ជនជាតិប៉ាឡេស្ទីនបាននិយាយថាពួកគេគ្មានអារម្មណ៍រីករាយនោះទេនៅថ្ងៃបុណ្យណូអែលនេះ ដោយសារតែអ៊ីស្រាអែលបានបាញ់ផ្លោងដាក់តំបន់ហ្កាហ្សានៅថ្ងៃចន្ទនេះដោយមិនដឹងថាសង្គ្រាមដែលក្រុមហាម៉ាស់អះអាងថា បានសម្លាប់មនុស្សជាង ២០.០០០ នាក់ នេះនឹងបញ្ចប់នៅពេលណានោះទេ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌ មាន AFP។
ការប្រារព្ធពិធីបុណ្យណូអែលដ៏សប្បាយរីករាយនេះត្រូវបានលុបចោលនៅក្នុងទីក្រុង Bethlehem នៃតំបន់ West Bank ដែលជាកន្លែងដែលគេគោរពចាត់ទុកជាទីកន្លែងកំណើតរបស់ព្រះយេស៊ូគ្រិស្ត ដោយមានអ្នកបន់ស្រន់ឬក៏អ្នកទេសចរតិចតួចប៉ុណ្ណោះនៅតាមដងផ្លូវដែលជាទូទៅពោរពេញដោយមនុស្ស។
នៅក្នុងតំបន់ហ្កាហ្សា ក្រសួងសុខាភិបាលដែលគ្រប់គ្រងដោយក្រុមហាម៉ាស់បានបញ្ជាក់នៅព្រឹកថ្ងៃចន្ទនេះថា ការវាយប្រហាររបស់អ៊ីស្រាអែលបានធ្វើឱ្យមនុស្សយ៉ាងតិច១៨នាក់ស្លាប់នៅក្នុងទីក្រុង Khan Yunis នៅភាគខាងត្បូង។ ទីក្រុងនេះគឺជាចំណុចកណ្ដាលនៃការប្រយុទ្ធគ្នានៅពេលថ្មីៗនេះ។
នៅឯមន្ទីរពេទ្យមួយកន្លែងនៅក្នុងទីក្រុង លោក Fadi Sayegh ដែលក្រុមគ្រួសាររបស់លោកធ្លាប់បានទទួលការអនុញ្ញាតឱ្យធ្វើដំណើរទៅកាន់ទីក្រុង Bethlehem ដើម្បីប្រារព្ធបុណ្យគ្រឹស្ត ម៉ាសបាននិយាយថាលោកនឹងមិនប្រារព្ធពិធីបុណ្យនេះទេនៅឆ្នាំនេះ។
លោកបាននិយាយនៅពេលដែលលោកកំពុងទទួលការព្យាបាលដោយលាងឈាមថា៖ «គ្មានភាពរីករាយអ្វីទេ។ គ្មានដើមឈើលំអសម្រាប់បុណ្យណូអែលទេ។ គ្មានការញ៉ាំអាហារពេលល្ងាចជាមួយក្រុមគ្រួសារទេ។ គ្មានការប្រាព្ធអ្វីទាំងអស់។ ខ្ញុំបន់ឱ្យសង្គ្រាមនេះចប់ឱ្យឆាប់ៗ»។
សង្គ្រាមនេះបានផ្ទុះឡើងនៅពេលដែលយុទ្ធជនក្រុមហាម៉ាស់បានវាយ ប្រហារអ៊ីស្រាអែលកាលពីថ្ងៃទី ៧ ខែតុលានិងបានសម្លាប់មនុស្សប្រហែល ១.១៤០ នាក់ដែលភាគច្រើនជាជនស៊ីវិល និងបានចាប់មនុស្ស ២៥០ នាក់ធ្វើជាចំណាប់ខ្មាំង។ នេះបើយោងតាមតួលេខរបស់ទីភ្នាក់ងារសារព័ត៌មាន AFP ដែលផ្អែកលើតួលេខរបស់អ៊ីស្រាអែល។
ដើម្បីជាការតបតទៅវិញ អ៊ីស្រាអែលបានសន្យាកម្ទេចក្រុមហាម៉ាស់និងយុទ្ធនាការយោធារបស់ក្រុមនេះ ដែលរួមមានទាំងការទម្លាក់គ្រាប់បែកតាមអាកាសដ៏ខ្លាំងក្លាផងដែរ។
យុទ្ធនាការនេះបានធ្វើឱ្យមនុស្ស ២០.៤២៤ នាក់ស្លាប់ ដែលភាគច្រើនជាស្ត្រីនិងកុមារ។ នេះបើយោងតាមក្រសួងសុខាភិបាលតំបន់ហ្កាហ្សា។
សម្ដេចប៉ាប Francis បានចាប់ផ្ដើមប្រារព្ធពិធីបុណ្យណូអែលជាសាកលកាលពីថ្ងៃអាទិត្យដោយការអំពាវនាវឱ្យមានសន្តិភាព។
ព្រះអង្គបានថ្លែងថា៖ «ពួកយើងមានអារម្មណ៍អាណិតអាសូរចំពោះតំបន់ហ្កាហ្សា ប្រជាជនទាំងអស់នៅក្នុងតំបន់ហ្កាហ្សា ប៉ុន្តែមានអារម្មណ៍អាណិតអាសូរជាពិសេសចំពោះសហគមន៍គ្រិស្តសាសនារបស់យើងនៅក្នុងតំបន់ហ្កាហ្សាដែលកំពុងរងការឈឺចាប់»៕
