កាលពីថ្ងៃចន្ទម្សិលមិញហាងលក់ទំនិញ សណ្ឋាគារនិងភោគជនីយដ្ឋាននានានៅក្នុងទីក្រុងប៉ារីសបានធ្វើការវាយតម្លៃអំពីការការខូចខាតដោយសារបាតុកម្មអាវកាក់ពណ៌លឿងហិង្សាមួយដែលត្រូវបានធ្វើឡើងម្តងទៀតកាលពីចុងសប្តាហ៍។
រដ្ឋមន្ត្រីក្រសួងហរិញ្ញវត្ថុបារាំងលោក Bruno Le Maire កាលពីថ្លែងចន្ទដោយលោកបានគូសបញ្ជាក់អំពីផលប៉ះពាល់នៅទូទាំងប្រទេសថា «មានផលប៉ះពាល់យ៉ាងខ្លាំងនិងកំពុងបន្តកើតឡើង»។
ភោជនីយដ្ឋានមួយចំនួនបានបាត់បង់ប្រាក់ចំណូលពី២០ទៅ៥០ភាគរយ ហើយហាងលក់ទំនិញខ្លះបានធ្លាក់ចុះការលក់របស់ខ្លួនពី២០ទៅ៤០ភាគរយ។ លោក Le Maire និយាយថាលោកនឹងមានកិច្ចប្រជុំតាមដានជាមួយតំណាងអាជីវកម្មដែលរងផលប៉ះពាល់ដោយបាតុកម្មនេះ។
លោកបានបន្ថែមថាចំនួនកក់សណ្ឋាគារត្រូវបានធ្លាក់ចុះពី១៥ទៅ២៥ភាគរយ។ ហេតុការណ៍នេះត្រូវបានចាប់ផ្តើមដំបូងឡើងដោយបាតុកម្មមួយដែលត្រូវបានរៀបចំឡើងនៅតាមបណ្តាញសង្គមកាលពីថ្ងៃទី១៧ ខែវិច្ឆិកា ដើម្បីតវ៉ាទៅនឹងការដំឡើងពន្ធប្រេង ហើយបន្ទាប់មកបានក្លាយជាក្រុមតវ៉ាធំមួយប្រឆាំងនឹង លោកប្រធានាធិបតី Emmanuel Macron ។ បាតុករជាច្រើនបានពាក់អាវកាក់ខាងក្រៅពណ៌លឿងដែលអ្នកបើកបរបារាំងទុកនៅក្នុងឡានរបស់ពួកគេ។
មនុស្សជិត១០០នាក់រួមទាំងប៉ូលិស១៦នាក់បានរងរបួស ហើយមនុស្សជាង២០០នាក់ត្រូវបានចាប់ខ្លួនបន្ទាប់ពីការតវ៉ាបានក្លាយជាបាតុកម្មហិង្សានៅកណ្តាលទីក្រុងប៉ារីសកាលពីថ្ងៃសៅរ៍កន្លងមក៕
