ភ្ជាប់​ទៅ​គេហទំព័រ​ទាក់ទង

លោក​អូបាម៉ា៖ កិច្ចព្រមព្រៀង​នុយក្លេអ៊ែរ​អ៊ីរ៉ង់​​​«ចាត់​វិធានការ​ច្រើន​ជាង​នរណា​ម្នាក់​បាន​ធ្វើពី​ពេល​មុន»


លោក​អូបាម៉ា​បាន​មាន​ប្រសាសន៍​ថា ​កិច្ច​ព្រមព្រៀង​នេះ​«ចាត់​វិធានការ​ច្រើន​ជាង​នរណា​ម្នាក់​បាន​ធ្វើពី​ពេល​មុន» ​ក្នុង​ការ​រារាំង​ប្រទេស​អ៊ីរ៉ង់​មិន​ឲ្យ​មាន​អាវុធ​បរមាណូ។

លោក​រដ្ឋមន្ត្រី​ការ​បរទេស​ស.រ.អា​ John Kerry នឹង​ខិតខំ​ប្រឹងប្រែង​ធ្វើ​ឲ្យ​សាធារណជន​អាមេរិកាំង​ «ជឿ» លើ​កិច្ចព្រមព្រៀង​បរមាណូ​អ៊ីរ៉ង់​នៅ​ថ្ងៃ​អាទិត្យ​នេះ​ ដោយ​លោក​ចេញ​បង្ហាញ​ខ្លួន​ក្នុង​កម្មវិធី​សម្ភាសន៍​តាម​ទូរទស្សន៍​អាមេរិកាំង​ធំៗ​ចំនួន​ប្រាំ។​

កិច្ចព្រមព្រៀង​នេះ​ ដែល​ធ្វើ​ឲ្យ​ប្រទេស​អ៊ីរ៉ង់​ឈប់​អភិវឌ្ឍ​អាវុធ​បរមាណូ​មាន​ឡើង​ បន្ទាប់​ពី​កិច្ច​ចរចា​គ្នាយ៉ាង​ខ្លាំងជា​ច្រើន​ខែរវាង​ប្រទេស​អ៊ីរ៉ង់​ និង​ពួក​ប្រទេស​មហា​អំណច​ពិភព​លោក​ទាំង​៦។​ នៅ​ពេល​នេះ អ្នក​ការទូត​កំពូល​ស.រ.អា​រូបនេះ​ប៉ុនប៉ង​និយាយ​បញ្ចុះ​បញ្ចូល​ជន​រួម​ជាតិ​របស់​លោក​ឲ្យ​ជឿ​ថា ​កិច្ច​ព្រមព្រៀង​នេះ​ជា​ការ​ល្អ​តាម​ការ​ពិត​ជាក់ស្តែង។​

ក្រុម​អ្នកនយោបាយ​ខ្លះ​ខាង​គណបក្ស​សាធារណរដ្ឋ និង​ក្រុម​បេក្ខជន​ប្រធានាធិបតី​ខ្លះ​របស់​គណបក្ស​នោះ​បាន​រិះ​គន់​ខ្លាំង​ដល់​កិច្ច​ព្រមព្រៀង​នេះ​ហើយ​បាន​សន្យា​ថា​នឹង​ប្រឆាំង​ ដោយ​ធ្វើ​ឲ្យកិច្ចព្រមព្រៀង​នេះ​គ្មាន​ដំណើរការ​នៅ​ក្នុង​ការ​បោះឆ្នោត​នៅ​ក្នុង​សភា​អំពី​កិច្ចព្រមព្រៀង​នេះ។​

លោក​ប្រធានាធិបតី​បារ៉ាក់ អូបាម៉ា​បានសន្យា​ថា ​នឹង​វ៉េតូ​ដល់​ការ​ប៉ុនប៉ង​ណា​មួយ​របស់​សភា​ដើម្បី​ធ្វើ​មិន​ឲ្យ​សម្រេច​ការ​ផ្តើមគំនិតនេះ។​

លោក​អូបាម៉ា​បាន​មាន​ប្រសាសន៍​ថា ​កិច្ច​ព្រមព្រៀង​នេះ​«ចាត់​វិធានការ​ច្រើន​ជាង​នរណា​ម្នាក់​បាន​ធ្វើពី​ពេល​មុន» ​ក្នុង​ការ​រារាំង​ប្រទេស​អ៊ីរ៉ង់​មិន​ឲ្យ​មាន​អាវុធ​បរមាណូ។

នៅ​ក្នុង​សុន្ទរកថា​ប្រចាំសប្តាហ៍​របស់​លោក​ លោកអូបាម៉ា​បានមាន​ប្រសាសន៍​ថា​ប្រទេសអ៊ីរ៉ង់​មិន​អាច​បន្លំ​កិច្ច​ព្រមព្រៀង​នេះ​បាន​ទេ ​ពីព្រោះ​ដំណើរការ​ផ្ទៀងផ្ទាត់​ដែល​កិច្ច​ព្រមព្រៀង​នេះ​បានកំណត់​ «មាន​ភាព​ទូលំទូលាយ​» និង​«មាន​អធិការកិច្ច​នៅ​ក្នុង​ប្រទេស​អ៊ីរ៉ង​តែ​ម្តង»៕

XS
SM
MD
LG