មេដឹកនាំកូរ៉េខាងជើងលោក Kim Jong Un និងប្រធានាធិបតីរុស្ស៊ីលោក Vladimir Putin កំពុងជួបប្រជុំគ្នានៅក្នុងទីក្រុង Vladivostok ស្ថិតនៅចុងបូព៌ាប្រទេសរុស្ស៊ី។
នៅមុនកិច្ចចរចាចាប់ផ្តើមនៅថ្ងៃព្រហស្បតិ៍នេះ លោក Putin បានប្រាប់លោក Kim ថា លោករំពឹងថា គម្រោងទស្សនកិច្ចរបស់លោក Kim នៅប្រទេសរុស្ស៊ីនឹងជួយបង្កើតចំណងទេ្វភាគីក៏ដូចជានឹងជួយប្រទេសទាំងពីរឲ្យស្វែងរកវិធីសាស្រ្តឈានដល់ការដោះស្រាយបញ្ហានៅលើទ្វីបកូរ៉េទាំងមូល។
លោក Kim បានឆ្លើយតបទៅវិញថា លោកជឿជាក់ថាមេដឹកនាំទាំងពីរនឹងទទួលលទ្ធផលជាផ្លែផ្កាពីជំនួបកំពូលដ៏មានអត្ថន័យនេះ។
លោក Kim ត្រូវបានគេរំពឹងថា នឹងជំរុញលោក Putin ពាក់ព័ន្ធនឹងជំនួយសេដ្ឋកិច្ច ជាពិសេសគឺការដកទណ្ឌកម្មអន្តរជាតិចេញពីកូរ៉េខាងជើងដែលនៅចូលជាធរមាននៅឡើយ បន្ទាប់ពីបរាជ័យនៅក្នុងការចរចាលុបបំបាត់នុយក្លេអ៊ែរជាមួយនឹងសហរដ្ឋអាមេរិក។
សហភាពសូវៀតធ្លាប់ជាអ្នកគាំទ្រផ្នែកហរិញ្ញវត្ថុដ៏សំខាន់មួយដល់កូរ៉េខាងជើងក្នុងចំណោមប្រទេសផ្សេងទៀត។ ប៉ុន្តែក្រោយពីសហភាពសូវៀតបែកបាក់ រដ្ឋាភិបាលទីក្រុងម៉ូស្គូបានកំណត់អាទិភាពបង្កើតចំណងទាក់ទងជាមួយនឹងប្រទេសកូរ៉េខាងត្បូងបន្ទាប់មកបានបង្កើតគោលនយោបាយសមភាពរវាងកូរ៉េទាំងពីរ។
សន្និសីទនេះគឺជា សន្និសីទកំពូលថ្មីចុងក្រោយបង្អស់របស់លោក Kim ចាប់តាំងពីលោកគ្រប់គ្រងប្រទេសកូរ៉េខាងជើងពីឆ្នាំ២០១១មក៕
