លោកប្រធានាធិបតីស.រ.អា. បារ៉ាក់ អូបាម៉ា បានវិលត្រឡប់មកកាន់សេតវិមានវិញហើយនៅក្រោយពេលលោកបានបំពេញទស្សនកិច្ចមួយក្នុងទ្វីបអាមេរិកឡាទីនដែលមានការឈប់សំចតមួយក្នុងប្រទេសអាហ្សង់ទីន និងទស្សនកិច្ច ជាប្រវត្តិសាស្ត្រមួយនៅក្នុងប្រទេសគុយបា ដែលនៅទីនោះលោកបានជួបជាមួយលោកប្រធានាធិបតី Raul Castro ផងដែរ។
លោកអូបាម៉ា ភរិយាលោក កូនស្រីពីរនាក់ និងម្តាយក្មេកលោកបានជិះយន្តហោះ Air Force One ចេញពីចំណតយន្តហោះអន្តរជាតិ Ezeiza នៃក្រុង Buenos Aires ហើយបានធ្វើដំណើរមកដល់មូលដ្ឋានរួម Joint Base Andrews នៅខាងក្រៅរដ្ឋធានីវាស៊ីនតោន កាលពីព្រឹកថ្ងៃសុក្រ។ គ្រួសារលោកអូបាម៉ាបានវិលត្រឡប់មកកាន់សេតវិមានដើម្បីចាប់ផ្តើមការប្រុងប្រៀបសម្រាប់ពិធីបុណ្យនៅដំណាច់សប្តាហ៍ដោយមានរួមបញ្ចូលទាំងពិធីរើសពងមាន់ផងដែរ។
នៅក្នុងឱកាសដំណើរទស្សនកិច្ចនេះរបស់លោក លោកអូបាម៉ាបានមានប្រសាសន៍ថា ស.រ.អា.មានការយឺតយ៉ាវក្នុងការនិយាយខ្លាំងៗប្រឆាំងនឹងអំពើឃោរឃៅដែលបានត្រូវប្រព្រឹត្តនៅក្នុងអតីតរបបគ្រប់គ្រងផ្តាច់ការនៃប្រទេសអាហ្សង់ទីន ក៏ប៉ុន្តែថារដ្ឋបាលរបស់លោកនឹង «ប្រឈមមុខនឹងអតីតកាលជាមួយសេចក្តីទៀងត្រង់ និងតម្លាភាព»។
លោកអូបាម៉ាបានមានប្រសាសន៍នៅក្នុងក្រុង Buenos Aires ថា «អ្វីដែលបានកើតមានឡើងនៅទីនេះនៅក្នុងប្រទេសអាហ្សង់ទីនមិនមែនមានតែមួយគត់ក្នុងប្រទេសអាហ្សង់ទីនទេ ហើយវាមិនមែនកម្រិតព្រំដែនតែត្រឹមអតីតកាលនោះឡើយ។ យើងម្នាក់ៗមានការទទួលខុសត្រូវជារៀងរាល់ថ្ងៃក្នុងការធ្វើឱ្យប្រាកដប្រជាថានៅទីណាដែលយើងឃើញអំពើអយុត្តិធម៌ នៅទីណាយើងឃើញមានការរំលោភលើវិធាននៃច្បាប់ ថាយើងជាអ្នកឃើញហេតុការណ៍ដោយផ្ទាល់ប្រកបដោយចិត្តទៀងត្រង់ ថាយើងនិយាយប្រឆាំង ថាយើងពិនិត្យមើលចិត្តរបស់យើងផ្ទាល់ និងមានការទទួលខុសត្រូវក្នុងការធ្វើឱ្យកន្លែងនេះជាកន្លែងល្អប្រសើរជាងមុនសម្រាប់ពួកកូន និងពួកចៅរបស់យើង»។
កាលពីថ្ងៃព្រហស្បតិ៍ លោកអូបាម៉ាបានអញ្ជើញទៅទស្សនាឧទ្យានអនុស្សាវរីយ៍មួយដល់ក្រុមជនរងគ្រោះដោយសារអ្វីដែលហៅថា «សង្គ្រាមកខ្វក់» នៅថ្ងៃខួបឆ្នាំទី៤០នៃការធ្វើរដ្ឋប្រហារដែលបានបន្តុបរបបគ្រប់គ្រងយោធាដ៏ឃោរឃៅមួយ។
លោកប្រធានាធិបតីបានមានប្រសាសន៍ថាគេត្រូវការឱ្យមានសេចក្តីក្លាហានសម្រាប់ឱ្យសង្គមមួយដោះស្រាយការពិត «ដែលនាំមិនឱ្យស្រួលក្នុងចិត្តអំពីផ្នែកខ្មៅងងឹតនៃអតីតកាលរបស់ផងខ្លួន»។
លោកអូបាម៉ាបានមានប្រសាសន៍ថា «ការប្រឈមមុខនឹងឧក្រិដ្ឋកម្មប្រព្រឹត្តដោយពួកមេដឹកនាំរបស់យើងផ្ទាល់ ដោយប្រជារាស្ត្រយើងផ្ទាល់ ដែលអាចនាំឱ្យមានការបែកបាក់គ្នា និងការតប់ប្រមល់ក្នុងចិត្ត ក៏ប៉ុន្តែវាជាការចាំបាច់ដើម្បីធ្វើចលនាទៅមុខក្នុងការកសាងអនាគតមួយដែលមានសន្តិភាព និងភាពសម្បូររុងរឿងនៅក្នុងប្រទេសមួយដែលគោរពសិទ្ធិរបស់ពលរដ្ឋទាំងអស់របស់ផងខ្លួន»៕
