ការវាយប្រហារដោយដ្រូនរបស់អ៊ីស្រាអែលលើតំបន់ភាគខាងត្បូងប្រទេសលីបង់នៅថ្ងៃពុធនេះបានសម្លាប់មនុស្ស ២ នាក់ ដែលក្នុងនោះរួមទាំងសមាជិកម្នាក់នៃក្រុមសកម្មប្រយុទ្ធហាម៉ាស់ (Hamas) ផងដែរ។
ការវាយប្រហារនេះបានត្រូវចំរថយន្តមួយគ្រឿងនៅខាងក្រៅទីក្រុង Tyre ជិតមាត់សមុទ្រមេឌីទែរ៉ាណេ។ ប្រព័ន្ធផ្សព្វផ្សាយរដ្ឋរបស់ប្រទេសលីបង់បានរាយការណ៍ថាសមាជិកក្រុមហាម៉ាស់នោះមកពីជំរំជនភៀសខ្លួន Rashidieh ដែលស្ថិតនៅតំបន់មួយដែលក្រុមសកម្មប្រយុទ្ធហាម៉ាស់មានវត្តមានគួរឱ្យកត់សម្គាល់។
យោធាអ៊ីស្រាអែលក៏បានបញ្ជាក់ផងដែរនៅថ្ងៃពុធនេះថាខ្លួនបានវាយប្រហារតាមអាកាសលើទីក្រុង Khan Younis នៅភាគខាងត្បូងតំបន់ហ្កាហ្សា (Gaza) និងវាយប្រហារតាមផ្លូវគោកនៅក្នុងផ្នែកកណ្ដាលនៃតំបន់ហ្កាហ្សា នៅពេលដែលពួកគេបន្តធ្វើតាមគោលបំណងរបស់រដ្ឋាភិបាលអ៊ីស្រាអែលក្នុងការកម្ទេចក្រុមហាម៉ាស់។
ក្រសួងសុខាភិបាលដែលគ្រប់គ្រងដោយក្រុមហាម៉ាស់នៅក្នុងតំបន់ហ្កាហ្សាបានរាយការណ៍នៅថ្ងៃពុធនេះថា ពលរដ្ឋប៉ាឡេស្ទីន ៨៨ នាក់បន្ថែមទៀតត្រូវបានសម្លាប់នៅក្នុងការវាយប្រហាររបស់អ៊ីស្រាអែលក្នុងអំឡុងពេលមួយថ្ងៃកន្លងមកនេះ។
ចាប់តាំងពីពេលដែលសង្គ្រាមបានចាប់ផ្ដើមកាលពីដើមខែតុលាឆ្នាំមុនមក ពលរដ្ឋប៉ាឡេស្ទីនយ៉ាងតិច ៣១.២៧២ នាក់ត្រូវបានសម្លាប់ និង ៧៣.០០០ នាក់ទៀតរងរបួស។ នេះបើយោងតាមក្រសួងសុខាភិបាលនៅតំបន់ហ្កាហ្សា។
កាលពីយប់ថ្ងៃអង្គារ កងទ័ពអ៊ីស្រាអែលបានបាញ់សម្លាប់ជនជាតិប៉ាឡេស្ទីន ២ នាក់នៅក្នុងភូមិ al-Jib ជិតទីក្រុងហ្សេរុយសាឡិម បន្ទាប់ពីប៉ូលិសអ៊ីស្រាអែលបាននិយាយថា ជនជាតិប៉ាឡេស្ទីន ៥ នាក់បានគ្រវែងគ្រាប់បែកភ្លើងដាក់ផ្លូវល្បឿនលឿនមួយកន្លែង។
ប្រធានាធិបតីសហរដ្ឋអាមេរិកលោក Joe Biden បាននិយាយកាលពីថ្ងៃអង្គារថា លោក «តក់ស្លុត» ដែលដឹងថាទាហានអ៊ីស្រាអែលដើមកំណើតអាមេរិកអាយុ ១៩ ឆ្នាំម្នាក់ឈ្មោះ Itay Chen ត្រូវបានសម្លាប់។ ដំបូងគេជឿថា លោក Chen ត្រូវបានក្រុមហាម៉ាស់ចាប់ធ្វើជាចំណាប់ខ្មាំង ប៉ុន្តែយោធាអ៊ីស្រាអែលបានប្រកាសនៅសប្ដាហ៍នេះថា លោកត្រូវបានសម្លាប់ក្នុងអំឡុងការវាយប្រហាររបស់ក្រុមហាម៉ាស់លើអ៊ីស្រាអែលកាលពីថ្ងៃទី ៧ ខែតុលាឆ្នាំមុន៕
ប្រធានការិយាល័យ VOA ប្រចាំសេតវិមានអ្នកស្រី Patsy Widakuswara រួមចំណែកនៅក្នុងសេចក្ដីរាយការណ៍នេះ។ ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
វេទិកាបញ្ចេញមតិ