ក្រុមអ្នកជំនាញថា នៅពេលនេះយុទ្ធនាការយោធាអ៊ីស្រាអែលក្នុងតំបន់ហ្កាហ្សានាំឱ្យមានមនុស្សស្លាប់ច្រើនបំផុត និងមានការបំផ្លិចបំផ្លាញច្រើនបំផុតក្នុងប្រវត្តិសាស្ត្រ។
ក្នុងរយៈពេលតែជាងពីរខែ ការវាយលុកនេះបានបណ្តាលឱ្យមានការបំផ្លិចបំផ្លាញច្រើនជាងការកម្ទេចក្រុង Aleppo នៅស៊ីរីពីឆ្នាំ ២០១២ ដល់ ២០១៦ ច្រើនជាងការខូចខាតនៅក្រុង Mariupol នៅអ៊ុយក្រែន និងការទម្លាក់គ្រាប់បែករបស់ពួកសម្ព័ន្ធមិត្តក្នុងប្រទេសអាល្លឺម៉ង់ក្នុងសង្គ្រាមលោកលើកទី ២។ ការវាយលុកនេះបានសម្លាប់ជនស៊ីវិលច្រើនជាងយុទ្ធនាការយោធារបស់ក្រុមចម្រុះដឹកនាំដោយសហរដ្ឋអាមេរិកបីឆ្នាំប្រឆាំងនឹងក្រុមរដ្ឋឥស្លាម។
កងយោធាអ៊ីស្រាអែលបាននិយាយតែបន្តិចបន្តួចអំពីប្រភេទគ្រាប់បែកនិងគ្រាប់កាំភ្លើងធំដែលខ្លួនប្រើនៅហ្កាហ្សា។ តែដោយពិនិត្យកម្ទេចគ្រាប់ទាំងនោះដែលត្រូវបានរកឃើញនៅនឹងកន្លែងនិងដោយវិភាគវីដេអូនៃការវាយប្រហារ ក្រុមអ្នកជំនាញយល់ថា គ្រាប់បែកភាគច្រើនត្រូវទម្លាក់លើកន្លែងឡោមព័ទ្ធ គឺផលិតនៅអាមេរិក។ ពួកគេនិយាយថា អាវុធទាំងនេះមានរួមគ្រាប់បែក«ទម្លាយត្រង់សេ»ទម្ងន់៩០០គីឡូក្រាម ដែលសម្លាប់មនុស្សរាប់រយនាក់ក្នុងតំបន់មានមនុស្សរស់នៅច្រើន៕
