ប្រធានគណបក្សសង្គ្រោះជាតិ លោក កឹម សុខា នៅថ្ងៃពុធនេះ បានណែនាំឲ្យមេឃុំ ដែលជាប់ឆ្នោតថ្មីនៅស្រុកស្អាង និងស្រុកកោះធំខេត្តកណ្តាល ឱ្យធ្វើការបម្រើរាស្ត្រ ដោយសុចរិត មិនប្រព្រឹត្តអំពើពុករលួយ និងមិនប្រកាន់និន្នាការនយោបាយក្នុងការចាត់ចែងកិច្ចការរដ្ឋបាលថ្នាក់ក្រោមជាតិរបស់ខ្លួន។
លោក កឹម សុខា បានផ្តើមជួបមេឃុំជាប់ឆ្នោតថ្មី និងក្រុមគាំទ្ររបស់គណបក្សប្រឆាំង រយៈពេលបីថ្ងៃក្រោយការបោះឆ្នោតជ្រើសរើសក្រុមប្រឹក្សាឃុំ-សង្កាត់។លទ្ធផលឆ្នោតបឋមដែលផ្សាយដោយ គណៈកម្មាធិការជាតិរៀបចំការបោះឆ្នោត (គ.ជ.ប) ឲ្យដឹងថា បក្សប្រឆាំងដណ្តើមអាសនៈពីបក្សកាន់អំណាចបានជាច្រើន នៅរាជធានីភ្នំពេញ និងខេត្តធំៗ រួមមានខេត្តសៀមរាប កំពង់ចាម បាត់ដំបង និងកំពង់ធំ។
ការចុះជួបក្រុមអ្នកគាំទ្រ និងមេឃុំជាប់ឆ្នោតថ្មីរបស់លោក កឹម សុខា នៅខេត្តកណ្តាល គឺជាផ្នែក មួយនៃដំណើរទស្សនកិច្ចរយៈពេល៧ថ្ងៃរបស់មេបក្សប្រឆាំងរូបនេះ ក្នុងការថ្លែងអំណរគុណដល់រាស្ត្រដែលផ្តល់សេចក្តីទុកចិត្តដល់បក្សប្រឆាំងឲ្យដឹកនាំឃុំ-សង្កាត់។
ថ្លែងទៅកាន់ក្រុមអ្នកគាំទ្រជាច្រើននាក់ នៅឯស្រុកស្អាង ខេត្តកណ្តាល នាព្រឹកថ្ងៃពុធនេះ លោក កឹម សុខា មេដឹកនាំគណបក្សប្រឆាំងថ្លែងថា៖
«គណបក្សសង្គ្រោះជាតិនឹងបង្កើតនូវយន្តការមួយ ដើម្បីតាមដានមើលការអនុវត្តរបស់មេឃុំ ចៅសង្កាត់យើងណ៎ា! ហើយមុននឹងយើងចាប់ថា្នក់គាត់ យើងខ្ញុំនឹងឲ្យលេខទូរស័ព្ទ មានបញ្ហាអីទូរស័ព្ទមកគណបក្ស ឃុំណាដែលថា មេឃុំយើងធ្វើអីមិនស្រួល»។
មេបក្សប្រឆាំងរូបក៏បានបន្ថែមថា គណបក្សសង្គ្រោះជាតិនឹងបង្កើតយន្តការឃ្លាំមើលការបំពេញការងាររបស់មេឃុំ ចៅសង្កាត់ថ្មីរបស់ខ្លួន និងផ្តល់ការបណ្តុះបណ្តាលជំនាញដឹកនាំកិច្ចការរដ្ឋាភិបាល និងការអភិវឌ្ឍភូមិឃុំ។
លោក កឹម សុខាបន្តថា៖
«ប៉ុន្តែមុននឹងយើងចាប់ថ្នាក់គាត់ យើងនឹងបណ្តុះបណ្តាល បង្រៀនគាត់យ៉ាងច្រើនតទៅទៀត មានអ្នកបចេ្ចកទេសអ្នកជំនាញ បណ្តុះបណ្តាលឲ្យគាត់ចេះដឹងទាំងច្បាប់ ទាំងរដ្ឋបាល ទាំងកិច្ចការទូទៅ ក្នុងការគ្រប់គ្រងឃុំសង្កាត់ឲ្យស្ទាត់ជំនាញបងប្អូន»។
ក្នុងពិធីថ្លែងអំណរគុណដល់អ្នកបោះឆ្នោតជូនបក្សប្រឆាំង លោក កឹម សុខា អំពាវនាវឲ្យប្រជាពលរដ្ឋខ្មែរ ដែលមានសិទ្ធិបោះឆ្នោត សម្រេចចិត្តជ្រើសរើសគណបក្សសង្គ្រោះជាតិឲ្យដឹកនាំប្រទេស តាមការបោះឆ្នោតជាតិ ឆ្នាំ ២០១៨ ក្រោយបក្សប្រឆាំងដ៏មួយនេះ ដណ្តើមបានអាសនៈក្រុមប្រឹក្សាឃុំ-សង្កាត់ជិត៥០០ នៅក្នុងការបោះឆ្នោតថា្នក់មូលដ្ឋានឆ្នាំ២០១៧នេះ ដែលកើនពីត្រឹមតែ ៤០អាសនៈកាលពីឆ្នាំ ២០១២។
បើតាមលទ្ធផលបោះឆ្នោតក្រៅផ្លូវការដែលគណបក្សប្រជាជនកម្ពុជា និងគណបក្សសង្គ្រោះជាតិ បានបង្ហាញរៀងៗខ្លួនកាលថ្ងៃចន្ទ ឱ្យដឹងថា ក្នុងចំណោមឃុំ-សង្កាត់សរុបចំនួន១.៦៤៦ ទូទាំងប្រទេស គណបក្សប្រជាជនកម្ពុជាបានទទួលបានឃុំ-សង្កាត់ចំនួន១.១៥៨ ដែលថយចុះពី ១.៥៩២ឃុំ-សង្កាត់ ក្នុងការបោះឆ្នោតឆ្នាំ២០១២។ ឯគណបក្សសង្គ្រោះជាតិប្រកាសថា ខ្លួនទទួលបានឃុំសង្កាត់ជិត៥០០ បើធៀបនឹងការបោះឆ្នោតក្នុងឆ្នាំ២០១២ ដែលគ្រានោះគណបក្សជំទាស់ បានត្រឹមតែចំនួនត្រឹម៤០ឃុំ-សង្កាត់ប៉ុណ្ណោះ បើបូកលទ្ធផលគណបក្សសមរង្ស៊ីនិងគណបក្សសិទ្ធិមនុស្សចូលគ្នា។
លោក កឹម សុខា បានថ្លែងចំអកដល់មតិរិះគន់ជាច្រើនដែលបានលើកឡើងថា គណបក្សប្រឆាំងមិនបានកើនឡើងសំឡេង ខណៈដែលបក្សនេះទទួលបានអាសនៈជិត ៥០០ នៅក្នុងការបោះឆ្នោតក្រុមប្រឹក្សាឃុំ សង្កាត់ ឆ្នាំ ២០១៧។ លោកបានបញ្ចេញប្រតិកម្មដល់របាយការណ៍មួយចំនួន ដែលលោកអះអាងថា បានមកពីក្រុមការងារថ្នាក់មូលដ្ឋានបក្សកាន់អំណាច ដែលបានស្នើឲ្យបញ្ឈប់ការកសាងហេដ្ឋារចនាសម្ព័ន្ធផ្លូវឃុំ ដែលបក្សប្រឆាំងបានឈ្នះ រួចដាក់ការស្តីបន្ទោសលើបក្សប្រឆាំង។ លោក កឹម សុខា និយាយថា ល្បិចកិចកល់បែបនេះ នឹងជួយឲ្យបក្សប្រឆាំងកើនឡើងសំឡេងគាំទ្របន្ថែមទៀត ក្នុងការបោះឆ្នោត ឆ្នាំ ២០១៨។
«គេសរសេរទៅរដ្ឋមន្ត្រីក្រសួងការបរទេស បាទគាត់ជាប្រធានក្រុមការងារហ្នឹង គេថាជាយោបល់ របស់គេ មូលដ្ឋាន គឺថា អាផ្លូវដែលគ្រលីកគ្រលុក ដែលធ្លាក់ ដែលផុង ដែលនេះអីទុកទៅណ៎ា ដែលគណបក្សសង្គ្រោះជាតិ ទុកទៅ ទុកឲ្យប្រជាពលរដ្ឋខឹងគណបក្សសង្គ្រោះជាតិទៅថា ផ្លូវនេះ ផ្លូវនេះគេទុកឲ្យគណបក្សសង្គ្រោះជាតិធ្វើ ហើយគណបក្សសង្គ្រោះជាតិមិនធ្វើ អាហ្នឹងឲ្យប្រជាពលរដ្ឋខឹងគណបក្សសង្គ្រោះជាតិ។ ប៉ុន្តែយល់ច្រឡំហើយ អាអត់ធ្វើហ្នឹងហើយ ដែលរឹតធ្លាក់ច្រើនជាងទៀត ២០១៨ មែនទេបងប្អូន»។
លោក កឹម សុខា ក៏បានរិះគន់បុគ្គលមួយចំនួន ដែលលោកយល់ថា អាចជាតំណាងរាស្ត្រ និងបញ្ញវន្ត ចំពោះការវាយប្រហារដោយវោហារសាស្ត្រនយោបាយមកលើបក្សប្រឆាំង ដែលថា បក្សប្រឆាំងត្រូវរកលុយចំនួន ៥០ម៉ឺនដុល្លារសម្រាប់អភិវឌ្ឍឃុំ ពេលដែលបក្សឈ្នះឆ្នោតគ្រប់គ្រងឃុំ សង្កាត់ទាំងនោះ។
ប្រធានគណបក្សសង្គ្រោះជាតិរូបនេះ អះអាងថា អ្នកទាំងនោះកំពុងធ្វើឲ្យខូចប្រយោជន៍របស់គណបក្សនយោបាយរបស់ពួកគេ។ លោក កឹម សុខា បានបញ្ជាក់ជាថ្មីថា បក្សប្រឆាំងអាចទម្លាក់ថវិកាចំនួន ៥០ម៉ឺនដុល្លារដល់ឃុំសង្កាត់បាន លុះណាតែបក្សប្រឆាំងឈ្នះឆ្នោតឆ្នាំ២០១៨។ ដូច្នេះលោក បានអំពាវនាវដល់ប្រជាពលរដ្ឋខ្មែរ ដែលមានសិទ្ធិបោះឆ្នោត ផ្តល់ការគាំទ្រដល់បក្សប្រឆាំង ដើម្បីឲ្យបក្សនេះមានសំឡេងគ្រប់គ្រាន់សម្រាប់ដឹកនាំប្រទេស។ លោកបានចំអកដល់ក្រុមអ្នកនយោបាយដែលមានទស្សនៈផ្ទុយពីគណបក្សប្រឆាំងថា គណបក្សមិនបានឈ្នះអាសនៈច្រើននោះទេ ទោះជាអាសនៈបក្សប្រឆាំងកើនពីត្រឹមតែ៤០ នៅឆ្នាំ ២០១២ មកដល់ជិត ៥០០នៅឆ្នាំ ២០១៧នេះ។
VOA ព្យាយាមសុំសេចក្តីលោក សុខ ឥសាន អ្នកនាំពាក្យគណបក្សប្រជាជនកម្ពុជា តែមិនទាន់អាចទាក់ទងបាននៅរសៀលថ្ងៃពុធនេះ។ យ៉ាងណាក្នុងបទសម្ភាសន៍ជាមួយ VOA តាមបណ្តាញសង្គមហ្វេសប៊ុកនាពេលថ្មីៗនេះ លោក សុខ ឥសាន អះអាងថា គណបក្សប្រជាជនកម្ពុជា បានចាត់ទុកជ័ជម្នះរបស់បក្សកាន់អំណាចថា ជាការឈ្នះសង្គ្រាមមួយ ហើយថាការបាត់បង់អាសនៈរបស់ខ្លួនទៅបក្សប្រឆាំង គឺជា ការចាញ់សមរភូមិមួយ ពីរប៉ុណ្ណោះ។
«ជារួមយើងឈ្នះ សង្គ្រាមទាំងមូល ក៏ប៉ុន្តែគឺថា ក្នុងការឈ្នះសង្គ្រាមហ្នឹង យើងក៏មានការចាញ់សមរភូមិមួយ ពីរ ដូច្នេះ យើងមិនគិតបញ្ហាហ្នឹងទេ វាជាលក្ខណៈសត្យានុម័ត»។
លោក សុខ ឥសាន ថ្លែងថាគណបក្សប្រជាជនកម្ពុជា គោរពលទ្ធផលបោះឆ្នោត និងមិនជំទាស់ដល់ការផ្ទេរអំណាចពីមេឃុំ ឬចៅសង្កាត់ដែលចាញ់ឆ្នោត ទៅមេឃុំ និងចៅសង្កាត់ថ្មី ដែលទទួលបានការគាំទ្រពីប្រជាពលរដ្ឋ។
«ទីមួយគឺគណបក្សប្រជាជនគោរពលទ្ធផលបោះឆ្នោត បាទ។ ពេលណាដែលគោរពលទ្ធផលបោះឆ្នោត ចេញជាលទ្ធផលជាក់ស្តែងក្រោយពីដែល គ.ជ.ប បានប្រកាសជាផ្លូវការនូវលទ្ធផលនេះហើយ គឺយើងធ្វើទៅតាមនីតិវិធីច្បាប់ ដែលមានចែង នៅក្នុងរដ្ឋធម្មនុញ្ញរបស់យើង ក៏ដូចជាច្បាប់ស្តីពីការបោះឆ្នោត ជ្រើសរើសក្រុមប្រឹក្សាឃុំ សង្កាត់»។
យ៉ាងណាក៏ដោយ អ្នកតាមដានការអភិវឌ្ឍសង្គមនៅកម្ពុជា យល់ឃើញថា ការរីកធំឡើងនៃសំឡេងគាំទ្របក្សប្រឆាំង នៅតាមឃុំ-សង្កាត់ នឹងនាំមកការផ្លាស់ប្តូរ និងការប្រកួតប្រជែងការងារនៅថ្នាក់មូលដ្ឋាន ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ ពង្រឹងសេវារដ្ឋបាលសាធារណៈ និងការពារសុវត្ថិភាពភូមិ ឃុំជាដើម។
លោក យង់ គឹមអេង នាយកមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលើកឡើងថា នៅគ្រាមានការកើនឡើងនៃចំនួនក្រុមប្រឹក្សាឃុំ សង្កាត់មកពីគណបក្សប្រឆាំងនៅតាមឃុំ-សង្កាត់នានា ការផ្លាស់ប្តូរជាវិជ្ជមានមួយនឹងកើតឡើង ព្រោះបក្សកាន់អំណាចមិនអាចសម្រេចការងារអ្វីតែឯកឯងច្រើនបានដូចអាណត្តិមុនៗឡើយ។ សម្រាប់ការបែងចែកថវិកាពីថ្នាក់ជាតិ ក៏លោកមើលឃើញថា នឹងពុំមានឧបសគ្គអ្វីដែរ តែលោកចង់ឃើញការសហការគ្នារវាងមន្ត្រីនៃបក្សដែលទទួលបានការគាំទ្រពីប្រជាពលរដ្ឋ ដើម្បីធ្វើការអភិវឌ្ឍឃុំ សង្កាត់។
លោក យង់ គឹមអេង នាយកមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព៖
«ខ្ញុំថា ប្រហែលជាគិតពីរបៀបធ្វើការ រវាងគណបក្សនយោបាយខុសៗគ្នា នៅក្នុងឃុំ-សង្កាត់ ក៏ដូចជា របៀបធ្វើការរបស់គណបក្សនយោបាយដែលផ្សេងៗគ្នាហ្នឹង ថាតើនឹងសហការគ្នារបៀបម៉េចក្នុងការសម្របសម្រួល ឃុំ សង្កាត់បាទ បើសិនយើងគិតថា យើងជាខ្មែរដូចគ្នា យើងត្រូវតែរួបរួមគ្នាក្នុងការធ្វើឲ្យមានការប្រែប្រួល ជាក់ស្តែងមួយនៅថ្នាក់ឃុំ សង្កាត់»។
លោកបានថ្លែងបន្តថា៖
«ហើយម្យ៉ាងវិញទៀត ចុះបើសិនជា កន្លែងខ្លះអាចថា ស្រុកខ្លះ ខេត្តខ្លះ ប្រធានក្រុមប្រឹក្សាស្រុក ឬក៏ប្រធានក្រុមប្រឹក្សាខេត្តអីខាងគណបក្សអីអញ្ចឹងដែរបាទ។ អញ្ចឹងអានោះ វាត្រូវការសហការគ្នាទៅវិញទៅមកដែរបាទ មិនអាចថាទេ អាចមានការបង្កការលំបាកអី ហូរហែចឹងទេបាទ។ ចឹងអានោះវាងអាច ធ្វើឲ្យមានការសម្បទានគ្នាទៅវិញទៅមកដែរបាទ»។
ក្នុងថ្ងៃពុធដដែលនេះ លោក កឹម សុខា ក៏បានជួបនិងថ្លែងអំណរគុណដល់អ្នកបោះឆ្នោតឲ្យបក្សប្រឆាំងនៅស្រុកកោះធំ។ នៅទីនោះ លោក កឹម សុខា បានអំពាវនាវឲ្យប្រជាពលរដ្ឋបោះឆ្នោតគាំទ្រគណបក្សសង្គ្រោះជាតិ ឲ្យបានឈ្នះដឹកនាំរដ្ឋាភិបាលនៅឆ្នាំ ២០១៨ ផងដែរ។ លោកថា ពេលដែលបក្សប្រឆាំងគ្រប់គ្រងប្រទេស អ្នកទោសមនសិការទាំងឡាយនឹងទទួលបានយុត្តិធម៌ និងសេរីភាព។
ក៏ប៉ុន្តែលោកនាយករដ្ឋមន្ត្រី ហ៊ុន សែន ដែលគេសា្គល់ថា ជាបុរសខ្លាំង បានប្រកាសជារឿយៗថា គ្មានអ្នកនយោបាយរបស់គណបក្សណា ក្រៅតែពីគណបក្សប្រជាជនកម្ពុជា អាចឡើងបន្តតំណែងពីលោកបានទេ៕
