ភ្ជាប់​ទៅ​គេហទំព័រ​ទាក់ទង

លោក​អូបាម៉ា​កោត​សរសើរ​ជន​អាមេរិកាំង​បីនាក់​ដែល​បាន​រារាំង​ការ​វាយប្រហារ​លើ​រថភ្លើង​ទៅ​ប៉ារីស


លោក​ប្រធានាធិបតី​ បារ៉ាក់ អូបាម៉ា​ ថតរូប​ជាមួយ​ជន​អាមេរិកាំង​ទាំងបី​នាក់​ នៅ​វិមាន​រាងពងក្រពើ​នៃ​សេតវិមាន​ រដ្ឋធានីវ៉ាស៊ីនតោន កាល​ពីថ្ងៃទី១៧ ខែកញ្ញា ឆ្នាំ២០១៥។

លោក​ប្រធានាធិបតី​សហរដ្ឋ​អាមេរិក ​បារ៉ាក់ ​អូបាម៉ា ​បាន​ជួប​ជាមួយ​យុវជន​អាមេរិកាំង​៣​នាក់​ដែល​បាន​ទប់​ស្កាត់​ខ្មាន់​កាំភ្លើង​ម្នាក់​ដែល​បាន​រងការ​ចោទ​ប្រកាន់​ថា ​មាន​ចំណង​ទាក់​ទង​ជាមួយ​ពួក​ឥស្លាម​ជ្រុល​និយម​នៅលើ​រទេះ​ភ្លើង​ដែល​ធ្វើ​ដំណើរ​ចេញ​ទៅ​ទីក្រុង​ប៉ារីស​នៃ​ប្រទេស​បារាំងកាល​ពី​ខែ​មុន។

លោក​ប្រធានា​ធិបតី​ អូបាម៉ា ​បាន​ទទួល​លោក ​Alek Skarlotos លោក ​Spencer Stoneនិង​លោក Anthony Sadler នៅ​ឯ​ការិយាល័យ​រាងពង​ក្រពើ​នៅ​សេតវិមាន។លោក​ប្រធានា​ធិបតី ​បាន​សរសើរ​បុរសទាំង​៣​នាក់​នេះ​ចំពោះ​សេចក្តី​អង់​អាច​ក្លាហាន ​ការ​គិត​រហ័ស​រហួន​ ហើយ​និង​ការ​ធ្វើ​ការ​ជាក្រុម​ដែល​បាន​បញ្ចៀស​អ្វី​ដែលលោក​ប្រធានា​ធិបតី​ ​បាន​ហៅ​ថា ​«ព្រឹត្តិការណ៍​គួរ​ឲ្យ​ភ័យ​ខ្លាច​ពិត​ប្រាកដ»។

លោក​ប្រធានា​ធិបតី ​អូបាម៉ា ​បាន​មាន​ប្រសាសន៍​ថា ​វា​ជាការ​ត្រឹម​ត្រូវ​ហើយ​ដែល​យើង​គួរ​និយាយ​ថា ​មនុស្ស​ជា​ច្រើន​បាន​ត្រូវ​ជួយ​សងគ្រោះ​ជី​វិត​ដោយ​សារ​សកម្មភាព​របស់​ជន​ជាតិ​អាមេរិកាំង​៣​រូប​នេះ។

លោក​ប្រធានាធិបតី ​បានមាន​ប្រសាសន៍​ថា៖ ​«អ្នក​ទាំង​៣​នាក់​នោះ ​តំណាង​ឲ្យ​ប្រជាជន​អាមេរិក​ដ៏​ល្អ គឺ​ជា​អត្តចរិក​របស់​អាមេរិក។ ​ខ្ញុំ​សូម​ថ្លែង​អំណរ​គុណ​ដល់​អ្នក​ទាំង​៣​នាក់​នេះ​ ហើយ​ខ្ញុំ​សូម​ជូន​ពរ​ឲ្យ​អ្នក​ទាំង​៣​មាន​សុខភាព​ល្អ‍»។

នៅ​ល្ងាច​ថ្ងៃ​ព្រហស្បតិ៍ ​បុរស​ទាំង​៣​នាក់​នេះ​ដែល​ជាមិត្តភ័ក្រ្ត​នឹង​គ្នា ​បាន​ទៅ​ពិធី​មួយ​ទៀត​នៅឯ​មន្ទីរ​បច្ចកោណ។​ លោក Skarlatosជា​សមាជិក​ឆ្មាំ​ការ​ពារ​ជាតិ​រដ្ឋ Oregon ​បាន​ទទួល​មេដៃ​យុទ្ធ​ជន។

ជន​ជាតិ​អាមេរិកាំង​៣​នាក់​នេះ ​រួម​ជាមួយ​ជន​ជាតិ​អង់គ្លេស​ម្នាក់ ​បាន​ប្រឈមជាមួយ​បុរស​ម្នាក់​ប្រដាប់​ទៅ​ដោយ​អាវុធ​ធន់​ធ្ងន់​នៅ​លើ​រទេះ​ភ្លើង​ល្បឿន​លឿន​ដែល​បាន​បើក​បរ​ចេញ​ពី​ទីក្រុង ​Amsterdam ​នៃ​ប្រទេស​ហុល្លង់​ឆ្ពោះ​ទៅ​កាន់​ទីក្រុង​ប៉ារីស។ បុរស​ប្រដាប់​អាវុធ​នោះ ​ជា​ជន​ជាតិ​ម៉ារ៉ុក​ដែល​ត្រូវ​បាន​គេ​ជឿ​ជាក់​ថា ​បាន​រៀប​ចំ​ផែនការ​វាយ​ប្រហារ​នៅ​លើ​រទេះ​ភ្លើង​នោះ៕

XS
SM
MD
LG