មេដឹកនាំកូរ៉េខាងជើងលោក Kim Jong Un បានព្រលះដាក់មន្ត្រីមួយចំនួនពាក់ព័ន្ធនឹងការពន្យារពេលសាងសង់មន្ទីរពេទ្យថ្មីមួយកន្លែងនៅក្នុងទីក្រុងព្យុងយ៉ាង និងបានបញ្ជាឱ្យបញ្ឈប់ការងារមន្ត្រីទាំងនោះ។
ទីភ្នាក់ងារព័ត៌មាន KCNA របស់ប្រទេសកូរ៉េខាងជើងបានរាយការណ៍នៅថ្ងៃចន្ទនេះថា លោក Kim Jong Un បានស្ដីបន្ទោសខ្លាំងៗដាក់អ្នកគ្រប់គ្រងការសាងសង់មន្ទីរពេទ្យនោះ ក្នុងអំឡុងពេលលោកធ្វើទស្សនកិច្ចកាលពីពេលថ្មីៗនេះទៅកាន់ការដ្ឋានសាងសង់នោះនៅក្នុងទីក្រុងព្យុងយ៉ាង និង «បានលើកឡើងពីបញ្ហាធ្ងន់ធ្ងរនានាដែលលេចឡើងនៅក្នុងការចាត់ចែងផ្នែកថវិកាទាក់ទិននឹងការសាងសង់»។
ទីភ្នាក់ងារ KCNA បានបញ្ជាក់ថា លោក Kim Jong Un បានរិះគន់ជាពិសេសលើគណៈកម្មការសាងសង់ ថាបានដំណើរការគម្រោងនេះដោយ «មិនច្បាស់លាស់» ដោយមិនមានថវិកាសាងសង់ត្រឹមត្រូវ។
គម្រោងសាងសង់មន្ទីរពេទ្យនេះបានធ្វើឡើងស្របពេលដែលមានការសង្ស័យថា កូរ៉េខាងជើងប្រហែលជាមានការលំបាកនៅក្នុងការទទួលបានសម្ភារៈសំណង់ ដោយសារតែការដាក់ទណ្ឌកម្មរបស់សហរដ្ឋអាមេរិកលើកម្មវិធីនុយក្លេអ៊ែរ និងកម្មវិធីមីស៊ីលរបស់ខ្លួន ក៏ដូចជាដោយសារការគ្រប់គ្រងព្រំដែនតឹងតែងដើម្បីទប់ស្កាត់ការឆ្លងរាតត្បាតនៃជំងឺកូវីដ១៩៕
