព»។

លោក Dick Durbin សមាជិក​ព្រឹទ្ធសភា​ប្រចាំ​រដ្ឋ Illinois ខាង​គណបក្ស​ប្រជាធិបតេយ្យ បាន​សរសេរ​នៅ​លើ Twiiter ថា៖ «លោក​ប្រធានាធិបតី Trump បាន​យក​ប្រាក់​បៀវត្សរ៍​របស់​បុគ្គលិក​រដ្ឋាភិបាល​សហព័ន្ធ​រាប់​សែន​នាក់​ធ្វើ​ជា​ចំណាប់ខ្មាំង នៅ​ក្នុង​កិច្ច​ប្រឹងប្រែង​ចុងក្រោយ​របស់​លោក​ដើម្បី​បំពេញ​ការ​សន្យា​របស់​ខ្លួន​កាល​ពី​ធ្វើ​យុទ្ធនាការ​ឃោសនា​បោះ​ឆ្នោត‍»៕

XS
SM
MD
LG