មន្ត្រីប៉ាឡេស្ទីននិយាយថា ខណៈពលរដ្ឋប៉ាឡេស្ទីនកំពុងតម្រង់ជួរចាំទទួលជំនួយក្នុងតំបន់ហ្កាហ្សានៅព្រលឹមថ្ងៃសុក្រនេះ អ៊ីស្រាអែលបានធ្វើការវាយប្រហារចំនួនពីរលើក ដែលមួយលើកលើតំបន់ហ្កាហ្សាភាគកណ្តាល និងមួយលើកទៀតនៅភាគខាងជើង ដោយសម្លាប់ជនស៊ីវិលអស់ជាច្រើននាក់។
នៅក្នុងការវាយប្រហារដាច់ដោយឡែកពីគ្នាទាំងពីរលើកនេះ មានមនុស្សយ៉ាងតិច២៩នាក់បានស្លាប់ និងជាង១៥០នាក់ផ្សេងទៀតបានរងរបួស ខណៈពួកគេកំពុងចាំទទួលជំនួយ។ នេះបើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស់។
មន្ត្រីសុខាភិបាលប៉ាឡេស្ទីននិយាយថា ក្នុងការវាយប្រហារលើកទី១ មនុស្ស៨នាក់ស្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើមជ្ឈមណ្ឌលផ្តល់ជំនួយមួយកន្លែង នៅក្នុងជំរំជនភៀសខ្លួន al-Nuseirat ក្នុងតំបន់ហ្កាហ្សាភាគកណ្តាល។
ចំណែកក្នុងការវាយប្រហារលើកទី២វិញ មានមនុស្សយ៉ាងហោចណាស់ក៏២១នាក់បានស្លាប់ ហើយមនុស្សជាង១៥០នាក់ផ្សេងទៀតបានរងរបួស ដោយការបាញ់ប្រហាររបស់អ៊ីស្រាអែលទៅលើហ្វូងមនុស្សដែលកំពុងរង់ចាំរថយន្តជំនួយក្នុងតំបន់ហ្កាហ្សាភាគខាងជើង។ នេះបើតាមការឱ្យដឹងរបស់ក្រសួងសុខាភិបាលក្នុងតំបន់ហ្កាហ្សា។
យោធាអ៊ីស្រាអែលនិយាយថា ខ្លួនកំពុងពិនិត្យមើលការវាយប្រហារទាំងពីរលើកនេះ។
ការវាយប្រហារនេះកើតមានឡើងតែ២ថ្ងៃ បន្ទាប់ពីរដ្ឋមន្ត្រីការបរទេសអាមេរិកលោកAntony Blinken និយាយកាលពីថ្ងៃពុធថា អ៊ីស្រាអែលត្រូវរក្សាសុខុមាលភាពជនស៊ីវិលប៉ាឡេស្ទីនជា«ការងារទី១» ក្នុងការធ្វើសង្គ្រាមរបស់ខ្លួនប្រឆាំងនឹងក្រុមហាម៉ាស់ក្នុងតំបន់ហ្កាហ្សា។
កាលពីថ្ងៃព្រហស្បតិ៍ក្រុមសកម្មប្រយុទ្ធហាម៉ាស់និយាយថា ខ្លួនបានផ្តល់ខ្លឹមសារនៃកិច្ចព្រមព្រៀងបទឈប់បាញ់គ្នាមួយ ដល់ក្រុមអ្នកសម្របសម្រួល ដែលអាស្រ័យលើការផ្អាកប្រតិបត្តិការយោធារបស់អ៊ីស្រាអែលក្នុងតំបន់ហ្កាហ្សា និងលក្ខខណ្ឌមួយចំនួនផ្សេងទៀត៕
ខ្លឹមសារខ្លះនៃព័ត៌មាននេះត្រូវបានដកស្រង់ចេញពីទីភ្នាក់ងារសារព័ត៌មាន AP និងទីភ្នាក់ងារ សារព័ត៌មានAFP ។
