មន្ត្រីគណបក្សសង្គ្រោះជាតិបាននិយាយថា លោកសម រង្ស៊ីនឹងប្តឹងឧទ្ធរណ៍ជំទាស់នឹងសាលក្រមរបស់តុលាការក្រុងភ្នំពេញដែលបានសម្រេចផ្ដន្ទាទោសលោកដោយកំបាំងមុខពីបទ«បរិហារកេរ្តិ៍»ហើយតម្រូវឲ្យប្រធានគណបក្សប្រឆាំងនេះ ផ្តល់សំណងជំងឺចិត្តជាទឹកប្រាក់សរុបចំនួន១៦០លានរៀលទៅលោកហេង សំរិន ប្រធានរដ្ឋសភា និងបង់ចូលថវិការដ្ឋ។
ថ្លែងទៅកាន់ក្រុមអ្នកគាំទ្រនៅឯទីស្នាក់ការគណបក្សនៅថ្ងៃនេះ លោកឃី វណ្ណដេត សមាជិកសភាគណបក្សប្រឆាំង បានបង្ហាញថា សាលក្រមដាក់ទោសទណ្ឌនិងផាកពិន័យនោះមិនសមរម្យទេ ដោយលោកចាត់ទុកថា ជាការភ្ញាក់ផ្អើលមួយ។
មេដឹកនាំគណបក្សជំទាស់ត្រូវរងការប្តឹងពីមេធាវីរបស់លោកហេង សំរិនបន្ទាប់ពីលោកសម រង្ស៊ីបានបង្ហោះរូបភាពវីដេអូមួយលើទំព័រហ្វេសប៊ុករបស់លោកថា តុលាការសម័យរដ្ឋកម្ពុជា ក្នុងទសវត្សរ៍១៩៨០ដែលមានលោកហេង សំរិនជាប្រមុខរដ្ឋនោះ បានកាត់ទោសសម្តេចឪ ព្រះបាទនរោត្តម សីហនុថា ជាជនក្បត់ជាតិ។
សាលក្រមរបស់តុលាការកាត់ទោសលោកសម រង្ស៊ីបានបង្គាប់ឲ្យលោកបង់ប្រាក់ចំនួន១៥០លានរៀលសងជំងឺចិត្តដល់លោកហេង សំរិននិងបង់១០លានរៀលចូលទៅក្នុងថវិកាជាតិដែលសរុបគឺជិត៤ម៉ឺនដុល្លារស.រ.អា.៕
សូមទស្សនាការសម្ភាសន៍ចុងក្រោយរបស់ VOA ជាមួយលោកសម រង្ស៊ី នៅក្រុង Philadelphia សហរដ្ឋអាមេរិក៕
