មេដឹកនាំកំពូលម្នាក់នៃគណបក្សសង្គ្រោះជាតិ ដែលកំពុងស្ថិតនៅក្នុងប្រទេសកម្ពុជា គឺលោក កឹម សុខា នៅថ្ងៃអង្គារនេះ បានទៅគោរពវិញ្ញាណក្ខន្ធសពម្តាយក្មេករបស់លោកនាយករដ្ឋមន្ត្រី ហ៊ុន សែន គឺឧបាសិកា ប៊ុន ស៊ាងលី ដែលបានទទួលមរណភាពកាលពីថ្ងៃច័ន្ទ។ នេះបើយោងតាមបណ្តាញសារព័ត៌មានក្នុងស្រុក Freshnews ដែលស្និទ្ធនឹងរដ្ឋាភិបាល។
ការទៅគោរពវិញ្ញាណក្ខន្ធសព ដែលតម្កល់ទុកនៅគេហដ្ឋានរបស់លោក ហ៊ុន សែន នៅក្បែរវិមានឯករាជ្យនេះ កើតឡើងមួយថ្ងៃ ក្រោយពីលោក កឹម សុខា ដែលកំពុងត្រូវបានតុលាការក្រុងភ្នំពេញ ជំនុំជម្រះទោសក្រោមការចោទប្រកាន់ពីបទក្បត់ជាតិ បានផ្ញើសាររំលែកទុក្ខជូនលោក ហ៊ុន សែន និងក្រុមគ្រួសារនៃសពចំពោះមរណភាពនៃម្តាយក្មេករបស់លោកនាយករដ្ឋមន្ត្រី។
នៅថ្ងៃអង្គារនេះ លោកសម រង្ស៊ី មេដឹកនាំកំពូលម្នាក់ទៀតនៃគណបក្សសង្គ្រោះជាតិ ដែលកំពុងស្ថិតនៅក្រៅប្រទេសនោះ បានបង្ហោះសារនៅលើទំព័រហ្វេសប៊ុករបស់លោក ចូលរួមមរណទុក្ខឧបាសិកា ប៊ុន ស៊ាងលី។
សាររបស់លោកសម រង្ស៊ី ចុះហត្ថលេខាថ្ងៃទី៤ ខែឧសភា សរសេរថា៖ «ទោះជាជំហរនយោបាយយើងម្នាក់ៗខុសពីគ្នាយ៉ាងណាក៏ដោយ តែទុក្ខសោកបណ្តាលមកពីមរណភាពមនុស្សដែលយើងស្រឡាញ់ អាចកើតមានដូចគ្នាគ្រប់ពេលវេលា»។
លិខិតរបស់លោក សម រង្ស៊ី បន្តថា៖ «ទោះជាកាលៈទេសៈនយោបាយមិនអនុញ្ញាតក៏ដោយ.... ក៏ខ្ញុំមិនភ្លេចកាយវិការដ៏ប្រពៃរបស់សម្តេច និងក្រុមគ្រួសារចំពោះខ្ញុំ និងក្រុមគ្រួសារខ្ញុំឡើយ»។
កន្លងមក លោក ហ៊ុន សែន ធ្លាប់បានផ្ញើសាររំលែកទុក្ខជូនលោក សម រង្ស៊ី ចំពោះមរណភាពម្តាយក្មេករបស់ប្រធានស្តីទីគណបក្សសង្គ្រោះជាតិនេះ។ រីឯលោក សម រង្ស៊ី ក៏ធ្លាប់ផ្ញើសាររំលែកទុក្ខជូនលោក ហ៊ុន សែន ដែរចំពោះមរណភាពឪពុកម្តាយរបស់លោកនាយករដ្ឋមន្ត្រី៕
