នៅក្នុងដំណើរទស្សនកិច្ចទៅកាន់វិហារឥស្លាមជាលើកដំបូងបង្អស់ក្នុងនាមជាប្រធានាធិបតីអាមេរិក លោក បារ៉ាក់ អូបាម៉ា មានប្រសាសន៍ថាប្រជាពលរដ្ឋអាមេរិកាំងតែងតែបញ្ចូលសាសនាឥស្លាមជាមួយនឹងអំពើភេរវកម្ម។
លោក អូបាម៉ា បានថ្លែងប្រាប់ពលរដ្ឋអាមេរិកាំងកាន់សាសនាឥស្លាមនៅវិហារឥស្លាមនៅទីក្រុង Baltimore ថា «យើងជាគ្រួសារអាមេរិកាំងតែមួយ» ហើយសហគមន៍អ្នកកាន់សាសនាឥស្លាមទាំងមូលជារឿយៗតែងតែត្រូវបានបន្ទោសចំពោះអំពើហិង្សានានា។
លោក អូបាម៉ា បានបន្ថែមថា ការឃោសនានយោបាយប្រឆាំងនឹងក្រុមអ្នកកាន់សាសនាឥស្លាមដែលមិនអាចលើកលែងឲ្យបាន មិនអាចកើតមាននៅក្នុងប្រទេសនេះនោះទេ។
ដំណើរទស្សនកិច្ចលើកដំបូងបង្អស់របស់លោកប្រធានាធិបតី អូបាម៉ា ទៅកាន់វិហារឥស្លាមនៅក្នុងសហរដ្ឋអាមេរិកបានធ្វើឡើងក្នុងអំឡុងពេលនៃការឃោសនាប្រធានាធិបតី ដែលបេក្ខជនមកពីគណបក្សសាធារណរដ្ឋគឺលោក Donald Trump បានស្នើឲ្យមានបញ្ជីឈ្មោះអ្នកកាន់សាសនាឥស្លាម និងហាមឃាត់ជាបណ្តោះអាសន្នមិនឲ្យជនអន្តោប្រវេសន៍ដែលកាន់សាសនាឥស្លាមចូលមកសហរដ្ឋអាមេរិក បន្ទាប់ពីមានការវាយប្រហារភេរវកម្មនៅទីក្រុង San Bernardino រដ្ឋ California កាលពីថ្ងៃទី២ខែធ្នូកន្លងទៅនេះ។
ខណៈដែលបុគ្គលសំខាន់ៗខាងគណបក្សសាធារណរដ្ឋ ដែលរួមមានទាំងលោក John McCain សមាជិកព្រឹទ្ធសភាអាមេរិក និងលោក Jeb Bush បេក្ខជនឈរឈ្មោះប្រធានាធិបតី បានថ្កោលទោសចំពោះសំណើរបស់លោក Trump ឲ្យហាមឃាត់អ្នកកាន់សាសនាឥស្លាម លោក Ben Carson បេក្ខជនឈរឈ្មោះប្រធានាធិបតីបានថ្លែងកាលពីឆ្នាំមុនថា ជនណាដែលកាន់សាសនាឥស្លាមមិនសាកសមនឹងធ្វើជាប្រធានាធិបតីអាមេរិកនោះទេ៕
