ប្រធានាធិបតីកូរ៉េខាងត្បូងលោក Moon Jae In គ្រោងនឹងជួបស្វាគមន៍មេដឹកនាំកូរ៉េខាងជើងលោក Kim Jong Un នៅថ្ងៃស្អែកនេះ នៅឯខ្សែបន្ទាត់ព្រំដែនយោធាដែលបែងចែកប្រទេសទាំងពីរនៅក្នុងជំនួបដ៏កម្ររបស់មេដឹកនាំទាំងពីរ។
នាយកអគ្គសេនាធិការរបស់លោក Moon Jae In នៅថ្ងៃព្រហស្បតិ៍នេះ បានផ្សព្វផ្សាយនូវចំណុចលំអិតនៃគម្រោងសម្រាប់ជំនួបរវាងមេដឹកនាំទាំងពីរ។
លោក Moon Jae In និងលោក Kim Jong Un គ្រោងនឹងដើររួមគ្នាទៅកាន់មជ្ឈមណ្ឌលមួយកន្លែងនៅក្នុងភូមិ Panmunjom ដើម្បីដើរត្រួតពល មុនពេលអង្គុយពិភាក្សាគ្នាជាផ្លូវការនៅឯវិមានសន្តិភាព។
ការពិភាក្សាគ្នានេះគ្រោងនឹងផ្ដោតលើកម្មវិធីនុយក្លេអ៊ែររបស់ប្រទេសកូរ៉េខាងជើង។
បន្ទាប់ពីការពិភាក្សាគ្នាបញ្ចប់ទៅ មេដឹកនាំទាំងពីរគ្រោងនឹងចូលរួមនៅក្នុងពិធីដាំដើមឈើនៅឯព្រំដែន ដោយប្រើដី និងទឹកពីប្រទេសទាំងពីរ។
បន្ទាប់មក លោក Moon Jae In និងលោក Kim Jong Un នឹងមានការពិភាក្សាលើកទីពីរ និងពិសាអាហារពេលល្ងាចជាមួយគ្នា ហើយបន្ទាប់មកទៀត នឹងមានការរៀបចំពិធីជូនដំណើរគណៈប្រតិភូកូរ៉េខាងជើង។
រដ្ឋាភិបាលកូរ៉េខាងត្បូងបានបង្ហាញនូវក្ដីសង្ឃឹមសម្រាប់ការដោះស្រាយភាពជាប់គាំងរយៈពេល ៦៥ ឆ្នាំកន្លងមកនេះរវាងប្រទេសកូរ៉េទាំងពីរ។ កាលពីដើមសប្ដាហ៍នេះ ប្រទេសកូរ៉េខាងត្បូងបានផ្អាកការផ្សព្វផ្សាយសារឃោសនា និងតន្ត្រីសម័យទំនើបឆ្លងព្រំដែន ដែលនេះជាវិធានការមួយដែលពួកយោធាបាននិយាយថា អាចជួយជំរុញឲ្យមានសន្តិភាព។
ចំពោះប្រទេសកូរ៉េខាងជើងវិញ ក៏បានបង្ហាញពីឆន្ទៈរបស់ខ្លួននៅក្នុងការផ្អាកការសាកល្បងអាវុធនុយក្លេអ៊ែរ និងគ្រាប់មីស៊ីលផងដែរ៕
