នៅថ្ងៃអង្គារនេះ ប្រទេសកូរ៉េខាងជើងបានបង្ហាញវិធានការការពារតឹងតែងជាងមុនប្រឆាំងនឹងការឆ្លងជំងឺកូវីដ១៩។ នេះបើតាមការផ្សាយរបស់ទីភ្នាក់ងារព័ត៌មាន KCNA របស់កូរ៉េខាងជើង។
កូរ៉េខាងជើងបានធ្វើដូច្នេះ បន្ទាប់ពីខ្លួនបានបិទព្រំដែនទីក្រុង Kaesong ដើម្បីទប់ទល់នឹងករណីសង្ស័យដំបូងនៃការឆ្លងជំងឺកូវីដ១៩។
វិធានការដាក់នៅដាច់ដោយឡែកដ៏តឹងតែង និងការតាមដានរកអ្នកធ្លាប់ប្រាស្រ័យទាក់ទងនឹងអ្នកដែលសង្ស័យថាកើតជំងឺកូវីដ១៩ នេះ កំពុងបន្តធ្វើ ហើយឧបករណ៍ធ្វើតេស្ត សម្លៀកបំពាក់ការពារខ្លួន និងឧបករណ៍ពេទ្យផ្សេងទៀតត្រូវបានផ្គត់ផ្គង់ដោយមិនបង្អែរបង្អង់យូរ។ នេះបើតាមការផ្សាយរបស់ទីភ្នាក់ងារព័ត៌មាន KCNA នេះ។
វិធានការនេះបានធ្វើឡើង ក្រោយពីមេដឹកនាំកូរ៉េខាងជើងលោក Kim Jong Un បានប្រកាសអំពីភាពអាសន្នកាលពីថ្ងៃអាទិត្យ បន្ទាប់ពីមនុស្សម្នាក់ដែលសង្ស័យថាមានជំងឺកូវីដ១៩ ទើបត្រឡប់មកពីប្រទេសកូរ៉េខាងត្បូង។
កូរ៉េខាងជើងបានបញ្ជាក់ថា ខ្លួនបានធ្វើតេស្តរកជំងឹកូវីដ១៩ លើមនុស្ស ១.២១១ នាក់ហើយគិតត្រឹមថ្ងៃទី ១៦ ខែកក្កដា ដោយលទ្ធផលបង្ហាញថា អ្នកទាំងនោះមិនមានជំងឺនេះទេ។ នេះបើតាមការបញ្ជាក់របស់អង្គការសុខភាពពិភពលោកនៅក្នុងសេចក្ដីប្រកាសមួយដែលផ្ញើទៅកាន់ទីភ្នាក់ងារព័ត៌មាន Reuters កាលពីថ្ងៃច័ន្ទម្សិលមិញ៕
