ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​អូបាម៉ា​វាយប្រហារ​លោក​ត្រាំ​ក្នុង​ពេល​​ថ្លែង​នៅ​បុណ្យ​សព​លោក John Lewis


អតីត​ប្រធានាធិបតី​លោក​ Barack Obama ថ្លែង​​នៅ​​ពិធី​បុណ្យ​សព​​លោក John Lewis អ្នក​តំណាងរាស្ត្រ​ដែល​ជា​និមិត្តរូប​នៃ​សិទ្ធិ​ពលរដ្ឋ​របស់​សហរដ្ឋ​អាមេរិក នៅ​វិហារ​គ្រិស្តសាសនា Ebenezer Baptist Church ក្នុង​ក្រុង Atlanta កាល​ពី​ថ្ងៃ​ទី​២០ ខែ​កក្កដា ឆ្នាំ​២០២០។

អតីត​ប្រធានាធិបតី​សហរដ្ឋ​អាមេរិក​លោក បារ៉ាក់ អូបាម៉ា (Barack Obama) កាល​ពី​ថ្ងៃ​ព្រហស្បតិ៍ បាន​ថ្លែង​សុន្ទរកថា​ដ៏​ខ្លាំងក្លា​មួយ​នៅ​ពិធី​បុណ្យ​សពលោក John Lewis អ្នក​តំណាងរាស្ត្រ​ដែល​ជា​និមិត្តរូប​នៃ​សិទ្ធិ​ពលរដ្ឋ​របស់​សហរដ្ឋ​អាមេរិក ដោយ​លោក​អូបាម៉ា​បាន​ធ្វើ​ការ​វាយប្រហារ​មិន​ចំៗ​ចំពោះ​លោកប្រធានាធិបតី​ដូណាល់​ត្រាំ ថា​បានធ្វើ​ឲ្យ​ខូចខាត​ដល់​កេរ្តិ៍ដំណែល​ចំពោះ​សិទ្ធិ​ពលរដ្ឋអាមេរិក​ស្បែក​ខ្មៅរបស់​លោក Lewis។​

ពិធី​បុណ្យ​សព​លោក Lewis ដែល​បាន​ដើរ​តួ​សំខាន់​នៅ​ក្នុង​ការ​ជំរុញ​ច្បាប់​សិទ្ធិ​បោះឆ្នោត​កាល​ពី​ឆ្នាំ​១៩៦៥ ត្រូវ​បាន​ធ្វើ​ឡើង​ក្នុង​ថ្ងៃ​តែ​មួយ​ដែល​លោក​ប្រធានាធិបតី​ត្រាំ បាន​សរសេរ​សារ​តាម Twitterលើក​ឡើង​នូវ​គំនិត​អំពី​ការ​ពន្យារ​ការ​បោះឆ្នោត​ជ្រើសរើស​ប្រធានាធិបតី​នៅ​ថ្ងៃទី​៣ ខែ​វិច្ឆិកា។ លោក​ត្រាំ​ក៏​បាន​រិះគន់​ការ​បោះឆ្នោត​ផ្ញើ​តាម​ប្រៃសណីយ៍​ដែល​នេះ​អ្ន​ក​ជំនាញ​ថា​ជា​យុទ្ធសាស្ត្រ​ដើម្បី​មិន​លើក​ទឹក​ចិត្ត​ឲ្យ​ទៅ​បោះឆ្នោត។

អ្នក​នាំ​ពាក្យ​ម្នាក់​នៃ​យុទ្ធនាការរក​សំឡេង​ឆ្នោត​របស់​លោក ត្រាំ លោក Hogan Gidley បាន​ពន្យល់​ថា លោក​ប្រធានាធិបតី គ្រាន់​តែ​ចោទ​សួរ​អំពីភាព​ច្របូល​ច្របល់​ដែល​ពួកគណបក្ស​ប្រជាធិបតេយ្យ​បាន​បង្កើតឡើង នៅ​ពេល​ដែល​ពួកគេ​ទទូច​ចង់​ឲ្យ​មាន​ការ​បោះ​ឆ្នោត​ផ្ញើរ​តាម​ប្រៃសណីយ៍​ទូទាំង​ប្រទេស​តែ​ប៉ុណ្ណោះ។ ពួកគេ​ចង់ប្រើ​ប្រាស់​វីរ៉ុស​កូរ៉ូណា ជា​វិធី​ដើម្បី​ដាក់​ឲ្យ​មាន​ការ​បោះ​ឆ្នោត​តាម​ប្រៃសណីយ៍​ទូទាំង​ប្រទេស ទោះ​ជា​អ្នក​ចុះ​ឈ្មោះ​បោះ​ឆ្នោត​ចង់​ឬ​មិន​ចង់​នោះ។​

លោក​អូបាម៉ា​ថ្លែង​ថា ឥឡូវ​នេះ​ពលរដ្ឋ​អាមេរិក​ស្បែក​ខ្មៅ​អាច​បោះឆ្នោត​បាន​ហើយ ប៉ុន្តែ​ថា «មាន​អ្នក​កំពុង​កាន់​អំណាច​ធ្វើ​អ្វីៗ​គ្រប់យ៉ាង​ដើម្បី​មិន​លើក​ទឹកចិត្តឲ្យ​ពលរដ្ឋទៅ​បោះឆ្នោត​ទេ»។

លោក​អូបាម៉ា​ក៏​បាន​សំដៅ​យោង​ទៅ​វិធានការ​ដើម្បី​ធ្វើ​ឲ្យ​អន់ថយ​ដល់​សេវា​តាម​ប្រៃសណីយ៍​ដែល​ចាំ​បាច់​សម្រាប់​ឲ្យ​ពលរដ្ឋ​អាច​ចូល​រួម​ការ​បោះឆ្នោត​បាន​ដោយ​មិន​ប្រថុយ​នឹង​ការ​ឆ្លង​ជំងឺ​នៅ​ការិយាល័យ​បោះឆ្នោត។

ពិធី​បុណ្យ​សព​លោក John Lewis កាល​ពី​ថ្ងៃ​ព្រហស្បតិ៍​នៅ​ទី​ក្រុង​Atlanta ក៏​មាន​ការ​ចូល​រួម​ពី​លោក​អតីត​ប្រធានាធិបតី​George W. Bush ពី​គណបក្ស​សាធារណរដ្ឋ​និង​លោក​អតីត​ប្រធានាធិបតី​Bill Clinton ពី​គណបក្ស​ប្រជាធិបតេយ្យ៕

តួលេខនៃករណីឆ្លងជំងឺកូវីដ១៩

XS
SM
MD
LG