លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានស្វាគមន៍លោកស្រី អង់សាន ស៊ូជី មេដឹកនាំគណបក្សប្រឆាំងនៃប្រទេសមីយ៉ាន់ម៉ាចំពោះជោគជ័យរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី ដែលបង្ហាញនូវការនាំមុខឆ្ពោះទៅកាន់ជ័យជម្នះភ្លូកទឹកភ្លូកដីនៅក្នុងការបោះឆ្នោតរបស់ប្រទេសនោះ។
សេចក្តីថ្លែងការណ៍របស់សេតវិមានបានប្រាប់ឲ្យដឹងថា លោកប្រធានាធិបតី អូបាម៉ា បានទូរស័ព្ទទៅជ័យលាភីណូបែលសន្តិភាពដើម្បីសរសើរលោកស្រីចំពោះការខំប្រឹងប្រែងមិនចេះនឿយហត់ ហើយនិងការលះបង់អស់រយៈពេលជាច្រើនឆ្នាំរបស់លោកស្រីដើម្បីលើកស្ទួយប្រទេសមីយ៉ាន់ម៉ាឲ្យមានការចូលរួមពីគណបក្សនយោបាយទាំងអស់ប្រកបដោយសន្តិភាពនិងលទ្ធិប្រជាធិបតេយ្យ។ សេចក្តីថ្លែងការណ៍នោះបានប្រាប់ឲ្យដឹងទៀតថា «លោកប្រធានាធិបតី អូបាម៉ា បានកត់សម្គាល់ថា ការបោះឆ្នោត និងការបង្កើតរដ្ឋាភិបាលថ្មីមួយអាចជាជំហានដ៏មានសារៈសំខាន់ឆ្ពោះទៅកាន់អន្តរកាលតាមបែបលទ្ធិប្រជាធិបតេយ្យរបស់មីយ៉ាន់ម៉ា ហើយនិងការខំប្រឹងប្រែងដើម្បីធ្វើឲ្យមានថ្ងៃអនាគតមួយប្រកបដោយសន្តិភាព និងភាពរុងរឿង»។
លោកប្រធានាធិបតី បារ៉ាក់ អូបាម៉ា ក៏បានទូរស័ព្ទទៅលោកប្រធានាធិបតីមីយ៉ាន់ម៉ា ថេន សេន ដើម្បីស្វាគមន៍លោក បន្ទាប់ពីការបោះឆ្នោតជាប្រវត្តិសាស្រ្តនៅថ្ងៃទី៨ ខែវិច្ឆិកានេះ។ សេចក្តីថ្លែងការណ៍របស់សេតវិមានបានប្រាប់ឲ្យដឹងថា មេដឹកនាំទាំង២ បានពិភាក្សាគ្នាពីសារៈសំខាន់សម្រាប់គណបក្សនយោបាយទាំងអស់ក្នុងការគោរពលទ្ធផលនៃការបោះឆ្នោតផ្លូវការនៅពេលប្រកាស ហើយនិងធ្វើការជាមួយគ្នាប្រកបដោយស្មារតីសាមគ្គីភាពដើម្បីបង្កើតរដ្ឋាភិបាលមួយរួមមានគណបក្សនយោបាយទាំងអស់ រដ្ឋាភិបាលតំណាងឲ្យប្រជាពលរដ្ឋដែលឆ្លុះបញ្ចាំងពីឆន្ទៈរបស់ប្រជាពលរដ្ឋ។
ដោយលទ្ធផលបោះឆ្នោតពីដំបូងៗ បន្តចាប់ផ្តើម គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី អងសាន ស៊ូជី បង្ហាញនូវការនាំមុខទៅកាន់ការទទួលជ័យជម្នះដ៏លើសលុបលើគណបក្សកាន់អំណាច គឺគណបក្សសហភាពសាមគ្គីភាពនិងការអភិវឌ្ឍដែលគាំទ្រដោយក្រុមយោធា។
លទ្ធផលនៅពេលថ្មីៗបំផុតនេះពីគណៈកម្មការសហភាពរៀបចំការបោះឆ្នោតបង្ហាញថា គណបក្សសម្ព័ន្ធជាតិដើម្បីលទ្ធិប្រជាធិបតេយ្យបានអះអាងថា ខ្លួនទទួលបានអាសនៈ១៩៦នៃអាសនៈទាំងអស់២៤៣ ឬជាង៨០ភាគរយនៃលទ្ធផលបោះឆ្នោតដែលបានប្រកាសរហូតមកទល់ពេលនេះសម្រាប់សភាជាន់ទាប។ គណបក្សសម្ព័ន្ធជាតិដើម្បីលទ្ធិប្រជាធិបតេយ្យក៏បាននាំមុខយ៉ាងខ្លាំងនៅក្នុងសភាជាន់ខ្ពស់ ដោយទទួលបានអាសនៈ៩៥នៃអាសនៈទាំងអស់១១៦ដែលបានប្រកាសរហូតមកទល់ពេលនេះ៕
