ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​ប្រកួត​កីឡា​អូឡាំពិក​រដូវ​រងា​នៅ​ក្នុង​ទីក្រុង Pyeongchang បាន​បញ្ចប់​កាល​ពី​ថ្ងៃ អាទិត្យ


អ្នក​របាំ​សម្តែង​ក្នុង​ពិធី​បិទ​ការ​ប្រកួត​កីឡា​អូឡាំពិក​រដូវ​រងា​ឆ្នាំ២០១៨ នៅ​ស្តាត Pyeongchang កាលពី​ថ្ងៃទី២៥ ខែកុម្ភៈ ឆ្នាំ២០១៨។

ដោយ​ហៅ​ការ​ប្រកួត​កីឡា​អូឡាំពិករដូវ​រងា​នៅ​ទីក្រុង Pyeongchang ថា​ជា​ «ការ​ប្រកួត​កីឡា​បើក​ចំហ​ជើង​មេឃ​ថ្មី» គណៈកម្មាធិការ​កីឡា​អូឡាំពិក​អន្តរជាតិ​បាន​ប្រកាស​ថា កីឡា​អូឡាំពិក​រដូវ​រងា​ឆ្នាំ​២០១៨​នេះ​បាន​បញ្ចប់​កាល​ពី​ថ្ងៃ​អាទិត្យ​ហើយ។

នៅ​ក្នុង​សុន្ទរកថា​ក្នុង​ពិធី​បិទ​ការ​ប្រកួត​កីឡា​នេះ លោក Thomas Bach ដែល​ជា​ប្រធាន​គណៈកម្មាធិការ​រៀបចំ​ការ​ប្រកួត​កីឡា​នេះ​បាន​កោតសរសើរ​ប្រទេស​កូរ៉េខាងជើង​និង​ប្រទេស​កូរ៉េខាងត្បូង​ចំពោះ​ការ​ដើរ​ដង្ហែ​ក្បួន​រួម​គ្នា​ក្នុង​ពិធី​បើក​ការ​ប្រកួត​កីឡា​នេះ ដោយ​និយាយ​ថា «អ្នក​បាន​បង្ហាញ​ថា កីឡា​អាច​ឲ្យ​មនុស្ស​រួបរួម​គ្នា​នៅ​ក្នុង​ពិភពលោក​ដ៏​ផុយស្រួយ​របស់​យើងបាន​យ៉ាង​ដូចម្តេច។ អ្នក​បាន​បង្ហាញ​ថា ​កីឡា​អាច​បង្កើត​ជា​ស្ពាន​ភ្ជាប់​ចំណងទាក់ទង​យ៉ាង​ណា​បាន»។ ​

លោក Bach បាន​ហុច​ទង់ជាតិ​កីឡា​អូឡាំពិក​ទៅ​ឲ្យ​អភិបាលក្រុង ប៉េកាំង ដែល​នឹង​ត្រូវ​ធ្វើ​ជា​ម្ចាស់​ផ្ទះ​នៅ​ឆ្នាំ​២០២២​ខាង​មុខ​នេះ។ រដ្ឋធានី​ចិន​នេះ​នឹង​ក្លាយ​ទៅ​ជា​ទីក្រុង​ដំបូង​បង្អស់​ដែល​នឹង​ធ្វើ​ជា​ម្ចាស់​ផ្ទះ​រៀបចំ​ការ​ប្រកួត​កីឡា​អូឡាំពិក​ទាំង​រដូវ​ក្តៅ​និង​រដូវ​រងា។ ទីក្រុង​ ប៉េកាំង ជា​ម្ចាស់​ផ្ទះ​នៃ​ការ​ប្រកួត​កីឡា​អូឡាំពិក​កាល​ពី​ឆ្នាំ​២០០៨។

ក្រោយ​ពី​ថ្លែង​សុន្ទរកថា​បិទ​ការ​ប្រកួត​កីឡា​អូឡាំពិក​នេះ លោក Bach បាន​ឈរ​ថតរូប​ជាមួយ​នឹង​អត្តពលិក​មួយ​ចំនួន ដោយ​រួម​ទាំង​កីឡាករ​ជិះ​ស្គី​ទឹកកក Pita Taufatofua នៃ​ដែនដី Tonga ដែល​បាន​ចូលរួម​ក្នុង​ពិធី​បើក​និង​បិទ​ការ​ប្រកួត​កីឡា​អូឡាំពិក​ដោយ​មិន​ពាក់អាវ​ បើ​ទោះ​បី​ជា​អាកាសធាតុ​ត្រជាក់​យ៉ាង​ណា​ក៏​ដោយ៕

XS
SM
MD
LG