ប៉ូលិសក្នុងក្រុង Portland រដ្ឋ Oregon ដែលស្ថិតនៅភាគពាយព្យនៃសហរដ្ឋអាមេរិក បានប្រកាសកាលពីយប់ថ្ងៃសៅរ៍ថា ការតវ៉ានៅក្នុងក្រុងនេះគឺជាកុបកម្ម។ ការប្រកាសនេះត្រូវបានធ្វើឡើង បន្ទាប់ពីបាតុករមួយចំនួនគប់ដបភ្លើងនៅតាមដងផ្លូវ។
ប៉ូលិសបានប្រាប់ដល់ហ្វូងបាតុករដែលមានគ្នារាប់រយនាក់ថា ការតវ៉ារបស់ពួកគេត្រូវបានចាត់ទុកថាជាកុបកម្ម និងបានបញ្ជាឲ្យពួកគេបំបែកហ្វូងជាបន្ទាន់។
នៅក្នុងរដ្ឋ Oregon កុបកម្មត្រូវបានគេផ្ដល់និយមន័យថាជាសកម្មភាពរបស់មនុស្សចាប់ពី ៦ នាក់ឡើងទៅ ដែលបង្ក «ភាពចលាចល និងអំពើហិង្សា» ដែលធ្វើឲ្យមាន «ហានិភ័យធ្ងន់ធ្ងរនៃការបង្កឲ្យមានភាពអាសន្នសាធារណៈ»។ វាគឺជាសកម្មភាពខុសច្បាប់សម្រាប់ប៉ូលិសក្នុងរដ្ឋ Oregon ក្នុងការប្រើឧស្ម័នបង្ហូរទឹកភ្នែក លើកលែងតែក្នុងករណីដែលពួកគេប្រើឧស្ម័ននេះទៅលើហ្វូងមនុស្សដែលធ្វើកុបកម្មតែប៉ុណ្ណោះ។
ប៉ូលិសនិយាយថា បាតុករបានគប់ «ដុំភ្លើង» មួយចំនួន ហើយថា យ៉ាងហោចណាស់មានមនុស្សម្នាក់បានរងរបួស។ វីដេអូពីបណ្ដាញសង្គម Twitter របស់ក្រុមបាតុករ និងសមាជិកបណ្ដាញផ្សព្វផ្សាយ បានបង្ហាញនូវបុរសម្នាក់ដែលទំនងជាបាតុករ ឆេះជើងមួយកំណាត់ក្រោម។
វីដេអូផ្សេងទៀតបង្ហាញនូវផ្សែង ដែលអ្នកឃ្លាំមើលបាននិយាយថា គឺជាឧស្ម័នបង្ហូរទឹកភ្នែក ហើរតាមតំបន់ប្រជាជនរស់នៅ។
សកម្មជនក្នុងក្រុង Portland បាននាំគ្នាតវ៉ានៅតាមដងផ្លូវអស់ចំនួន ១០០ ថ្ងៃជាប់ៗគ្នា ដើម្បីបង្ហាញការគាំទ្រចំពោះចលនា «ជីវិតពលរដ្ឋស្បែកខ្មៅមានតម្លៃ» និងដើម្បីតវ៉ាប្រឆាំងនឹងអ្វីដែលពួកគេមើលឃើញថាជាភាពអយុត្តិធម៌សង្គម ដែលបានចាក់ស្រេះនៅក្នុងសហរដ្ឋអាមេរិកអស់រយៈពេលរាប់ទសវត្សរ៍មកហើយ។ ការតវ៉ាមួយចំនួនកន្លងមក មានមនុស្សរាប់ពាន់នាក់ចូលរួម។
សហរដ្ឋអាមេរិកមានការតវ៉ាជាច្រើន ចាប់តាំងពីការស្លាប់របស់លោក George Floyd កាលពីចុងខែឧសភាកន្លងមកនេះមក។ លោក Floyd គឺជាបុរសស្បែកខ្មៅម្នាក់ ដែលបានស្លាប់ក្រោមសមត្ថកិច្ចប៉ូលិសនៅក្នុងទីក្រុង Minneapolis រដ្ឋ Minnesota៕
