ភ្ជាប់​ទៅ​គេហទំព័រ​ទាក់ទង

គណៈកម្មាធិការ​​អចិន្ត្រៃយ៍​សភា​ជ្រើសរើស​បេក្ខជន​បី​នាក់​ជំនួស​សមាជិក​គ.ជ.ប​ ដែល​លាលែង

  • ម៉ែន គឹមសេង

រូបឯកសារ៖ លោក ហេង សំរិន ប្រធាន​រដ្ឋសភា​មក​ពី​គណបក្ស​ប្រជាជន​កម្ពុជា ចូលរូម​ក្នុង​ការអនុម័ត​​សេចក្តី​ស្នើ​ធ្វើ​វិសោធនកម្ម​ច្បាប់​ពាក់ព័ន្ធ នឹង​ការ​បោះ​ឆ្នោត ក្នុង​សំឡេង​៦៧ លើ​៦៧ នៅ​ថ្ងៃទី​១៦ ខែ​តុលា ឆ្នាំ២០១៧។ (កាន់​ ​វិច្ឆិកា/VOA)

លោក រ៉ុង ឈុន ​អតីត​សមាជិក​គណៈ​កម្មាធិការ​ជាតិ​រៀបចំ​ការបោះឆ្នោត​ ដែល​បាន​លាលែង​បាន​ប្រាប់​VOAថា ​ការជ្រើសរើស​នេះ​គឺ​ជា ​ការ​រំលោភ​មាត្រា​ ៦​នៃ​ច្បាប់​ស្តី​ពី​ការ​រៀបចំ​ និង​ការប្រព្រឹត្ត​ទៅ​នៃ​គណៈ​កម្មាធិការ​ជាតិ​រៀបចំ​ការបោះឆ្នោត។

គណៈកម្មាធិការ​អចិន្ត្រៃយ៍​រដ្ឋសភា​បាន​អនុម័ត​បេក្ខជន​បី​នាក់​សម្រាប់​ជំនួសសមាជិកគណៈ​កម្មាធិការ​ជាតិ​រៀបចំ​ការបោះឆ្នោត​(គ.ជ.ប)​ដែល​បាន​លាលែង​ ដើម្បី​ជា​ការ​តវ៉ា​នឹង​ការ​រំលាយ​គណបក្សសង្គ្រោះ​ជាតិ។

លោក​ ហេង សំរិន​ ប្រធាន​រដ្ឋ​សភាជាតិ​បាន​បញ្ជាក់​នៅ​ក្នុង​លិខិត​មួយ​នៅ​ថ្ងៃ​ព្រហស្បតិ៍​នេះ​ថា​បេក្ខជន​ទាំង​បី​នាក់​មាន​លោក​ នុត សុខុម​ មកពី​គណបក្ស​ហ៊្វុនស៊ីនប៉ិច ​លោក ឌឹម សុវណ្ណារុំ ​ប្រធាន​ផ្នែក​កិច្ចការ​សាធារណៈ​នៃ​សាលា​ក្តី​ខ្មែរ​ក្រហម​ និង​ជា​អនុប្រធាន​គណៈ​កម្មាធិការ​សិទ្ធិ​មនុស្ស​កម្ពុជា​ និង​លោក​ ហ៊ែល សារ៉ាត់ ​មក​ពី​គណបក្ស​សញ្ជាតិ​កម្ពុជា។

បេក្ខជន​ទាំង​បី​រូប​ត្រូវ​ឆ្លង​កាត់​ការអនុម័ត​យល់ព្រម​ដោយ​សភាជាតិ​ដោយ​សំឡេង​ភាគច្រើន​ដាច់​ខាត​សិន​មុន​នឹង​ក្លាយ​ជា​សមាជិក​ពេញ​សិទ្ធិ​នៃ​គណៈ​កម្មាធិការ​ជាតិ​រៀបចំ​ការបោះឆ្នោត។

លោក ឌឹម សុវណ្ណារុំ​ មិនបាន​បញ្ជាក់​អ្វី​នៅឡើយ​ទេ​ នៅ​ពេល​វីអូអេ​ទាក់ទង​ដោយ​រង់ចាំ​ការ​បោះឆ្នោត​អនុម័ត​ពី​រដ្ឋសភា​សិន។ ​

អតីត​អនុប្រធាន​មួយ​រូប និង​សមាជិក​ពីរ​រូប​ ដែល​ជា​កូតា​គណបក្ស​សង្គ្រោះជាតិ​បាន​សម្រេច​លាលែង​ កាលពី​សប្តាហ៍​មុន​ដោយ​ពួកគេ​មិនយល់ស្រប​នឹង​ការរំលាយ​គណបក្ស​សង្គ្រោះជាតិ​តាម​អំណាច​សាលក្រម​តុលាការ​កំពូល​ និង​យក​អាសនៈ​តំណាងរាស្រ្ត​ និង​ក្រុមប្រឹក្សា​ឃុំសង្កាត់​ទៅ​បែងចែក​ឱ្យ​គណបក្ស​ដទៃ។

គណៈ​កម្មាធិការ​ជាតិ​រៀបចំ​ការបោះឆ្នោត​មាន​សមាជិក​ចំនួន​៩រូប​ដែល​កើតឡើង​ក្រោម​ការ​ព្រម​ព្រៀង​នយោបាយ​រវាង​គណបក្ស​ប្រជាជន​កម្ពុជា ​និង​គណបក្ស​សង្គ្រោះ​ជាតិ​ ក្រោយការបោះឆ្នោត​ជាតិ​ឆ្នាំ​ ២០១៣។

លោក រ៉ុង ឈុន ​អតីត​សមាជិក​គណៈ​កម្មាធិការ​ជាតិ​រៀបចំ​ការបោះឆ្នោត​ ដែល​បាន​លាលែង​បាន​ប្រាប់​VOAថា ​ការជ្រើសរើស​នេះ​គឺ​ជា ​ការ​រំលោភ​មាត្រា​ ៦​នៃ​ច្បាប់​ស្តី​ពី​ការ​រៀបចំ​ និង​ការប្រព្រឹត្ត​ទៅ​នៃ​គណៈ​កម្មាធិការ​ជាតិ​រៀបចំ​ការបោះឆ្នោត។ លោក​ថា​ នៅ​ពេល​នោះ​គឺ ​មាន​គណបក្ស​ចំនួន​ពីរ​ហើយ​ការ​ជ្រើសរើស​ផ្អែក​តាម​រូបមន្ត​ ៤+៤+១ ​ដែល​មានន័យ​ថា​ បួន​នាក់​មកពី​គណបក្ស​កាន់​អំណាច​បួន​នាក់​មកពី​គណបក្ស​មិន​នៅ​ក្នុង​រដ្ឋាភិបាល ​និង​មួយ​រូប​មក​ពី​អង្គការ​សង្គម​ស៊ីវិល​ហើយ​នៅ​ពេល​ឥឡូវនេះ​មាន​គណបក្ស​បួន​នៅ​ក្នុង​សភា​ ដូច្នេះ​ត្រូវ​តែ​ធ្វើ​វិសោធនកម្ម​ជាមុន​សិន។​

រូបឯកសារ៖ លោក រ៉ុង ឈុន ​អតីត​សមាជិក​គណៈ​កម្មាធិការ​ជាតិ​រៀបចំ​ការបោះឆ្នោត​ (ឡេង ឡែន/ VOA)
រូបឯកសារ៖ លោក រ៉ុង ឈុន ​អតីត​សមាជិក​គណៈ​កម្មាធិការ​ជាតិ​រៀបចំ​ការបោះឆ្នោត​ (ឡេង ឡែន/ VOA)

លោក រ៉ុង ឈុន បាន​បន្ថែម​ថា៖ «បើ​មិន​ធ្វើ​វិសោធនកម្ម​ទេ​គឺ ​រំលោភ​ហើយ​អាច​ហៅ​ថា ​រំលោភ​បូក‍»។

យ៉ាងណា​ក៏​ដោយ​មាត្រា​ ១១​នៃ​ច្បាប់​នេះ​បាន​ផ្តល់​សិទ្ធិ​ឱ្យ​គណៈកម្មាធិការ​អចិន្ត្រៃយ៍​នៃ​រដ្ឋ​សភា​ជ្រើសរើស​បេក្ខជន​ជំនួស​ក្នុង​ករណី​ដែល​គណបក្ស​នយោបាយ​ខកខាន​មិន​ដាក់​បេក្ខជន​តាម​កាល​កំណត់​ចំនួន​៥ថ្ងៃ។

លោក ​រ៉ុង ឈុន ​បញ្ជាក់​បន្ថែម​ថា៖ «មាត្រា​១១ផ្តល់សិទ្ធិមែន​តែ​មិន​អាច​រំលោភ​មាត្រា​៦ទេ‍»៕

XS
SM
MD
LG