សេចក្តីប្រកាសរបស់សេតវិមានដែលបានចេញផ្សាយនៅថ្ងៃទី២៩ខែមេសា បានលើកឡើងថា មាន«ការបោះជំហានទៅមុខយ៉ាងខ្លាំងមួយ» ក្នុងការអនុវត្តសំណើ ដែលលោក អូបាម៉ាបានប្រកាសកាលពីដើមឆ្នាំនេះ។
លោកប្រធាធិបតីបានជំរុញឲ្យមានការពិនិត្យប្រវត្តិរូបឲ្យបានកាន់តែត្រឹមត្រូវ និងមានប្រសិទ្ធភាព ជាងមុន ដើម្បីធានាថា កាំភ្លើងទាំងនោះនឹងមិនត្រូវបានលក់ឲ្យ«មនុស្សមិនត្រូវឲ្យប្រើកាំភ្លើង» ឧទាហរណ៍ដូចជា ជនដែលមានជំងឺផ្លូវចិត្ត។ ហើយលោកក៏បានកោះហៅឲ្យមានការបង្កើតបច្ចេកវិទ្យាការពារកុំឲ្យកាំភ្លើងធ្លាក់ក្នុងដៃកុមារ ឬទៅក្នុងដៃអ្នកដទៃក្រៅពីម្ចាស់កាំភ្លើង។
ជារៀងរាល់ឆ្នាំ អំពើហិង្សាដោយកាំភ្លើងបានសម្លាប់ប្រជាជនអាមេរិកលើសពី៣០.០០០នាក់ ដែលជាលទ្ធផលនៃករណីអត្តឃាត អំពើហឹង្សាក្នុងគ្រួសារ ឬសកម្មភាពឧក្រិដ្ឋកម្ម ដែលរួមមានអំពើហឹង្សាដោយក្រុមបក្សពួក ឬឧប្បទ្ទវហេតុផ្សេងៗ។ លោកប្រធានាធិបតី និយាយថា សំណើដែលលោកប្រកាសឡើងក្នុងខែមករាអាចដោះស្រាយផ្នែកមួយចំនួននៃបញ្ហាអំពើហិង្សាដោយកាំភ្លើង។
«វិធានការដែលត្រូវបានចាត់ឡើងតាមសុភនិច្ឆ័យមិនអាចបញ្ចៀសការកើតឡើងនៃសោកនាដកម្មបានទាំងអស់ឡើយ ប៉ុន្តែបើបានសូម្បីតែមួយ វាមិនប្រសើរឬ?» លោកប្រធានាធិបតីបានសួរសំនួរនេះក្នុងទំព័រហ្វេសប៊ុករបស់លោក។
លោកស្រី Valerie Jarrett ដែលជាទីប្រឹក្សាប្រធាធិបតីអស់រយៈជាយូរឆ្នាំមកហើយបាននិយាយថា ចំនួននៃការស្លាប់ដោយសារអំពើហិង្សាដោយកាំភ្លើងដ៏គួរឲ្យកត់សម្គាល់ គឺបណ្តាលមកពីអ្នកដទៃ ដែលមិនមែនជាម្ចាស់កាំភ្លើងប្រើប្រាស់កាំភ្លើង។ ជាធម្មតា ករណីទាំងនេះ ពាក់ព័ន្ធនឹងកុមារដែលបានរកឃើញ និងប្រើកាំភ្លើងបាញ់ដោយអចេតនា ឬជនល្មើសប្រើប្រាស់កាំភ្លើងដែលបានមកពីការលួច ឬការជួញដូរអាវុធខុសច្បាប់។
«កាំភ្លើងឆ្លាតវៃ» មានលក្ខណៈការពារសុវត្ថិភាពដែលត្រូវបានលើកកម្ពស់ ដោយធ្វើឲ្យមានការលំបាក ឬមិនអាចកើតឡើងតែម្តងសម្រាប់អ្នកគ្មានសមត្ថកិច្ចប្រើប្រាស់កាំភ្លើងនោះ។
ដោយសំដៅទៅលើទូរស័ព្ទដៃទំនើបដែលមិនអាចប្រើប្រាស់បានលុះត្រាតែម្ចាស់ទូរស័ព្ទដាក់ក្រយ៉ៅដៃទៅលើអេក្រង់ទូរស័ព្ធ លោកអូបាម៉ា បាននិយាយថា «ប្រសិនបើយើងអាចបង្កើតបច្ចេកវិទ្យា ដើម្បីកុំឲ្យអ្នកដទៃដែលមានក្រយ៉ៅដៃខុសពីអ្នកអាចដោះសោរនៅក្នុងទូរស័ព្ទដៃរបស់អ្នកបាននោះ ហេតុអ្វីយើងមិនអាចប្រើប្រាស់បច្ចេកទេសស្រដៀងគ្នានេះទៅលើកាំភ្លើង?»
ក្រសួងការពារ មាតុភូមិ និងសន្តិសុខនៃសហរដ្ឋអាមេរិក កំពុងសិក្សាពីប្រធានបទ«កាំភ្លើងឆ្លាតវៃ» ហើយពួកគេបានសង្ឃឹមថានឹងមានបទបញ្ញត្តិថ្មីនឹងប្រកាសឡើងក្នុងរយៈពេល៦ខែខាងមុខ។
លោកប្រធានាធិបតីក៏បានកោះហៅឲ្យមានការបង្កើនចំណាយទៅលើការលើកកម្ពស់ព្យាបាលសុខភាពផ្លូវចិត្តរហូតដល់៥០០លានដុល្លារ ហើយរដ្ឋបាលសន្តិសុខសង្គមបានប្រកាសសំណើច្បាប់ថ្មី ដើម្បីធានាថា ស្ថាប័នរដ្ឋនឹងអាចទទួលបាន«ព័ត៌មានសមរម្យ»អំពីអ្នកដែលបានទទួលការព្យាបាលផ្នែកផ្លូវចិត្ត ដើម្បីពិនិត្យប្រវត្តិរូបរបស់អ្នកទិញកាំភ្លើង។
សេតវិមានក៏បានប្រកាសថា លោកអូបាម៉ានឹងរៀបចំកិច្ចប្រជុំមួយជាមួយនឹងអ្នកដឹកនាំនៅថ្នាក់រដ្ឋ និងនៅថ្នាក់មូលដ្ឋានក្នុងខែឧសភា ដើម្បីពិភាក្សាផែនការកាត់បន្ថយអំពើហឹង្សាដោយកាំភ្លើងក្នុងគ្រប់ជាន់ថ្នាក់នៃរដ្ឋាភិបាល៕
ប្រែសម្រួលដោយ វិញ សុជាតា
