អ្នកវិភាគនយោបាយកម្ពុជា លោក អ៊ូ វីរៈ បានចូលទៅបំភ្លឺបណ្ដឹងបរិហារកេរ្តិ៍របស់គណបក្សប្រជាជនកម្ពុជា ដោយលោកបានបដិសេធរាល់ការចោទប្រកាន់នៅក្នុងបណ្តឹងបរិហារកេរ្តិ៍នោះ។ ប៉ុន្តែអ្នកនាំពាក្យគណបក្សគ្រប់គ្រងប្រទេសថ្លែងថា តុលាការនៅមានសិទ្ធិពិនិត្យលើបណ្តឹងនេះបន្តទៀត។
លោក អ៊ូ វីរៈ ប្រធានវេទិកាអនាគត ដែលជាមជ្ឈមណ្ឌលសិក្សាស្រាវជ្រាវគោលនយោបាយក្នុងស្រុក នៅថ្ងៃព្រហស្បតិ៍នេះ បានស្នើឲ្យតុលាការក្រុងភ្នំពេញ ទម្លាក់ចោលបណ្តឹងបរិហារកេរ្តិ៍របស់គណបក្សគ្រប់គ្រងប្រទេស ដែលបឹ្តងរូបលោកទាក់ទិនសំណុំរឿងស្នេហាលួចលាក់របស់អនុប្រធានគណបក្សសង្គ្រោះជាតិ លោក កឹម សុខា។
លោក អ៊ូ វីរៈ អ្នកវិភាគនយោបាយ បានប្រាប់អ្នកសារព័ត៌មាន បន្ទាប់ពីបានដើរចេញពីតុលាការក្រុងភ្នំពេញ កាលពីព្រឹកថ្ងៃពហស្បតិ៍នេះថា លោកមិនដែលធ្វើការអធិប្បាយ បំភ្លៃរឿងរ៉ាវស្នេហារបស់ លោក កឹម សុខា និងបុគ្គលណាមា្នក់នោះទេ។
លោក វីរៈ ថ្លែងបដិសេធថា៖
«ខ្ញុំបដិសេធ ហើយខ្ញុំមិនបាននិយាយស្នេហាឯកជនទេ ដោយសារអញ្ចឹងបានខ្ញុំបដិសេធ ហើយខ្ញុំក៏បានស្នើឲ្យព្រះរាជអាជ្ញា មិនចាត់ការតម្កល់ករណីហ្នឹងហើយមិនចាត់ការករណីនេះទេ»។
កាលពីខែមេសាកន្លងទៅ គណបក្សប្រជាជនកម្ពុជា របស់លោកនាយករដ្ឋមន្ត្រី ហ៊ុន សែន បានដាក់ «ពាក្យបណ្តឹងបរិហារកេរ្តិ៍» ទៅសាលាដំបូងរាជធានីភ្នំពេញ ប្រឆាំងនឹងលោក អ៊ូ វីរៈ បន្ទាប់
ពីលោកបានផ្តល់ការអធិប្បាយដល់វិទ្យុមួយ ពាក់ព័ន្ធទៅនឹងសំណួរអំពីស្នេហាលួចលាក់របស់លោក កឹម សុខា និងផលប្រយោជន៍នយោបាយ។
យោងទៅតាមពាក្យបណ្តឹងដែលបានដាក់ដោយគណបក្សប្រជាជនកម្ពុជា កាលពីថ្ងៃទី២៥ ខែមេសា ឆ្នាំ២០១៦ គណបក្សកាន់អំណាចនេះ បានចោទ លោក អ៊ូ វីរៈ ថាបានបំភ្លៃរឿងរ៉ាវ ស្នេហាបុគ្គលឯកជនរបស់ ឈ្មោះ កឹម សុខា និងនាង ខុម ចាន់តារ៉ាទី ហៅ «ស្រីមុំ» ថាជាយុទ្ធសាស្ត្ររបស់ គណបក្សប្រជាជនកម្ពុជា ដើម្បីទាញយកផលប្រយោជន៍នយោបាយ។ បណ្តឹងនោះ បន្តថា ការណ៍នេះ គឺជាចេតនាបំផ្លើស ទម្លាក់កំហុសដោយអសុទ្ធចិត្ត ដែលនាំឲ្យប៉ះពាល់ដល់កិត្តិយស កិត្តិស័ព្ទ និងជាការបរិហាកេរ្តិ៍ដល់គណបក្សប្រជាជនកម្ពុជា។
លោក សុខ ឦសាន អ្នកនាំពាក្យគណបក្សប្រជាជនកម្ពុជា បានមានប្រសាសន៍បា្រប់ VOA ថា ទោះបីលោក អ៊ូ វីរៈ បដិសេធការថ្លែងរបស់លោកក៏ដោយ តុលាការក្រុងភ្នំពេញនៅមានសិទ្ធិពិនិត្យលើសំណុំរឿងនេះបន្តទៅទៀត។ លោកថ្លែងថា គណបក្សប្រជាជនកម្ពុជាមានភស្តុតាងគ្រប់គ្រាន់សម្រាប់គាំទ្របណ្តឹងបរិហារកេរ្តិ៍នោះ។
លោក សុខ ឦសាន ថ្លែងថា៖
«គាត់មានប្រសាសន៍ថា ម៉េច អាហ្នឹងជា មតិរបស់គាត់ទេ តែសំណុំរឿងវានៅលើដៃតុលាការ។ អញ្ចឹងខ្ញុំពឹងផ្អែកក្នុងនាមជាអ្នករងគ្រោះ ខ្ញុំពឹងផ្អែកតុលាការដើម្បីរកយុត្តិធម៌ឲ្យ។ គាត់និយាយអី និយាយទៅ មិនមែនជាមតិរបស់គាត់ហ្នឹង ជាអ្នកកាត់សេចក្តីទេ គឺនៅលើតុលាការជាអ្នកកាត់សេចក្តី»។
បណ្តឹងរបស់គណបក្សប្រជាជនដែលប្តឹងប្រឆាំងនឹងលោក អ៊ូ វីរៈ បានទាមទារឲ្យលោក អ៊ូ វីរៈ «ផ្តល់សំណង ដែលបានធ្វើឲ្យប៉ះពាល់ដល់កិត្តិយស និងកិត្យានុភាពរបស់គណបក្សប្រជាជនកម្ពុជា ជាទឹកប្រាក់ចំនួន មួយរយលានរៀល ឬ ១០ម៉ឺនដុល្លារអាមេរិក។
លោក អ៊ូ វីរៈ បានប្រាប់ VOA នៅមុនពេលចូលទៅក្នុងតុលាការថា លោកគ្មានឆន្ទៈបង់ប្រាក់សំណងនេះទៅឲ្យគណបក្សកាន់អំណាចនោះទេ។
«ខ្ញុំ ខ្ញុំគ្មានឆន្ទៈក្នុងការបង់លុយនូវអ្វីមួយដែលមិនត្រឹមត្រូវទេ»។
អ្នកវិភាគនយោបាយរូបនេះ បន្ថែមថា លោកនឹងបន្តកិច្ចការអធិប្បាយលើ ដំណើរវិវត្តន៍នយោបាយក្នុងប្រទេសកម្ពុជា និងបន្តការការពារការសម្តែងមតិ។
ការប្តឹងផ្តល់របស់គណបក្សកាន់អំណាច របស់លោកនាយករដ្ឋមន្ត្រី ហ៊ុន សែន គឺធ្វើឡើងក្រោយពេលដែលមានការរិះគន់ជាច្រើនពីអ្នកឃ្លាំមើលការវិវត្តនយោបាយក្នុងប្រទេសកម្ពុជា។ ក្នុងនោះមានការចាប់ខ្លួនមន្ត្រីគណបក្សជំទាស់ និងបណ្តឹងដ៏មានភាពសាំញ៉ាំ ក្នុងករណីទំនាក់ទំនងស្នេហារបស់នាង ខុម ចាន់ដារ៉ាទី ឬស្រីមុំ ក្រោយពីមានការលេចធ្លាយនៃខ្សែអាត់សំឡេងសារសងស្នេហា ដែលគេថា ជាសំឡេងរបស់នាង ខុម ចាន់ដារ៉ាទី និងលោក កឹម សុខា ប្រធានស្តីទីគណបក្សសង្គ្រោះជាតិ។ នាងស្រីមុំ បានឆ្លើយដោយទម្លាក់កំហុសទាំងស្រុងលើលោក កឹម សុខា និងអង្គការសិទ្ធិមនុស្សក្នុងស្រុកមួយ ដែលជួយផ្តល់មេធាវីដល់ខ្លួន។ នាងចោទថា អង្គការសិទ្ធិមនុស្ស Adhoc បានជំរុញឲ្យនាងផ្តល់ចម្លើយក្លែងក្លាយនាពេលកន្លង។ មន្រ្តីសិទ្ធិមនុស្សអាដហុកចំនួនបួននាក់កំពុងជាប់ឃុំ ពាក់ព័ន្ធនឹងសំណុំរឿងខ្សែអាត់សំឡេងសារសងស្នេហាលួចលាក់នេះ។
លោក កែម ឡី អ្នកវិភាគសង្គម ដែលតាមដានសំណុំរឿងលោក អ៊ូ វីរៈ បានប្រាប់ VOA ថា អ្នកនយោបាយ ត្រូវមានការអត់ធ្មត់ទទួលយកការរិៈគន់ ដើម្បីកែលម្អចំណុចអវិជ្ជមានរបស់ខ្លួន ជាជាងការប្រើប្រាស់ស្ថាប័នតុលាការដើម្បីវាយបំបាក់ក្រុមអ្នករិះគន់។
លោក កែម ឡី ថ្លែងប្រាប់ VOA ថា៖
«ការរិះគន់ វាតែងតែមានលើសលោះ អញ្ចឹងទៅណ៎ា ហើយអ្នកដែលប្រើប្រាស់ពាក្យអសីលធម៌មួលបង្កាច់គេ ឬមួយក៏បរិហារកេរ្តិ៍ គួរតែទុកឲ្យសង្គមជាអ្នកអប់រំ សង្គមជាអ្នកឲ្យតម្លៃ ជាជាងយើងប្រើស្ថាប័នតុលាការយកមកប្រើ»។
លោក អ៊ូ វីរៈ និយាយថា អ្នកនយោបាយគណបក្សគ្រប់គ្រងប្រទេស មិនត្រូវផ្តោតខ្លាំងលើសំណុំរឿងបរិហារកេរ្តិ៍នេះ ជាងបញ្ហាប្រឈមដែលប្រជាពលរដ្ឋខ្មែរកំពុងជួបក្នុងពេលបច្ចុប្បន្ននេះ ដូចជា គ្រោះរាំងស្ងួត និងអំពើអយុត្តិធម៌សង្គមផ្សេងទៀតនោះទេ។
យ៉ាងណាក៏ដោយ អ្នកនាំពាក្យតុលាការក្រុងភ្នំពេញ បានបញ្ជាក់ថា តុលាការនឹងបន្តការស៊ើបអង្កេតនៅលើសំណុំរឿងនេះបន្តទៀត៕
