អ្នកវិភាគមួយចំនួនបានព្រមានកាលពីពេលថ្មីៗនេះថា ភាពអសមត្ថភាពរបស់អាមេរិកក្នុងការទប់ទល់ការឆ្លងរាតត្បាតនៃវីរុសកូរ៉ូណានៅក្នុងប្រទេស បានចាប់ផ្តើមធ្វើឲ្យមានផលប៉ះពាល់ដល់បេសកកម្មយោធាអាមេរិកនៅក្រៅប្រទេស ដោយការឆ្លងវីរុសកូរ៉ូណាមានការកើនឡើងខ្ពស់ ក្នុងចំណោមកងទ័ពអាមេរិកដែលកំពុងបំពេញបេសកកម្មក្នុងប្រទេសជប៉ុន និងប្រទេសកូរ៉េខាងត្បូង។
មន្រ្តីជប៉ុនក្នុងទីក្រុង Okinawa បាន និយាយកាលពីថ្ងៃអាទិត្យថា យ៉ាងហោចណាស់មានការឆ្លងវីរុសកូរ៉ូណាជាង៦០ករណី ត្រូវបានគេរាយការណ៍នៅមូលដ្ឋានកងទ័ពម៉ារីនរបស់អាមេរិកចំនួន២ក្នុងសប្តាហ៍កន្លងទៅ ដែលក្នុងនោះរួមមានមូលដ្ឋានអាកាសរបស់កងទ័ពម៉ារីន Futenma និង Camp Hansen។ កាលពីថ្ងៃចន្ទនេះ សារព័ត៌មានរបស់ជប៉ុនបានរាយការណ៍ថា យ៉ាងហោចណាស់មានករណីឆ្លងជំងឺកូវីដ១៩ចំនួន៣២ករណីថ្មីបន្ថែមទៀតក្នុងមូលដ្ឋានយោធា Futenma។
ឆ្លើយតបបញ្ហានេះ យោធាអាមេរិកបានដាក់កងទ័ពម៉ារីននិងក្រុមគ្រួសាររបស់គេ ក៏ដូចបុគ្គលិកជាប់កិច្ចសន្យាក្នុងទីក្រុង Okinawa ដោយមិនឲ្យចេញទៅណា និងហាមផ្តាច់មិនឲ្យចេញក្រៅមូលដ្ឋានយោធា។
នៅក្នុងសន្និសីទសារព័ត៌មានមួយកាលពីថ្ងៃអាទិត្យ អភិបាលក្រុង Okinawa លោក Denny Tamaki និយាយថា លោកមានការ «រន្ធត់ចិត្ត» ដែលបានដឹងពីការឆ្លងរាលដាលនៃជំងីកូវីដ១៩នេះ ហើយលោកដាក់ការសង្ស័យយ៉ាងខ្លាំងលើវិធានការរបស់កងទ័ពអាមេរិកក្នុងការទប់ស្កាត់ការរីករាលដាលឆ្លងនៃមេរោគកូរ៉ូណានេះ។
គេនៅមិនទាន់ដឹងច្បាស់នៅឡើយថាតើករណីឆ្លងក្នុងចំណោមយោធាអាមេរិកក្នុងទីក្រុង Okinawa មានប្រភពមកពីណានោះទេ ប៉ុន្តែទីភ្នាក់ងារព័ត៌មាន Kyodo ចេញផ្សាយថា ក្រុមកងម៉ារីនអាមេរិក មានជាប់ពាក់ព័ន្ធនឹងបុគ្គលក្នុងកន្លែងចំនួនពីរដែលត្រូវបានគេធ្វើតេស្តមានរោគសញ្ញាកូវីដ១៩។
អ្នកទើបមកពីអាមេរិក
ដោយឡែកការផ្ទុះរីករាលដាលនៃជំងឺនេះក្នុងចំណោមកងទ័ពអាមេរិកក្នុងប្រទេសកូរ៉េខាងត្បូងវិញ ហាក់ត្រូវបានគេគ្រប់គ្រងបាន ដែលការឆ្លងនេះបានកើតមានឡើងភាគច្រើនក្នុងចំណោមកងទ័ពអាមេរិកដែលទើបមកពីសហរដ្ឋអាមេរិក។
ក្នុងរយៈពេល២សប្តាហ៍កន្លងទៅ យ៉ាងហោចណាស់មានយោធាអាមេរិកឬបុគ្គលដែលពាក់ព័ន្ធនឹងកងទ័ពអាមេរិកចំនួន៣៤នាក់ ត្រូវបានធ្វើតេស្តរកឃើញជំងឺកូវីដ១៩ បន្ទាប់ពីអ្នកទាំងនោះបានមកដល់ប្រទេសកូរ៉េខាងត្បូងពីសហរដ្ឋអាមេរិក នេះបើតាមការបញ្ជាក់ឲ្យដឹងនៅក្នុងសេចក្តីថ្លែងការណ៍មួយដោយយោធាអាមេរិកក្នុងប្រទេសកូរ៉េខាងត្បូង។
សេចក្តីថ្លែងការណ៍ដដែលក៍បានបញ្ជាក់ផងដែរថា ចំណែកយោធាអាមេរិក៤រូបផ្សេងទៀត ត្រូវបានធ្វើតេស្តមានជំងឺកូវីដ១៩ផងដែរ បន្ទាប់ពីពួកគេមកពីកន្លែងផ្សេងៗទៀត ដូចជាអឺរ៉ុប និងប្រទេសជប៉ុនជាដើម។
ការកើនឡើងការឆ្លងវីរុសកូរ៉ូណាក្នុងចំណោមកងទ័ពអាមេរិក មានសន្ទុះខ្លាំង បើប្រៀបធៀបកាលពីខែមុន ដែលយោធាអាមេរិកក្នុងប្រទេសកូរ៉ខាងត្បូងមានករណីនៃការឆ្លងថ្មីតិចតួចតែប៉ុណ្ណោះ។
តើវាប៉ះពាល់ដល់បេសកកម្មដែរឬទេ?
ការឆ្លងរាលដាលនេះបានបង្កើតឲ្យមានស្ថានភាពមួយគ្រោះថ្នាក់មួយ សម្រាប់ប្រទេសកូរ៉េខាងត្បូងនិងជប៉ុន ដែលមានជោគជ័យក្នុងការទប់ស្កាត់នៃការឆ្លងវីរ៉ុសកូរ៉ូណាក្នុងពេលកន្លងមក។
ជប៉ុនបានរាយកាណ៍ថា ខ្លួនមានអ្នកស្លាប់ដោយសារវីរុសកូរ៉ូណាតិចជាង១០០០នាក់។ ចំណែកប្រទេសកូរ៉េខាងត្បូងមានអ្នកស្លាប់តិចជាង៣០០នាក់។ សហរដ្ឋអាមេរិកវិញមានអ្នកស្លាប់ដោយសារជំងឺកូវីដ១៩ប្រមាណជិត១៣៥.០០០ (រហូតមកដល់ថ្ងៃទី១៣ខែកក្កដានេះ)។
ជាមួយនឹងចំនួនឆ្លងថ្មីៗនិងអ្នកស្លាប់កើនឡើងក្នុងសហរដ្ឋអាមេរិក អ្នកវិភាគមួយចំនួនព្រមានថា អសមត្ថភាពរបស់ទីក្រុងវ៉ាស៊ីនតោន ក្នុងការទប់ទល់នឹងវីរុសកូរ៉ូណានេះ កំពុងតែធ្វើឲ្យមានការប៉ះពាល់ដល់បេសកកម្មរបស់យោធាអាមេរិក ក្នុងប្រទេសជប៉ុននិងកូរ៉េខាងត្បូង ដែលមានកងទ័ពអាមេរិកប្រមាណជិត៨០.០០០នាក់ កំពុងបំពេញបេសកកម្មការពារសន្តិសុខក្នុងតំបន់អាស៊ីបូព៌ា។
លោក Daniel Pinkston អតីតគ្រូបង្រៀនភាសានៃកងទ័ពអាកាស និងបច្ចុប្បន្នកំពុងបង្រៀនមុខវិជ្ជាទំនាក់ទំនងអន្តរជាតិនៃសាកលវិទ្យាល័យTroy ក្នុងទីក្រុង Seoul បានឲ្យដឹងថា «គោលនយោបាយសុខភាពសាធារណៈ ទន់ខ្សោយរបស់រដ្ឋាភិបាលក្រុងវ៉ាស៊ីនតោន និងអសមត្ថភាពរបស់ខ្លួន ក្នុងការទប់ស្កាត់ការរីករាលដាលនៃជំងឺកូវីដ១៩ បានធ្វើប៉ះពាល់ដល់ការត្រៀមខ្លួនរបស់កងយោធាអាមេរិក»។កូវីដ១៩ ជាជំងឺដែលកើតចេញពីវីរ៉ុសកូរ៉ូណា។
លោកបន្ថែមទៀតថា៖ «ការឆ្លងវីរ៉ុសកូរ៉ូណាក្នុងចំណោមយោធាអាមេរិកអាចធ្វើឲ្យប៉ះពាល់ផងដែរដល់ការបណ្តុះបណ្តាលរួមគ្នាជាមួយកម្លាំងសម្ព័ន្ធមិត្ត ក៏ដូចជាសមត្ថភាពរបស់កងទ័ពអាមេរិកក្នុងការបំពេញការបេ្តជ្ញាចិត្តរបស់ខ្លួនចំពោះសម្ព័ន្ធមិត្ត។ ប្រការនេះ វាអាចកាត់បន្ថយនូវការជឿជាក់របស់សម្ព័ន្ធមិត្តទៅលើអាមេរិក ហើយអាចឲ្យមានការគិតក្នុងន័យផ្សេងរបស់គូសត្រូវផងដែរ»។
នៅក្នុងសេចក្តីថ្លែងការណ៍មួយ កងកម្លាំងអាមេរិក-កូរ៉េ បានឲ្យដឹងថា ពួកគេនៅតែស្ថិតក្នុង«ការត្រៀមខ្លូនកំរិតខ្ពស់ ដោយមានយោធាអាមេរិកចំនួនតិចជាង១%តែប៉ុណ្ណោះ ដែលឆ្លងជំងឺកូវីដ១៩នោះ។
សេចក្តីថ្លែងការណ៍របស់កងកម្លាំងអាមេរិក-កូរ៉េ ក៏បានបញ្ជាក់ផងដែរ ពីការប្រុងប្រយ័ត្នសុវត្ថិភាពជាមុន។
ពេលមកដល់ប្រទេសកូរ៉េខាងត្បូង កងទ័ពអាមេរិកទាំងអស់ និងបុគ្គលពាក់ព័ន្ធផ្សេងៗទៀត ត្រូវធ្វើតេស្តរកជំងឺកូវីដ១៩ ហើយត្រូវស្ថិតនៅឆ្ងាយពីគេក្នុងរយៈពេល១៤ថ្ងៃ អាស្រ័យទៅលើលទ្ធផលនៃការធ្វើតេស្ត។ ពួកគេត្រូវធ្វើតេស្តថា គ្មានជំងឺកូវីដយ៉ាងតិចក៏ម្តងដែរ មុនពេលត្រូវបានអនុញ្ញាតឲ្យចេញទៅបំពេញការងារ។
តើសមយុទ្ធយោធាត្រូវបានពន្យារពេលជាថ្មីឬយ៉ាងណា?
ការឆ្លងថ្មីៗនៃជំងឺកូវីដ១៩នេះកំពុងបង្កើនលទ្ធភាពដែលថា កងទ័ពអាមេរិកនិងកូរ៉េខាងត្បូងនឹងមិនអាចធ្វើសមយុទ្ធយោធាប្រចាំឆ្នាំរបស់ខ្លួនបានទេ។
កាលពីសប្តាហ៍មុន ទីភ្នាក់ងារព័ត៌មាន Yonhap របស់កូរ៉េខាងត្បូងរាយការណ៍ថា ប្រទេសទាំងពីរទំនងហាក់ដូចជាផ្អាកឬលុបចោលនូវសមយុទ្ធយោធានោះហើយ។
សហរដ្ឋអាមេរិកនិងកូរ៉េខាងត្បូងបានលុបចោលសមយុទ្ធយោធារួមដ៏សំខាន់របស់ខ្លួនកាលពីពេលកន្លងទៅក្នុងឆ្នាំនេះ។
ឧត្តមសេនីយ៍ឯកកងទ័ពកូរ៉េខាងត្បូងដែលចូលនិវត្តន៍លោក Chun In-bum បានលើកឡើងថា ការលុបចោលឬការកែសម្រួលការធ្វើសមយុទ្ធយោធា «អាចធ្វើឲ្យប៉ះពាល់ខ្លាំង» ដល់ស្ថានភាពនៃការការពាររួមគ្នា។
លោកបន្តថា «សមយុទ្ធយោធាមានសារៈសំខាន់ខ្លាំងណាស់។ សមយុទ្ធនេះ ធ្វើឡើងតែ២ដងប៉ុណ្ណោះក្នុង១ឆ្នាំ។ កាលពីមុនធ្លាប់មាន៤ដងក្នុង១ឆ្នាំ។
មន្រ្តីក្រសួងការពារជាតិកូរ៉េខាងត្បូងម្នាក់ថ្លែងប្រាប់វីអូអេថា រដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងសេអ៊ូលកំពុងពិភាក្សាគ្នាពីបញ្ហានេះ ប៉ុន្តែមិនទាន់មានការសម្រេចចិត្តណាមួយនៅឡើយទេ។
សមយុទ្ធយោធាដែលគ្រោងធ្វើកាលពីនិទាឃរដូវ ត្រូវបានលុបចោលកាលពីខែកុម្ភៈកន្លងទៅ នៅពេលដែលប្រទេសកូរ៉េខាងត្បូងក្លាយជាប្រទេសទីមួយនៅលើពិភពលោកដែលមានការផ្ទុះឡើងនូវជំងឺកូវីដ១៩។
ប៉ុន្មានសប្តាហ៍ក្រោយមក កូរ៉េខាងត្បូងទប់ទល់ការរាលដាលឆ្លងនៃវីរ៉ុសកូរ៉ូណាបាន ដោយសារតែយុទ្ធសាស្រ្តនៃការធ្វើតេស្តដ៏ទូលំទូលាយរបស់ខ្លួន ការប្រើប្រាស់ទិន្នន័យស្វែងរកអ្នកពាក់ព័ន្ធជំងឺកូវីដ១៩ និងការដាក់ឲ្យនៅដាច់ដោយឡែកជាបន្ទាន់ ចំពោះអ្នកពាក់ព័ន្ធនឹងជំងឺនេះ។
កងទ័ពអាមេរិកក្នុងប្រទេសកូរ៉េខាងត្បូងក៏ត្រូវបានគេសរសើរផងដែរពីវិធានការណ៍ឆ្លើយតបប្រកបដោយប្រសិទ្ធភាពរបស់ខ្លួន ចំពោះវីរុសកូរ៉ូណានេះ៕
ប្រែសម្រួលដោយលោក ជ្រា វណ្ណារិទ្ធ
