អង្គការក្រៅរដ្ឋាភិបាលចំនួន ៣៣ នៅក្នុងប្រទេសកម្ពុជា បានបង្ហាញការព្រួយបារម្ភរបស់ពួកគេចំពោះសុវត្ថិភាពនិងសុខុមាលភាពកុមារ ដែលជាក្រុមងាយរងគ្រោះមួយ ក្នុងពេលមានការរាតត្បាតនៃជំងឺកូវីដ១៩។ នេះបើយោងតាមសេចក្តីថ្លែងការណ៍រួមមួយរបស់អង្គការទាំងនេះ ដែលបានចេញផ្សាយនៅថ្ងៃសុក្រ ទី ៨ ខែឧសភា។
អង្គការសង្គមស៊ីវិលទាំងនេះលើកឡើងថា ដោយបច្ចុប្បន្នមានការរំលោភបំពានតាមរូបភាពផ្សេងៗតាមបណ្តាញអ៊ីនធើណិត កុមារប្រឈមនឹងហានិភ័យខ្ពស់ចំពោះសុវត្ថិភាពរបស់ពួកគេ នៅពេលដែលកុមារទាំងនេះ ត្រូវប្រើប្រាស់ប្រព័ន្ធបច្ចេកវិទ្យាដែលគ្មានការការពារត្រឹមត្រូវ សម្រាប់ការសិក្សាពីផ្ទះរៀងៗខ្លួនតាមប្រព័ន្ធអេឡិចត្រូនិក ក្រោយពីសាលារៀនបិទទ្វារ។
ក្នុងពេលមានវិបត្តិរីករាលដាលនៃជំងឺកូវីដ១៩ សិស្សានុសិស្សនិងគ្រូត្រូវតម្រូវឲ្យរៀន និងបង្រៀនពីចម្ងាយ ដោយប្រើប្រាស់ប្រព័ន្ធអេឡិចត្រូនិក។
ក្រៅពីបង្ហាញការគាំទ្រចំពោះវិធានការរបស់ក្រសួងអប់រំពេលមានវិបត្តិកូវីដ១៩នេះ សេចក្តីថ្លែងការណ៍របស់អង្គការសម្ព័ន្ធសិទ្ធិកុមារ ដែលជាសម្ព័ន្ធអង្គការជាតិ និងអន្តរជាតិទាំងនេះ បាននិយាយថា សុខុមាលភាពកុមារក៏ប្រឈមនឹងហានិភ័យទាំងក្នុង និងក្រោយពេលមានវិបត្តិសុខភាពសាធារណៈជាសកលនេះដែរ ដោយសារពួកគេ ត្រូវចំណាយពេលច្រើនម៉ោងក្នុងការសិក្សាតាមប្រព័ន្ធអេឡិកត្រូនិក ដែលធ្វើឲ្យប៉ះពាល់ភ្នែកនិងសុខភាពផ្លូវចិត្តកុមារ។
កុមារជាង ៥៣០ នាក់ និងឪពុកម្តាយអាណាព្យាបាលជាង ៣៧០ នាក់ ត្រូវបានពិគ្រោះយោបល់ចំពោះការព្រួយបារម្ភទាំងនេះ។ នេះបើយោងតាមសេចក្តីថ្លែងការណ៍រួមរបស់អង្គការសង្គមស៊ីវិលទាំងនេះ៕
