លោកប្រធានាធិបតីសហរដ្ឋអាមេរិក បារ៉ាក់ អូបាម៉ា ការពារយ៉ាងខ្លាំងក្លានូវកិច្ចព្រមព្រៀងអន្តរជាតិដើម្បីទប់ស្កាត់កម្មវិធីនុយក្លេអ៊ែររបស់អ៊ីរ៉ង់ដោយលោកបញ្ជាក់ថាកិច្ចព្រមព្រៀងនេះ«កាត់ផ្តាច់មធ្យោបាយទាំងអស់របស់ប្រទេសអ៊ីរ៉ង់ក្នុងការទទួលបានគ្រាប់បែកបរិមាណូ»។
លោកអូបាម៉ាបានថ្លែងនៅក្នុងសុន្ទរកថាមួយកាលពីថ្ងៃពុធនៅឯសាកលវិទ្យាល័យអាមេរិកាំងក្នុងរដ្ឋធានីវ៉ាស៊ីនតោនថា៖ «កិច្ចព្រមព្រៀងនេះល្អខ្លាំងណាស់ហើយ»។
លោកមានប្រសាសន៍ថា ប្រសិនបើកិច្ចព្រមព្រៀងនេះត្រូវបានអនុវត្ត «វានឹងល្អសម្រាប់ប្រទេសអ៊ីរ៉ង់។ វានឹងល្អសម្រាប់សហរដ្ឋអាមេរិក។ វាក៏នឹងល្អសម្រាប់តំបន់ផងដែរ ដោយសារតែតំបន់នេះជួបប្រទះជម្លោះជាច្រើនមកហើយ។ វានឹងល្អសម្រាប់ពិភពលោកទាំងមូល»។
លោកប្រធានាធិបតីបានទទូចឱ្យពលរដ្ឋអាមេរិកាំងទូរស័ព្ទទៅក្រុមអ្នកតំណាងរាស្ត្រនៅក្នុងរដ្ឋសភាសហរដ្ឋអាមេរិកដែលនៅតែមានទុទិដ្ឋិនិយមដោយជំរុញឱ្យពួកគេអនុម័តកិច្ចព្រមព្រៀងនេះក្នុងពេលបោះឆ្នោតនៅខែក្រោយ។
កិច្ចព្រមព្រៀងនោះនឹងហាមឃាត់រដ្ឋបាលទីក្រុងតេអេរ៉ង់ (Tehran) មិនឱ្យផលិតអាវុធនុយក្លេអ៊ែរដើម្បីជាថ្នូរនឹងការលើកទណ្ឌកម្មសេដ្ឋកិច្ចពីអង្គការសហប្រជាជាតិ និងបស្ចិមប្រទេសដែលបានហ៊ុំព័ទ្ធសេដ្ឋកិច្ចអ៊ីរ៉ង់។ ក្រុមអ្នកប្រឆាំងនិយាយថា មាត្រាដែលសម្រាប់ផ្ទៀងផ្ទាត់ថាប្រទេសអ៊ីរ៉ង់ពិតជាគោរពតាមកិច្ចព្រមព្រៀងនេះមានលក្ខណៈទន់ខ្សោយ។
លោកអូបាម៉ាបានវាយបកទៅវិញចំពោះការរិះគន់នោះ ដោយបញ្ជាក់ថានោះគឺជាកិច្ចព្រមព្រៀងមិនរីកសាយអាវុធដែលល្អជាងគេបំផុតហើយដោយគ្មានអ្នកណាដែលចរចាបានដល់កម្រិតនេះទេ»៕
