ប្រទេសកូរ៉េខាងជើងបានបាញ់សាកល្បងគ្រាប់ផ្លោងមីស៊ីល ៣ គ្រាប់ នៅថ្ងៃអង្គារនេះ។ ការបាញ់នេះកើតឡើងតែក្នុងមួយសប្តាហ៍ប៉ុណ្ណោះ បន្ទាប់ពីប្រទេសនេះគំរាមសងសឹកប្រទេសកូរ៉េខាងត្បូងពាក់ព័ន្ធនឹងការតំឡើងឲ្យប្រើប្រាស់នូវប្រព័ន្ធការពារមីស៊ីល ដែលហៅកាត់ជាភាសាអង់គ្លេសថា THAAD។
សហរដ្ឋអាមេរិក ក៏ដូចជាប្រទេសកូរ៉េខាងត្បូងដែរ បានបញ្ជាក់ថា ការបាញ់គ្រាប់មីស៊ីលរបស់រដ្ឋាភិបាលរដ្ឋធានីព្យុងយ៉ាង កាលពីព្រឹកថ្ងៃអង្គារនេះទំនងជាប្រភេទគ្រាប់មីស៊ីលដែលបាញ់បានចម្ងាយមធ្យម ឬគ្រាប់ដែលបាញ់បានម្តងក្នុងមួយប្រតិបត្តិការ។ គ្រាប់នេះអាចហោះបានចម្ងាយរវាង ៥០០ គីឡូម៉ែត្រ ទៅ ៦០០ គីឡូម៉ែត្រ មុនពេលដែលវាធ្លាក់ចូលក្នុងសមុទ្រនាភាគខាងកើតនៃឆ្នេរសមុទ្រឧបទ្វីបកូរ៉េ។
រដ្ឋាភិបាលក្រុងតូក្យូមានការខឹងសម្បារជាមួយនឹងការបាញ់គ្រាប់មីស៊ីលជាច្រើនលើកច្រើនសាររបស់កូរ៉េខាងជើង ហើយបានបញ្ជាក់ថា ខ្លួននឹងពង្រឹងកិច្ចសហប្រតិបត្តិការជាមួយសហរដ្ឋអាមេរិក និងប្រទេសកូរ៉េខាងត្បូង ដើម្បីប្រឆាំងជាមួយនឹងការគំរាមកំហែងជាបន្តនេះ។
លោករដ្ឋមន្ត្រីការពារជាតិជប៉ុន Gen Nakatani បាននិយាយថា៖ «យើងជំរុញយ៉ាងខ្លាំងក្លាឲ្យប្រទេសកូរ៉េខាងជើងបញ្ឈប់នូវសកម្មភាពបាញ់គ្រាប់មីស៊ីលនេះបន្តទៀត ហើយយើងនឹងប្រើប្រាស់គ្រប់មធ្យោបាយទាំងអស់ដើម្បីដោះស្រាយជាមួយនឹងស្ថានការណ៍ណាមួយដែលអាចកើតឡើង»។
ទីភ្នាក់ងារគ្រប់គ្រងការពារដែនអាកាសទ្វីបអាមេរិកខាងជើង ដែលហៅកាត់ជាភាសាអង់គ្លេសថា NORAD បានបញ្ជាក់ថា ការបាញ់គ្រាប់មីស៊ីលរបស់កូរ៉េខាងជើងនឹងមិនបង្កគ្រោះថ្នាក់ណាមួយដល់ទ្វីបអាមេរិកខាងជើងនោះទេ៕
