បេក្ខជនជាប់ឆ្នោតជាចៅសង្កាត់រងទី២ នៅសង្កាត់ច្បារអំពៅទី១ក្នុងរាជធានីភ្នំពេញមកពីខាងគណបក្សភ្លើងទៀន បន្តទាមទារឱ្យក្រសួងសុខាភិបាល បញ្ជាក់មូលហេតុឱ្យបានច្បាស់ចំពោះការដកហូតតំណែងរបស់ លោកចេញពីក្របខណ្ឌរដ្ឋ។ លោកចាត់ទុកថាករណីនេះអយុត្តិធម៌សម្រាប់លោក និងមានចរិតនយោបាយជាជាងការអនុវត្តច្បាប់។
កាលពីថ្ងៃទី២១ ខែមិថុនា ឆ្នាំ២០២២ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានចេញសេចក្តីប្រកាសមួយ ដោយសម្រេចដកហូតតំណែងលោក កែវ សុមុនី មន្ត្រីបម្រើការនៅនាយកដ្ឋានសុខភាពផ្លូវចិត្ត និងការបំពានគ្រឿងញៀនចេញពីក្របខណ្ឌក្រសួង ដោយយោងលើហេតុផលច្បាប់វិន័យ ចាប់ពីថ្ងៃទី១៤ ខែមិថុនា តទៅ។ ក្រសួងមិនបានបញ្ជាក់មូលហេតុអ្វីឱ្យច្បាស់ឡើយ។
ការដកហូតតំណែងនេះ កើតឡើងបន្ទាប់ពី លោក កែវ សុមុនី បានឈរឈ្មោះជាបេក្ខជនរបស់គណបក្សភ្លើងទៀនសម្រាប់ការបោះឆ្នោតក្រុមប្រឹក្សាឃុំសង្កាត់អាណត្តិទី៥ និងបានជាប់ឆ្នោតជាចៅសង្កាត់រងទី២ នៅសង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ។
លោក កែវ សុមុនី បានបម្រើការជាមន្ត្រីរាជការអស់រយៈពេល២៧ឆ្នាំមកហើយ។ លោកយល់ថាហេតុផលចម្បងនៅពីក្រោយការបញ្ឈប់លោកពីក្របខណ្ឌ គឺការឈរឈ្មោះរបស់លោកឱ្យគណបក្សភ្លើងទៀន។ លោកជំរុញឱ្យក្រសួងសុខាភិបាលបញ្ជាក់ហេតុផលច្បាប់វិន័យរបស់ក្រសួងសុខាភិបាលឱ្យច្បាស់ ដែលលុបឈ្មោះលោកចេញពីក្របខណ្ឌក្រសួង ដែលលោកបម្រើការជិត៣០ឆ្នាំមកហើយ។
ក្រោយពីទទួលបានលិខិតបញ្ឈប់ លោក កែវ សុមុនី ក៏បានទៅក្រសួងសុខាភិបាល ដើម្បីសុំការបញ្ជាក់ពីរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ប៉ុន្តែលោកថាមកដល់បច្ចុប្បន្ននេះ វាមានរយៈពេលប្រមាណមួយខែហើយ ប៉ុន្តែលោកមិនទាន់ទទួលបានការបញ្ជាក់ច្បាស់លាស់អ្វីឡើយ។
លោកទាមទារឱ្យក្រសួងសុខាភិបាលបញ្ជាក់មូលហេតុឱ្យបានច្បាស់លាស់អំពីការដកហូតតំណែងរបស់រូបលោក។ លោកការពារខ្លួនថាលោកមិនបានធ្វើខុសនីតិវិធីច្បាប់ណាមួយឡើយ ជាពិសេសពាក់ព័ន្ធច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់។ លោកបន្ថែមថាលោកបានសុំច្បាប់ពិសេសរួចរាល់ហើយ មុននឹងធ្វើជាបេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់របស់គណបក្សនយោបាយ។
លោកប្រាប់វីអូអេថា៖ «តាំងពីថ្ងៃលុប មកដល់ឥឡូវមានរយៈពេល១ខែគត់ហើយ។ អត់មានឃើញការឆ្លើយតបអ្វីពីក្រសួងសុខាភិបាលដែលខ្ញុំបានដាក់ស្នើពិនិត្យឡើងវិញ។ អ៊ីចឹង យ៉ាងហោចណាស់ក៏មានការឆ្លើយតបពីក្រសួង ថាការលុបហ្នឹងវាខុសវិន័យរបៀបម៉េច ឱ្យវាច្បាស់លាស់ ដើម្បីឱ្យសាមីខ្លួនដែលរងភាពអយុត្តិធម៌បានទទួលការដឹងឮពិតប្រាកដផង»។
ក្រោយមានករណីដកតំណែងមន្ត្រីរាជការ រដ្ឋលេខាធិការក្រសួងមហាផ្ទៃ លោក សក់ សេដ្ឋា បានចេញសេចក្តីជូនដំណឹងមួយ កាលពីថ្ងៃទី៧ ខែកក្កដា អំពីការស្នើសុំស្ថិតនៅក្រៅក្របខណ្ឌដើមរបស់មន្ត្រីរាជការ ដែលបានជាប់ឆ្នោតជាសមាជិកក្រុមប្រឹក្សាឃុំសង្កាត់អាណត្តិទី៥។ សេចក្តីជូនដំណឹងនោះបញ្ជាក់នូវច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់ ត្រង់មាត្រា៣៧ ដោយថាមន្ត្រីរាជការស៊ីវិល មន្ត្រីតុលាការ កងយោធពលខេមរភូមិន្ទ នគរបាលជាតិ ប្រសិនបើមានបំណងចង់បម្រើការជាសមាជិកក្រុមប្រឹក្សា សាមីខ្លួនត្រូវធ្វើពាក្យតាមឋានានុក្រមទៅសាមីក្រសួង ឬសាមីអង្គភាព ដើម្បីទៅបម្រើការងារក្រៅក្របខណ្ឌដើមក្នុងរយៈពេលនៃអាណត្តិរបស់ក្រុមប្រឹក្សា។ នៅពេលដែលចប់អាណត្តិជាសមាជិកក្រុមប្រឹក្សាឃុំសង្កាត់ សាមីខ្លួនត្រូវធ្វើពាក្យស្នើសុំត្រឡប់មកបម្រើការងារនៅក្រសួង ឬអង្គភាពដើមវិញ ប៉ុន្តែមុខងារ និងមុខតំណែង អាស្រ័យសាមីក្រសួង ឬសាមីអង្គភាព ជាអ្នកសម្រេច។
រដ្ឋលេខាធិការក្រសួងមហាផ្ទៃ លោក សក់ សេដ្ឋា បញ្ជាក់ប្រាប់វីអូអេតាមTelegramនៅថ្ងៃចន្ទនេះថា៖«មន្ត្រីយោធា នគរបាល ពេលចប់អាណត្តិ[ក្រុមប្រឹក្សាឃុំសង្កាត់] ត្រូវដាក់ពាក្យសុំចូលបម្រើការងារនៅអង្គភាពដើមវិញ ចំពោះមុខតំណែងអាស្រ័យអង្គភាពជាអ្នកសម្រេច»។
វីអូអេមិនអាចសុំការអធិប្បាយពីរដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងអ្នកស្រី ឱ វណ្ណឌីន អ្នកនាំពាក្យក្រសួងសុខាភិបាល បាននៅឡើយទេ។
លោក កន សាវាង្ស មន្ត្រីសម្របសម្រួលជាន់ខ្ពស់នៃអង្គការខុមហ្វ្រែល កត់សម្គាល់អំពីច្បាប់ស្តីពីការបោះឆ្នោតក្រុមប្រឹក្សាឃុំសង្កាត់ ត្រង់ច្បាប់ពិសេស ដោយលោកថាប្រសិនបើមន្ត្រីរាជការស៊ីវិល បានសុំច្បាប់ពិសេសក្នុងការចូលរួមនយោបាយ ឬឈរជាបេក្ខភាពឱ្យគណបក្សណាមួយនោះ គឺបុគ្គលនោះមិនប្រឈមនឹងបញ្ហាណាមួយចំពោះតួនាទីរបស់ពួកគេនោះទេ។ ប៉ុន្តែបើក្រសួង ឬអង្គភាព មិនបានបំពេញតាមច្បាប់បញ្ញត្តិនេះទេ នោះមានន័យថាវាជាការរើសអើងផ្នែកនយោបាយ។
លោកថ្លែងថា៖ «ហើយដកគាត់ ដោយមិនមានអនុវត្តតាមនីតិវិធីទេ អាហ្នឹងវាជាការរើសអើងផ្នែកនយោបាយមួយ ដែលមាននិន្នាការនយោបាយ ជាពិសេសការគំរាមកំហែងទៅលើអ្នកដែលធ្វើនយោបាយ ចូលរួមជីវភាពនយោបាយជាមួយគណបក្សប្រឆាំងហ្នឹងហើយ»។
លោក អំ សំអាត នាយករងទទួលបន្ទុកផ្នែកឃ្លាំមើលនៃអង្គការលីកាដូ ថ្លែងថាប្រសិនបើក្រសួងលុបឈ្មោះមន្ត្រីរាជការចេញពីក្របខណ្ឌ ដោយមិនបានបញ្ជាក់ពីមូលហេតុ និងមិនបានបញ្ជាក់ពីកំហុសឆ្គង តាមលក្ខន្តិកៈស្តីពីមន្ត្រីរាជការច្បាស់លាស់ទេ នោះវាប៉ះពាល់សិទ្ធិរបស់ប្រជាពលរដ្ឋ។
លោកថ្លែងថា៖ «ខ្ញុំមានការសោកស្តាយដែរ ពីព្រោះបើសិនជាការបញ្ចប់ក្របខណ្ឌមន្ត្រីរាជការ ដោយសារតែពួកគាត់ចូលរួមជីវភាពនយោបាយ ជាពិសេសអ្នកដែលចូលរួមជីវភាពនយោបាយជាមួយគណបក្សប្រឆាំង ហើយត្រូវបានលុបឈ្មោះចេញពីក្របខណ្ឌមន្ត្រីរាជការ ដោយមិនមានមូលហេតុច្បាស់លាស់ ហើយមិនមានកំហុសឆ្គងតាមលក្ខន្តិកៈស្តីពីមន្ត្រីរាជការទេ អាហ្នឹងវាជាការប៉ះពាល់សម្រាប់ការអនុវត្តសិទ្ធិរបស់ពលរដ្ឋ ពីព្រោះពលរដ្ឋនីមួយៗ មានសិទ្ធិនៅក្នុងការចូលរួមជីវភាពនយោបាយនៃគណបក្សនយោបាយណាមួយ»។
គួរបញ្ជាក់ថាមន្ត្រីនគរបាលម្នាក់ទៀត លោក អេង ស្រូយ ដែលជាប្រធានក្រុមការងារបណ្តោះអាសន្នគណបក្សភ្លើងទៀន ខេត្តត្បូងឃ្មុំ ក៏ត្រូវបានដកហូតមុខតំណែង ឋានន្តរស័ក្តិ និងបណ្តេញចេញពីក្របខណ្ឌនគរបាលជាតិ កាលពីកន្លងទៅផងដែរ។ នេះបើយោងតាមសេចក្តីប្រកាសមួយ ចុះហត្ថលេខាដោយរដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី១៦ ខែមិថុនា ឆ្នាំ២០២២៕
