មន្ត្រីម្នាក់បាននិយាយថា អ្នកទោសប្រាំនាក់ដែលសហរដ្ឋអាមេរិកព្យាយាមដោះដូរជាមួយអ៊ីរ៉ង់បានចាកចេញពីទីក្រុងតេអេរ៉ង់នៅថ្ងៃចន្ទនេះ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានAP។
ទិន្នន័យតាមដានការហោះហើរដែលត្រូវបានវិភាគដោយ AP បានបង្ហាញថាជើងហោះហើរ Qatar Airways បានហោះឡើងនៅអាកាសយានដ្ឋានអន្តរជាតិ Mehrabad នៃទីក្រុង Tehran ដែលត្រូវបានប្រើសម្រាប់ការផ្លាស់ប្តូរនាពេលកន្លងមក។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ភ្លាមៗបន្ទាប់ពីនោះថាជើងហោះហើរបានចាកចេញពីក្រុងតេអេរ៉ង់ហើយ។
នៅពេលមុននោះ ប្រទេសអ៊ីរ៉ង់បានបញ្ជាក់ថា ខ្លួនរំពឹងថាការដោះដូរអ្នកទោសជាមួយសហរដ្ឋអាមេរិកនិងករណីដែលសហរដ្ឋអាមេរិកបញ្ចេញប្រាក់បង្កកចំនួន ៦ ពាន់លានដុល្លាររបស់ខ្លួននឹងធ្វើឡើងនៅថ្ងៃចន្ទនេះ។
អ្នកនាំពាក្យក្រសួងការបរទេសអ៊ីរ៉ង់លោក Nasser Kanaani បាននិយាយក្នុងអំឡុងសន្និសីទកាសែតមួយថា អ៊ីរ៉ង់រំពឹងថានឹងប្រើប្រាក់ដែលបង្កកនៅក្រោមទណ្ឌកម្មរបស់សហរដ្ឋអាមេរិកនេះសម្រាប់គោលបំណងមនុស្សធម៌តែប៉ុណ្ណោះ ហើយប្រាក់នេះនឹងត្រូវផ្ទេរពីគណនីនៅក្នុងប្រទេសកូរ៉េខាងត្បូងទៅកាន់គណនីនៅក្នុងប្រទេសកាតា។
ការដោះលែងមនុស្សចំនួន ១០ នាក់ដែលពាក់ព័ន្ធនៅក្នុងកិច្ចព្រមព្រៀងនេះនឹងធ្វើតាមក្រោយ។
អ្នកនាំពាក្យក្រុមប្រឹក្សាសន្តិសុខជាតិសេតវិមានលោក John Kirby បានប្រាប់ VOA កាលពីសប្ដាហ៍មុនថា រដ្ឋបាលរបស់ប្រធានាធិបតីអាមេរិកលោក Joe Biden សង្ឃឹមថា ការផ្ទេរនេះ ដែលរួមមានពលរដ្ឋអាមេរិកាំង ៥ នាក់ដែលរដ្ឋាភិបាលអាមេរិកថាត្រូវបានឃុំឃាំងដោយអយុត្តិធម៌នៅក្នុងប្រទេសអ៊ីរ៉ង់ នឹងធ្វើឡើង «នៅក្នុងរយៈពេលប៉ុន្មានថ្ងៃខាងមុខនេះ»។
ពលរដ្ឋអាមេរិកាំង ៣ នាក់ដែលស្ថិតនៅក្នុងការដោះដូរនេះត្រូវបានគេបង្ហាញអត្តសញ្ញាណជាសាធារណៈ ដែលនោះគឺលោក Siamak Namazi លោក Emad Shargi និងលោក Morad Tahbaz។ ពួកគេទាំង ៣ រួមទាំងពលរដ្ឋអាមេរិកាំងម្នាក់ក្នុងចំណោមពលរដ្ឋអាមេរិកាំងដែលមិនបញ្ចេញឈ្មោះផ្សេងទៀតត្រូវបានផ្ទេរពីពន្ធនាគារ Evin ក្នុងទីក្រុងតេហេរ៉ង់ទៅកាន់ការឃុំឃាំងក្នុងផ្ទះ។ ចំណែកឯស្ត្រីអាមេរិកាំងម្នាក់ដែលស្ថិតនៅក្នុងកិច្ចព្រមព្រៀងដោះដូរអ្នកទោសនេះផងដែរត្រូវបានឃុំឃាំងក្នុងផ្ទះរួចហើយ។
ប្រាក់របស់អ៊ីរ៉ង់ដែលត្រូវផ្ទេរទៅកាន់គណនីនៅក្នុងប្រទេសកាតានេះត្រូវបានកំណត់សម្រាប់ប្រើក្នុងគោលបំណងមនុស្សធម៌តែប៉ុណ្ណោះ។ រដ្ឋបាលរបស់លោក Biden បានច្រានចោលការរិះគន់ដែលថាអ៊ីរ៉ង់នឹងអាចប្រើប្រាក់ទាំងនោះសម្រាប់គោលបំណងផ្សេង ដោយមន្ត្រីអាមេរិកបាននិយាយថានឹងមានការត្រួតពិនិត្យដើម្បីធានាថាការដកប្រាក់ទាំងនេះគឺសម្រាប់ការទូទាត់ណាដែលត្រូវបានអនុញ្ញាតតែប៉ុណ្ណោះ៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
