យោធាអ៊ីស្រាអែលបានបញ្ជាក់នៅថ្ងៃអង្គារនេះថា ខ្លួនបានវាយប្រហារតាមអាកាសដើម្បីបំផ្លាញកាំភ្លើងបាញ់រ៉ុក្កែត ៣ ដើមដែលត្រូវបានប្រើដើម្បីបាញ់រ៉ុក្កែតមួយចំនួនក្នុងចំណោមរ៉ុក្កែតទាំង ១០០ គ្រាប់ដែលបាញ់ចេញពីប្រទេសលីបង់ឆ្ពោះទៅរកតំបន់ Golan Heights ដែលអ៊ីស្រាអែលកាន់កាប់។
អំពើហិង្សាឆ្លងព្រំដែននេះគឺជាជុំថ្មីទៀតនៃការប្រយុទ្ធគ្នាជាបន្តដោយមិនប្រែប្រួលដែលបានបង្កឱ្យអន្តរជាតិមានក្ដីកង្វល់ថាសង្គ្រាមរវាងអ៊ីស្រាអែលនិងក្រុមហាម៉ាស់ (Hamas) នៅក្នុងតំបន់ហ្កាហ្សា (Gaza) នេះអាចរីករាលដាលចូលទៅផ្នែកផ្សេងទៀតនៃតំបន់នេះ។
អ៊ីស្រាអែលក៏បានបញ្ជាក់នៅថ្ងៃអង្គារនេះផងដែរថាខ្លួនបានវាយប្រហារថ្មីតាមអាកាសនៅក្នុងតំបន់ទីក្រុង Khan Younis នៅភាគខាងត្បូងតំបន់ហ្កាហ្សា នៅពេលដែលខ្លួនជំរុញទៅមុខនូវយុទ្ធនាការដើម្បីកម្ទេចក្រុមសកម្មប្រយុទ្ធហាម៉ាស់។
ស្របពេលដែលអង្គការសហប្រជាជាតិព្រមានអំពីវិបត្តិស្បៀងអាហារកើនឡើងនៅក្នុងតំបន់ហ្កាហ្សា កប៉ាល់មួយគ្រឿងដែលដឹកជំនួយ ២០០ តោនបានចាកចេញពីប្រទេសស៊ីបនៅថ្ងៃអង្គារនេះឆ្ពោះទៅតំបន់ហ្កាហ្សាដើម្បីផ្ដល់ជំនួយតាមផ្លូវសមុទ្រ។
គម្រោងនេះគឺជាកិច្ចសហប្រតិបត្តិការរវាងប្រទេសអេមីរ៉ាតអារ៉ាប់រួម អង្គការសប្បុរសធម៌ Open Arms របស់អេស្ប៉ាញ និងអង្គការជំនួយមនុស្សធម៌ World Central Kitchen។
អ៊ីស្រាអែលបានលើកឡើងកាលពីថ្ងៃចន្ទថា ការវាយប្រហារតាមអាកាសនៅក្នុងតំបន់ហ្កាហ្សាកាលពីចុងសប្ដាហ៍កន្លងទៅនេះបានសំដៅលើមេដឹកនាំយោធាជាន់ខ្ពស់ម្នាក់របស់ក្រុមហាម៉ាស់ ប៉ុន្តែខ្លួននៅព្យាយាមកំណត់ថាតើមេដឹកនាំយោធានោះត្រូវបានសម្លាប់ឬក៏អត់៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
